VIKHOLWA 22

1“Vayahudi vashianje, mbulishitsikhu lwa mbolanga makhuva kaanje ku khwishinga imbeli wenyu!” 2Lwa vahulila nalomolomanga Muluhebrania, vatsililila khuhonjela muno; ma Paulu natsililila khuvoola,

3“Ndi Muyahudi, wivulwa mu litaala lia Tarisa mu lusomo lwa Kilikia; navutswa natushila hanu mu Yerusalemi khuli mwechi wechitswa na Gamalieli. Navoolelwa mivaalo matinyu mu Malako ka vakuuka veru; khandi nali nayihaana nu mwoyo kwosi khu Nyasaye, khuli lwa munyi muli hanu nunundi. 4Natambitsa khali ninziira vandu valondanga Injila yu Mwami yamanyinya. Nakumila vandu vasatsa nende vakhali nivavoha mucheela. 5Mukali wa vasalisi voosi nende Shikhaalo shiosi vanyala khuhaana vushiahidi ndi mbolanga katoto. Khali vambetsanga tsibarwa tsiu khuhila khu Vayahudi vashianje vi litaala lia Damasika. Natsitsayo khukumila vandu valiyo nu khuvalera nivavoheelwi mu Yerusalemi khwitsa khusalilitswa.

Paulu Yivaala khuli Yakwa Mukristayo

(Vikh 9:1-19; 26:12-18)

6“Lwa nali nindi khu luchendo lwanje, nindi himbi khutukha mu litaala lia Damasika himbi mbasu hakari, nonoho lwa vulavu khurula mwikulu vwasashila shia havundu hosi. 7Nakwa hasi nimbulila mwoyo nu kumbolelanga, ‘Saulu, Saulu! Shichila shina undambitsanga?’ 8Nareeva, ‘Mwami, uli viina?’ Yambolela, ‘Ninzi Yesu wa Nazareti, wa utambitsanga.’ 9Vandu vali nivali ninzi valola vulavu vwenovo; navutswa shivahulila mwoyo kwa woyo wali nalomolomanga khwinzi tawe. 10Namureeva, ‘Mwami, ni shina shiakhola?’ Mwami yambolela, ‘Sinjila utsi mu litaala lia Damasika. Uliitsa khuvoolelwayo shia shindu shiosi shia wenyekhanga ukhole.’ 11Lwa nakhaywa khulola shichila vulavu vwali vunyishi, vandu vali nivali ninzi vangumila mukhono kwanje, khunzimilila nu khutukha mu litaala lia Damasika.

12“Khwali nu mundu walaangwangwa Anania mu litaala lia Damasika. Yali mundu wali niyihaana nu mwoyo kwosi khulonda ka Malako keru kavoolanga; khandi Vayahudi voosi vamenyayo valomolomanga vindu vilahi khuye. 13Anania yitsa nasinjila himbi khwinzi. Yavoola, ‘Musuuvili washianje Saulu, lola khandi!’ Isaa yeneyo, nalola khandi nimuheenza. 14Khulwa yako, Anania yambolela, ‘Nyasaye wa vakuuka veru yakhurovola umanye lienya lielie, khandi ulole Murumishi wewe wi likhola liu vulunji, nu khumuhulila mwene nalomolomanga. 15Nivi uliitsa khuva mushiahidi wewe khuvoolela shia mundu wosi makhuva khulondokhana khu vindu via yivi mwene uloli khandi nuhulila. 16Shichila shina utsilililanga khulindilila nunundi? Sinjila, ubatiswi ma vwoni vwovwo vurulitswiho, lwa usaalanga khuye.’

Paulu Yalaangwa Khwilwatsila Vandu vi Tsimbia Tsindi

17“Lwa nakalukha Yerusalemi, khandi lwa nali nisaalanga mu Litempeli, nalola malolo, 18nindola Mwami nalomolomanga khwinzi, nambolela, ‘Khola vwangu uruli mu Yerusalemi, shichila vandu vali hanu yava shivanyala khuhuchilila vushiahidi vwovwo khulondokhana khwinzi tawe.’ 19Nachipa, ‘Mwami, vene vamanya vulahi ndi natsitsanga mu masinagogi khukumila nu khurumula vandu vasuuvilanga yivi. 20Lwa mushiahidi wowo Stefano yiirwa, inzi naliho mwene, nisanganga khu liirwa lielie khandi nininda tsinguvu tsia vandu vali nivamwiiri.’ 21Nalwo lwa Mwami yambolela, ‘Rula hanu; shichila niitsa khukhuruma ihale wene khu vandu vi tsimbia tsindi.’ ”

22Vandu vahulishitsa Paulu, khutukha lwa yavoola ndio. Navutswa vandu venavo valaanjilila ikulu nu mwoyo mukali nivavoola, “Murulitsiho! Yiirwi! Avuli khutsililila khuva mwoyo!” 23Valaanjilila, nivachinga tsinguvu tsiavo ikulu, nivasiuva lukuushi mu vushindu. 24Mwimilili wa vasikali va Varoma yavoolela vasikali veve vahile Paulu havundu ha vasikali vamenyanga; nahaana lilako liu khushutwa khutukha lwa vanyola shivune shichilanga Vayahudi nivalaanjilila munjila yeneyo, shichila ye. 25Navutswa lwa vamuvoha khu vamushiuti, Paulu yareeva mwimilili wa vasikali va Varoma imia indala wali nasinjileho, “Malako keru kanyala khuhuchilila Muroma khushutwa, nashili khukhalachilwa ukholi vutamanu vwosi?”

26Lwa musikali mwenoyo yahulila ndio, yasimukha natsia khu mwimilili wa vasikali va Varoma; namureeva, “Ni shina shia wenyanga khukhola? Mundu uyu nu Muroma?”

27Nalwo lwa mwimilili wa vasikali va Varoma yasimukha natsia khulola Paulu. Yamureeva, “Mbolela, ni kilikali unyala khuva uli Muroma?”

Paulu yamuchipa, “Nindio kali.”

28Mwimilili wa vasikali va Varoma yamuvoolela, “Inzi narunga murungu munyishi khukholwa Muroma.”

Paulu yamuvoolela, “Navutswa inzi nivulwa Muroma.”

29Vandu vali nivali himbi khumureeva mareevo, varulaho vwangu; ma mwimilili wa vasikali va Varoma naria; shichila yali wakhamanya ni kilikali Paulu nu Muroma, khandi ndi umali khumuvoha ni minyololo.

Paulu Yahilwa Imbeli wi Shikhaalo

30Navutswa litukhu lialondakhu, mwimilili wa vasikali va Varoma yikomba khwenya khumanya shivune shichilanga Vayahudi nivayaala Paulu. Khulwa yako, yavoholola Paulu; khandi nahaana lilako ndi vasalisi vakali nende vandu vi Shikhaalo voosi khwakanila halala. Yavukula Paulu, namuvoolela asinjile imbeli wavo.

Currently Selected:

VIKHOLWA 22: LLLCATHOLIC

Highlight

Copy