VAROMA 12

Khwitsominyi Nyasaye

1Khulwa yako, vasuuvili vashianje, musayanga numuyaanza, khuvirila khu tsimbavasi tsia Nyasaye mwihaane ni mivili chienyu khuli shihanwa shiu musango kuli mwoyo khu Nyasaye, kuli mutakatifu khandi kumuyaanzitsanga. Nakhwo khusaala khwatoto khuye. 2Muvuli khulondakhu mwiima kwa vandu vu mu shivala shinu; navutswa leshi Nyasaye amukalukhanyinyi mu mioyo chienyu mukari, khu mumanye lienya lia Nyasaye, mukhole malahi, ka ahuchililanga khandi maseletse.

3Khulondokhana khu tsimbavasi tsia Nyasaye yandolela, mbolelanga shia mulala khu munyi avuli khwivukula khuva nu vunyali khuvira khuli yenyekhanga ave nali; navutswa yivukuli mwene mu vwichehitsi khulondokhana khu lisuuvila lia Nyasaye yamuha. 4Mmbili kuli ni vivelo vinyishi, khandi shia shivelo shikholanga muhinzilu kwenyekhanga kukholwi. 5Khulwa yako, khali niiva khuli vanyishi, khuli mmbili mulala mu Kristo; khandi khwahambanyinywa shia mulala khu weshie khuli vivelo vili khu mmbili mulala. 6Lwa khuli ni vihanwa vinyishi lukanu khulondokhana khu tsimbavasi tsia khwaheelwa, chendi khuvirumishile. Niiva ni shihanwa shiu vuprofeti, khutukha khuprofete khulondokhana khu lisuuvila lia khuli nalio. 7Niiva nu khukhola muhinzilu, khutukha khukhole muhinzilu kwenoko; niiva nu khwechitsa, khutukha khwechitsi; 8niiva nu khutinyilitsa vandi, khutukha khuvatinyilitse; niiva nu khusolola vukhonyi vu khukhonya vandi, khutukha khuhaane nu mwoyo mulala; niiva nu vwimilili, khutukha khukhole muhinzilu ni tsingulu; niiva nu khuvela vandi tsimbavasi, khutukha khukhole ndio nu vuyaanzi.

9Vuyaanzi khutukha vuve vwatoto. Lekhani ni vindu vitamanu; navutswa mutsililile khukhola malahi. 10Muyaanzane vene khuvene khuli vasuuvili, khandi muheelelane luyali. 11Muvuli khukaarahala mu likhola mihinzilu chienyu; navutswa mukhole mihinzilu ni tsingulu. Murumishile Mwami nu mwoyo ku khwihaana kwosi. 12Mwikhoyele lisuuvilitswa lienyu, mwikhutsili mu matiinyu, khandi mutsililile khusaala. 13Mukavane shia muli nashio na vandu va Nyasaye veshie vali vamanani, khandi mwinjilitsi vacheni mu tsingo tsienyu.

14Mukasitse yavo vamutambitsanga; muvakasitse, navutswa muvuli khuvalaama. 15Muve nu vuyaanzi na yavo vali nu vuyaanzi; khandi mwikhule na yavo vikhulanga. 16Muvukulane vulahi vene khuvene. Muvuli khwilolakhu; navutswa muhambane na vandu vavula shindu shiosi shia vatiilakhu. Muvuli khukanakanakhu muli nu vusitsa khuvira vandi.

17Muvuli khuvanzila vutamanu khu vutamanu; navutswa muchelitsi khukholela shia mundu wosi malahi. 18Muchelitsi khuli vene munyala, mumenye mu milembe na shia mundu wosi. 19Valina vaanje, muvuli khuvanzila; navutswa lesheli Nyasaye ave neye unyala khuvanzila. Mahandiko Matakatifu kavoolanga, “Mwami Nyasaye avoolanga, Ninzi uliitsa khuvanzila; Ninzi uliitsa khurunga.” 20Nikhali, khuli Mahandiko Matakatifu kavoolanga, “Niiva inzala yaleka mutsiku wowo, muhe shiukhulia; niiva ali nu vuluhu, muhe shiang'wa; shichila nukhola ndio, uliitsa khuva numulombanga khuva ni tsisoni tsinyishi, khuli mandaa kakhanga mulilu khuye.” 21Vutamanu vuvuli khumukuura; navutswa khutukha mukuuri vutamanu numukhola malahi.

Currently Selected:

VAROMA 12: LLLCATHOLIC

Highlight

Copy