VIKHOLWA 24

Paulu Yayaalwa Imbeli wa Gavana Felikisi

1Matukhu karanu nikakhavira, Mukali wa vasalisi voosi Anania yakholomokha natsia mu litaala lia Kaisaria, halala na vasakhulu valala nende mundu wasomela malako walaangwangwa Teritula. Valolekha imbeli wa gavana nivayaala Paulu. 2Paulu yalaangwamu, ma Teritula naraanga khumuyaala, navoola,

“Yivi Felikisi! Liamiha liolio liu vusitsa lia khulerela milembe khumatukhu manyishi; khandi likalukhana lilahi linyishi likholekhanga khukhonya shivala shieru. 3Khwayinjilitsa kenako shia havundu hosi, khandi khukhusanditsanga shia khase khosi. 4Shikali nyenyanga khuvukula vwiyangu vwovwo vunyishi tawe; navutswa khukhusaya nuyaanza uve nu mwoyo mulahi khandi uhulishitsi muvwimbi ka khuvoolanga. 5Khumali khurunishitsa khandi khunyoli ndi mundu uyu nu mutamanu khuvira shichelo. Nu mundu uraanjitsanga shileeche mu Vayahudi shia havundu hosi mu shivala; khandi neye mwimilili wu mukaanda kwa Vanazare. 6Khali yachelitsa khwononyinya Litempeli, nu khumukumila. [Khwaviritsa khumukhalachile khulondokhana khu malako keru vene. 7Navutswa mwimilili wa vasikali imia indala va Varoma walaangwangwa Lusiha, yatukhaho, manamuvukula ni shiliru. 8Khulwa yako, Lusiha yahaana lilako ndi vandu vamuyaalanga vatushi imbeli wowo.]#24:8 Mahandiko malala kavula tsimbaso tsia 6b-8a. Niiva unyala khurunishitsa mundu uyu ulanyola katoto khulondokhana khu vindu vichilanga nu khumuyaala.” 9Vayahudi viyunga mu makhuva kachila nayaalwa, nivavoola koosi ni katoto.

Paulu Yavoola Makhuva Kukhwishinga Imbeli wa Felikisi

10Khulwa yako, gavana yaha Paulu vwiyangu alomolome, ma Paulu navoola:

“Manyi vulahi ndi wava mukhalachi wi shivala shinu khumihika minyishi; khandi ndi nu vuyaanzi khuvoola makhuva kaanje ku khwishinga imbeli wowo. 11Niiva unyala khurunishitsa mwene, ulanyola ndi khali matukhu likhomi na kavili kashili khuvirakhu khurula ninzia khusaala mu Yerusalemi. 12Vayahudi shivanyolakhu nimbangalitsana mulilomoloma nu mundu wosi mu Litempeli inoho nimbwananga mulilu mu shituma shia vandu, mu masinagogi, inoho havundu handi hosi mu litaala likali tawe. 13Shivanyala khwivaalakhu vulahi vwene shivune shichilanga nivanzala nunundi tawe. 14Navutswa mbuchililanga imbeli wowo ndi saalanga khu Nyasaye wa vakuuka veru, lwa nondanga Injila yu Mwami yamanyinya, ya vavoolanga nu vuvehi. Navutswa suuvilanga khandi mu shia shindu shiosi shiahandikwa mu Malako ka Musa khandi mu vitabu via vaprofeti. 15Ndi ni lisuuvilitswa lilala liele mu Nyasaye, khuli vandu venavo vali nalio vene, nakhwo khuvoola, vandu voosi, vave valahi inoho vatamanu valiitsa khwisimukha khurula mu likhutsa. 16Khulwa yako, njelitsanga shia khase khosi mu tsinganakani tsianje tsiu mukari khukhola vindu vilahi imbeli wa Nyasaye nende vandu.

17“Lwa namenyanga ihale wene khurula mu Yerusalemi khumihika minyishi, natsiayo khuhilila vandu vamanani vihanwa viu khuvakhonya nu khuhaana vihanwa viu khukhola misango. 18Lwa nali nikholanga kenako, vanyola mu Litempeli nindi munihu khulondokhana khu mulukha. Shikali vanyolakhu mu shituma shia vandu inoho nikholanga shileeche tawe. 19Nikhali, Vayahudi valala varulanga mu lusomo lwa Asia valiho; navo venyekhanga vave nivalolekhanga imbeli wowo vanzale, niiva vanyala khuvoola shindu shitamanu shia valola nikholanga. 20Inoho leshi vandu vali hanu yava vene vavoole vutamanu vwa valola nikholanga, lwa nasinjila imbeli wi Shikhaalo -- 21nikakhali shindu shilala shionyene shia nalaanjilila nimbola, lwa nasinjila imbeli wavo, nimbola, ‘Sinjili hanu nunundi khuyaalwa, shichila ndi ni lisuuvilitswa ndi vandu vakhutsa valiitsa khwisimukha khurula mu likhutsa.’ ”

22Navutswa shichila Felikisi yali nu vucheli vunyishi khulondokhana khu Injila yu Mwami yamanyinya, yasinjilitsa shiyaalo. Yavoola, “Lwa mwimilili wa vasikali Lusia atukhaho, nakanakana khu vindu vichilanga nivakhuyaala.” 23Yahaana lilako khu mwimilili wa vasikali imia indala Paulu alindwi; nikhali amuvohololekhu hatititi, khandi ahuchilile valina veve vamuhe shia yenyanga.

Paulu Yalomoloma khu Gavana Felikisi nende Durusila

24Matukhu mati nikakhavira, gavana Felikisi yatukhaho nu mukhali wewe Durusila, wali nali Muyahudi. Yarumana Paulu alerwi imbeli wavo, manamuhulishitsa khuli yalomolomanga khulondokhana khu lisuuvila mu Yesu Kristo. 25Navutswa lwa Paulu yatsililila khwivaala makhuva khulondokhana khu vulunji, khwilinda munjila indahi, khandi Litukhu liu Khukhalachilwa, Felikisi yaria navoola, “Luvwele! Nuyaanza rula hanu. Nakhulaanga khandi ninakhanyola vwiyangu.” 26Yali ni lisuuvila isaa yeneyo ndi Paulu alamuha asoya. Yali wamenya namulaanga shia khase khosi alomolome naye.

27Lwa mihika chivili chiali nichiakhavira, mundu walaangwangwa Porokia Fesito, yakholwa khuva gavana havukono ha Felikisi. Felikisi yalekha Paulu mucheela, shichila yenyanga khuyaanzitsa Vayahudi.

Currently Selected:

VIKHOLWA 24: LLLCATHOLIC

Highlight

Copy