VAROMA 10
10
1Vasuuvili vashianje, likomba lia ndi nalio mu mwoyo, khandi lisaala lianje khu Nyasaye lili ndi Vaisraeli vave nivahonyinywa. 2Nyala khumusuvilitsa havukono havo ndi vayirulitsa nu mwoyo kwosi khurumishila Nyasaye; navutswa khwirulitsa khwavo khwenokho shiukhurulanga khu vucheli vwatoto tawe. 3Vashili khumanyakhu shindu shiosi khulondokhana khuli Nyasaye akholanga vandu khuva valunji imbeli wewe; navutswa vachelitsa khwilombela injila yavo vene. Vayambakhana khwihaana vene khu Nyasaye, khwenya khumanya injila yakholelamu vandu khuva valunji imbeli wewe. 4Kristo neye limalilikha lia malako, khu mundu uliitsa khusuuvila muye alikholwa khuva wi likhola liu vulunji imbeli wa Nyasaye.
Vuhonyinyi nu vwa Voosi
5Musa yahandika makhuva yaka khulondokhana khuli mundu akholwangwa khuva wi likhola liu vulunji imbeli wa Nyasaye khulondokhana khu malako, navoola, “Mundu wumenyanga khulondokhana khuli malako kenyanga, aliitsa khuva mwoyo shichila malako kenako.” 6Navutswa yaka nako ka Mahandiko Matakatifu kavoolanga khulondokhana khuli mundu akholwangwa khuva wi likhola liu vulunji imbeli wa Nyasaye khuvirila mu lisuuvila, “Lekha khwireevana mu mwoyo, ni viina utsia mwikulu?” (Nakhwo khuvoola, khurulitsayo Kristo). 7“Inoho, Ni viina wikha hasi mu shihatisi?” (Nakhwo khuvoola, khwisimushitsa Kristo khurula mu likhutsa). 8Navutswa ni shina shia kavoolanga? “Likhuva lia Nyasaye lili himbi na munyi, munyala khulomoloma khulondokhana khulio nu khulihuchilila nu mwoyo kwosi” -- nakhwo khuvoola, likhuva lia khwilwatsanga khulondokhana khu lisuuvila. 9Niiva unyala khwiyema mulilomoloma liolio ndi Yesu neye Mwami, nu khusuuvila ndi Nyasaye neye wamwisimushitsa khurula mu likhutsa, uliitsa khuhonyinywa. 10Mundu asuuvilanga mu mwoyo kwekwe, nu khukholwa khuva wi likhola liu vulunji imbeli wa Nyasaye; yiyemanga mulilomoloma lielie nu khuhonyinywa. 11Mahandiko Matakatifu kavoolanga, “Mundu avulakhuho usuuvilanga muye, uliitsa khuheelwa tsisoni.” 12Vwavukhani vuvulakhuho hakari wu Muyahudi nende Muguriki; Mwami mulala mwenoyo neye Mwami wa voosi, khandi akasitsanga mu vunyishi vandu vasaalanga khuye. 13Khuli Mahandiko Matakatifu kavoolanga, “Shia mundu wosi usaalanga khuvirila khu lira liu Mwami, aliitsa khuhonyinywa.”
14Navutswa vandu vakhanyala ndina khusaala khuye avakhonye, navo nivakhasuuvila muye tawe? Vakhanyala khusuuvila ndina mu likhuva lia woyo wa vashili khuhulila? Vakhanyala khuhulila ndina mu likhuva lia mwilwatsi ashili khuvilwatsila? 15Vandu vakhanyala ndina khwilwatsa, nivashili khurumwa? Khuli Mahandiko Matakatifu kavoolanga, “Ni likhuva liu khuyaanzitsa, lwa vandu vavetsanga nivakhitsa khwilwatsa Ivanjeli!” 16Navutswa voosi, shivahuchilila Ivanjeli tawe; shichila Muprofeti Isaya mwene yavoola, “Mwami Nyasaye, ni viina wasuuvila mu ka yahulila nu khuvoolanga?” 17Khulwa yako, lisuuvila lirulananga khu likhuva limali khuhulilwa, khandi likhuva liahulilwa linyolekhanga khurulana khu milwatso khulondokhana khu Kristo.
18Navutswa ndevanga lireevo lianje. Kanyala khuva shivahulila likhuva tawe? Ni kilikali, valihulila. Khuli Mahandiko Matakatifu kavoolanga,
“Mwoyo kwavo kwahulilikhana shia havundu hosi mu shivala;
likhuva liavo liatukha mu tsimbeka tsiosi khulilova.”
19Ndevanga lireevo lindi. Kanyala khuva Vaisraeli vakorwa likhuva? Musa mwene neye waraanga khuchipa,
“Niitsa khumukhola mulishendeshela
vandu vashili khutukha luhia,
luhia lushili khumanya shindu luliitsa
khumukhola khuva nu vurima.”
20Muprofeti Isaya avoolanga khandi vuchila khuria,
“Mali khunyolwa na vandu vali nivavula lienya liu khukhava;
Mali khulolekha mwene khu yavo vali nivashili
khureevakhu shindu shiosi khulondokhana khwinzi.”
21Navutswa khulondokhana khu Israeli avoolanga,
“Shia litukhu liosi njelitsanga khulera milembe
khu vandu vambakhana khuhulishitsa khandi vahingani.”
Currently Selected:
VAROMA 10: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
