VAROMA 11

Nyasaye Yahaana Tsimbavasi Tsietsie khu Vaisraeli

1Khulwa yako, ndevanga lireevo. Kanyala khuva Nyasaye wayambakhana vandu veve? Shikali kario tawe! Inzi mwene ndi Muisraeli, khurula mu vitsukhulu va Aburahamu, nindi mundu wivulwa mu vandu vuluhia lwa Benyamini. 2Nyasaye shikali wayambakhana vandu veve va yali niyarovola khurula muliraanga tawe. Mwamanya shia Mahandiko Matakatifu kavoolanga mu muliango kuli na makhuva khulondokhana khu Eliya, khuli yasaala khu Nyasaye shichila Israeli, 3“Mwami Nyasaye, vamali khwiira vaprofeti vovo khandi vasambula vwaali vwovwo. Ninzi wonyene warikala mwoyo, khandi vachelitsanga khuli vanziira.” 4Ni shina shia Nyasaye yachipa Eliya? “Namala khuvikha haluveka vandu vaanje tsiheelefu saba, vashili khusaalakhu khu nyasaye wu vuvehi Baali.” 5Nindio khandi kikholekhanga khali nunundi: khuli ni isavu indititi ya vandu varikala va Nyasaye yarovola khuvirila mu tsimbavasi tsietsie. 6Navutswa niiva varovolwa khuvirila mu tsimbavasi tsietsie, shikanyala khuva khulondokhana khu mihinzilu tawe. Niiva kakhavele kario, tsimbavasi shitsiakhavele tsimbavasi tsiatoto tawe.

7Ni shina? Vaisraeli vakhaywa khunyola shia vali ni vakhavanga. Shituma shia vandu vatititi va Nyasaye yali niyarovola, navo vonyene vanyola. Vandi voosi vali vahingani. 8Khuli Mahandiko Matakatifu kavoolanga,

“Nyasaye yavalomba khuvula khuva ni limanya inoho khukanakana;

khali nunundi vakhaywa khulola inoho khuhulila.”

9Daudi avoolanga khandi,

“Leshi vakumilwi nu khureekwa mu milukha chiavo chi lilia;

khukwa, nu khusalilitswa!

10Vamwaminywi tsimoni tsiavo khuvula khulola;

khandi vakokhominywi mikongo chiavo khumatukhu koosi shichila matiinyu kavo.”

11Khulwa yako, ndevanga lireevo lindi. Vayahudi visikarila, nivakwa nuluva luvwele? Shikali kario tawe! Navutswa shichila vakhola vwoni, vandu vi tsimbia tsindi navo vahonyinywa, khwenya Vayahudi khuvashendeshela. 12Navutswa niiva vwoni vwa Vayahudi vakhola vwachila vandu nivanyola tsikhaavi mu vunyishi mu shivala; khandi niiva khukhaywa khwavo khwalerela vandu vi tsimbia tsindi tsikhaavi, ni hali khanga mu vunyishi, lwa Vayahudi valiitsa khuvalitsilwamu.

Vuhonyinyi khu Vandu vi Tsimbia Tsindi

13Nomolomanga nunundi khu munyi vandu vi tsimbia tsindi. Lwa shili murumwa wa vandu vi tsimbia tsindi, mbambalitsanga muhinzilu kwanje. Kholanga ndio, 14khu Vayahudi vashianje vashendeshele, khandi mbonyinyi valala khuvo. 15Lwa vambakhanwa, vandu vu mu shivala vakalukhanyinywa khuvula khuva nu vutsiku na Nyasaye, navutswa khuva valina va Nyasaye. Lwa valiitsa khuhuchililwa, ni shina shiliitsa khwikholekha, nikakhavele khwisimushitswa khurula mu likhutsa?

16Niiva shitonye shiukhuraanga shiu mukati shihanwangwa khu Nyasaye, khulwa yako, khali mukati kwosi nu kwekwe. Niiva miili chiu musala chihaanwangwa khu Nyasaye, khali tsisia tsiosi ni tsietsie. 17Niiva tsindala khu tsisia tsienetso, tsiliitsa khuva tsiamenekwa, khandi lusia lu musala ku musayituni kumbulimu kuraachwi havukono hatsio, khulu khusanga muvunulu vu musala ku musayituni; 18muvuli khwichinjilila shichila tsisia tsiamenekwa tsienetso. Niiva munyala khwichinjilila, khutukha muve nu mumanyi ndi shikali nu munyi vamuchilanga muuli nu kuneera tawe, navutswa muuli nakwo kuneeritsanga munyi.

19Navutswa muliitsa khuvoola, “Tsisia tsiamenekwa khu ndakwimu.” 20Ni katoto. Tsiamenekwa khulu khuvula khusuuvila, navutswa munyi mutsilililanga khusinjila ni tsingulu khuvirila mu lisuuvila. Navutswa muleshe khwilola shichila kenako; nikhali, muve vacheli. 21Lwa Nyasaye yakhavelela Vayahudi, vali khuli tsisia tsiene tsiatoto, avulakhu khuli lwanyala khuvela munyi. 22Lolikhu khuli Nyasaye ali nu vulahi, khandi khuli ali nu vululu. Nu mululu khu vandu vakorela mu vindu vitamanu, navutswa ali nu vulahi khu munyi, niiva mulatsililila mu vulahi vwevwe. Navutswa niiva mulakhaywa khutsililila mu vulahi vwevwe, khali munyi muliitsa khumenekwa. 23Niiva Vayahudi valiitsa khukalukhana khandi vasuuvili, valiitsa khukalushitswa mu vwiyangu vwavo; shichila Nyasaye ali nu vunyali vu khukhola kenako. 24Munyi vandu vi tsimbia tsindi, nu munyi muli khuli lusia lu musala ku musayituni kumbulimu kwamenekwa; nu kuraakwa khu musala ku musayituni kwasembelelwa, shindu shikhanyala khwikholekha mu shivala tawe. Vayahudi vali khuli musala kwasembelelwa kwenoko; khandi vuliitsa khuva vutoro khu Nyasaye khuhambanyinya tsisia tsiamenekwa tsienetso khu musala ku lusia lwarulakhu.

Tsimbavasi tsia Nyasaye khu Vandu voosi

25Vasuuvili vashianje, khuliho na katoto kaviswa, ka nyenyanga muve nu mwamanya, shichila kanyala khumulinda muvuli khukanakana ndi muli nu vusitsa. Valala khu Vaisraeli ni vandu vahaaka, khutukha lwi isavu yatoto ya vandu vi tsimbia tsindi valiitsa khutukha khu Nyasaye. 26Khulwa yako, Vaisraeli voosi valiitsa khuhonyinywa. Khuli Mahandiko Matakatifu kavoolanga,

“Muhonyinyi aliitsa khwitsa narula Sayoni

nu khurulitsaho vutamanu vwosi mu vitsukhulu va Yakobo.

27Niitsa khukhola lilakano lianje navo,

lwa niitsa khurulitsaho vwoni vwavo.”

28Vayahudi ni vatsiku va Nyasaye, shichila munyi vandu vi tsimbia tsindi, lwa vambakhana Ivanjeli. Navutswa ni valina va Nyasaye, shichila vakuuka vavo khandi shichila Nyasaye neye wavarovola. 29Nyasaye namali khuha vandu vihanwa vievie khandi navarovole, shianyala khukalukha inyuma mu likhola lielie tawe. 30Matukhu kandi, munyi vandu vi tsimbia tsindi mwali mwa yambakhana khulonda malako ka Nyasaye; navutswa nunundi mwavelwa tsimbavasi, lwa Vayahudi vambakhana khulonda malako ka Nyasaye. 31Munjila indala yeneyo, shichila tsimbavasi tsia mwavelwa, Vayahudi vambakhananga khusuuvila mu Nyasaye, khu khali vo khandi valivelwa tsimbavasi na Nyasaye. 32Nyasaye wakhola vandu voosi khuva khuli vavohe vu khwambakhana khulonda malako, khwenya khuvavela tsimbavasi voosi.

Khutukha Khwitsominyi Nyasaye

33Nyasaye nu muhinda khushila muno! Vusitsa vwevwe nende vucheli vili ni tsingulu tsinyishi khuvirana! Ni viina unyala khwivaala inganakani ya Nyasaye? Ni viina unyala khumanya ka yenyanga khukhola? 34Khuli Mahandiko Matakatifu kavoolanga,

“Ni viina wamanya khuli Mwami akanakananga?

Ni viina unyala khumukhonya inganakani yu khulonda?

35Ni viina wamuhaakhu shihanwa shiosi,

khulu khurungwa khandi shihanwa?”

36Nyasaye neye waloonga shia shindu shiosi. Shia shindu shiosi shiliho khuvirila muye, khandi shia shindu shiosi ni shieshie. Nyasaye aheelwi vukhumi mihika ni mihika! Amina.

Currently Selected:

VAROMA 11: LLLCATHOLIC

Highlight

Copy