VIKHOLWA 23

1Paulu yaheenza vulunji mu vandu vi Shikhaalo navoola, “Vaisraeli vashianje! Tsinganakani tsianje tsiu mukari ni tsindahi khulondokhana khuli namenyanga imbeli wa Nyasaye khutukha nunundi.” 2Mukali wa vasalisi voosi Anania yavoolela vandu vali nivasinjile himbi khu Paulu, vamusamuli khuluseye. 3Paulu yamuvoolela, “Yivi usasanga khuli lisisi liavekhwa ilaanji indavu, Nyasaye alakhurumula! Ni kilikali, wikhale yaho khukhalachila khulondokhana na malako; navutswa yivi umenekanga Malako, lwa uhaananga lilako samulwi?”

4Vandu vali nivasinjile himbi khu Paulu vavoola, “Toto, unyala khunyeka Mukali wa vasalisi voosi wa Nyasaye?”

5Paulu yachipa, “Munyi Vaisraeli vashianje, shimbele nimanyi nu Mukali wa vasalisi voosi tawe; shichila Mahandiko Matakatifu kavoolanga, ‘Ukhalomolomakhu shindu shitamanu khulondokhana khu mwamihi wa vandu venyu tawe.’ ”

6Navutswa lwa Paulu yamanya ndi valala khu vandu vi shituma ni Vasadukayo na vandi ni Vafarisayo, yalaanjilila mu Shikhaalo navoola, “Munyi Vaisraeli vashianje! Inzi nu Mufarisayo, mwana wa Vafarisayo. Vanzalanga hanu, shichila lisuuvilitswa liandi nalio ndi vandu vakhutsa valiitsa khwisimukha khurula mu likhutsa!”

7Lwa yali niyakhavoola ndio, Vafarisayo nende Vasadukayo varaanga khuhingalitsana mulilomoloma; ma shituma shia vandu ni shiavukhanamu hali khavili. 8Vasadukayo vavoolanga ndi khwisimukha khwa vandu khurula mu likhutsa, tsinjelosi inoho roho vivulaho; navutswa Vafarisayo vasuuvila mu vindu vivaka vienevo viosi. 9Vandu vatsililila khulaanjilila; ma valala khu veechitsi va Malako nivali vu mukaanda kwa Vafarisayo vasinjila nivahangalitsana mulilomoloma vululu, nivavoola, “Mundu uyu avulakhu shindu shitamanu shianyala khuva nakholi. Haundi ni kilikali, roho inoho injelosi yalomolome khuye!”

10Mahangalitsani kali nu vululu, nikalomba mwimilili wa vasikali va Varoma khuria ndi Paulu yakhavulanyinywi mu vitonye. Khulwa yako, yavoolela vasikali veve vakholomoshe vatsi khurulitsa Paulu muvo, vamuhile havundu ha vasikali vamenyanga.

11Vutukhu vwalondakhu, Mwami yasinjila himbi na Paulu; navoola, “Uve ni ikholo! Lwa uhaani vushiahidi vwovwo khulondokhana khwinzi hanu mu Yerusalemi, nindio khandi utsitsanga khuhaana vushiahidi vwovwo khulondokhana khwinzi mu litaala lia Roma.”

Vayahudi Vakanakana Khuli Viira Paulu

12Khulitukhu lialondakhu mu mavwevwe, Vayahudi valala vakana nivaloshitsa ka vakhola. Visuhitsana vene khuvene ndi shivanyala khuliakhu inoho khung'wakhu, nivashili khwiira Paulu tawe. 13Vandu valoshitsa khukhola ndio vali vanyishi khuvira makhomi kane. 14Vasimukha nivatsia khu vasalisi vakali nende vasakhulu; nivavoola, “Voosi khwisuuhitsane ndi shiukhunyala khuliakhu, nu khushili khwiira Paulu tawe. 15Mwenyekhanga munyi halala na vandu vi Shikhaalo mutsi khu mwimilili wa vasikali, nu khwikhola mwenyanga khumanya katoto kachilanga Paulu nayaalwa. Muvooleli amulerele Paulu mushiina shienyu. Navutswa khuliitsa khuva nu khwirecheshe khumwiira, nashili khali khutukha hanu.”

16Navutswa khootsa wa Paulu yahulila ka vali nivaloshitsi kenako. Khulwa yako, yasimukha natsia khwinjila havundu ha vasikali vamenyanga; navoolela Paulu. 17Nalwo lwa Paulu yalaanga musikali mulala khu vimilili va vasikali imia indala; namuvoolela, “Hila musatsa muvukha uyu khu mwimilili wa vasikali; ali na makhuva ka yenyanga khumuvoolela.” 18Mwimilili wasinjililanga vasikali mwenoyo yamuvukula namuhila khu mwimilili wa vasikali. Yavoola, “Muvohe ulaangwangwa Paulu, ambolele khulerele musatsa muvukha uyu, shichila ali na makhuva ka yenyanga khukhuvoolela.”

19Mwimilili wa vasikali yamukumila mukhono, namusuunda haluveka namureeva, “Ni shina shia wenyanga khumbolela?”

20Yavoola, “Vimilili va Vayahudi vahuchilitsane vakhureeve uhili Paulu imbeli wi Shikhaalo mukamba, nu khwikhola ndi Shikhaalo shienyanga khumanya katoto khulondokhana khu Paulu. 21Navutswa uvuli khuvahulishitsa; shichila khuliitsa khuvaho na vandu vanyishi khuvira makhomi kane, nivivisi nivamulindililanga. Visuhitsane vene shivanyala khuliakhu shiukhulia inoho khung'wakhu shindu shiosi, nivashili khwiira Paulu tawe. Virecheshe nunundi khukhola ndio, khandi valindililanga uvavoolele ka vakhola.”

22Mwimilili wa vasikali yamuseevula, namuvoolela, “Ukhavoolelakhu mundu wosi makhuva kumbolele tawe.”

Vahila Paulu khu Gavana Felikisi

23Mwimilili wa vasikali yalaanga vavili khu vasikali veve navavoolela, “Murecheshitsi vasikali tsimia tsivili khandi vi tsifarasi makhomi saba nende vandi tsimia tsivili va marimu, mavirecheshe khutsia mu litaala lia Kaisaria tsisaa tsivaka tsiu vutukhu khutsia. 24Muhe Paulu tsifarasi tsianinakhu, khandi mumuchenditsi vulahi khutukha khu gavana Felikisi.” 25Khulwa yako, mwimilili wa vasikali mwenoyo yahandika ibarwa ilimu na makhuva yaka:

26“Inzi Kilaudia Lusiha, mbandikanga khu yivi gavana Felikisi waheelwa luyali: Nyola milembe. 27Vayahudi vakumila mundu uyu, nivava himbi khumwiira. Nanyola ndi nu Muroma, ninzia na vasikali vaanje, manimuhonyinya. 28Nyenyanga manye shivune shichilanga nivamuyaala, nimuhila mu Shikhaalo shiavo. 29Nanyola ndi shikali yali niyakholakhu shindu shitamanu shinyala khuchila yiirwi inoho avohwi mucheela tawe; navutswa vamuyaalanga khulondokhana khu mareevo shichila malako kavo. 30Lwa navoolelwa valoshitsi khuli vamwiira, namuruma khu yivi vwangu. Navoolela vandu vamuyaalanga vakhulerele imbeli wowo vindu vichilanga nivamuyaala.”

31Vasikali vakhola khuli vavoolelwa. Vavukula Paulu mu vutukhu vwenovo, nivatukha mu litaala lia Antipaturi. 32Litukhu lialondakhu, vasikali vali nivachendi khu vilenje vakomokha nivakalukha havundu ha vasikali vamenyanga; manivalekha vasikali vi tsifarasi vatsililile nu luchendo naye. 33Lwa vatukha mu litaala lia Kaisaria, vavukula ibarwa ya vali nivali nayo, nivaha gavana Felikisi; khandi nivalavushitsa Paulu khuye. 34Gavana Felikisi yasoma ibarwa yeneyo, nareeva Paulu amuvoolele lusomo lwarulamu. Lwa yanyola likhuva ndi Paulu arulanga mu lusomo lwa Kilikia, 35gavana yavoola, “Nzitsanga khuhulila makhuva koko, lwa vandu vakhuyaalanga valiitsa khuva nivatukha hanu.” Khulwa yako, yahaana lilako Paulu alindwi mu inzu yu Mwami Herode.

Currently Selected:

VIKHOLWA 23: LLLCATHOLIC

Highlight

Copy