VIKHOLWA 21

Paulu Yatsia Yerusalemi

1Lwa khwavaseevula nivatsia, khwambukha nu khutsia vulunji, nu khutukha havundu halaangwangwa Kosi. Khulitukhu lialondakhu, khwatukha Rodesi, wa khwarula nu khutsia mu litaala lia Patara. 2Lwa khwanyola imeli yu khutsia mu litaala lia Foenike, khwanina muyo nu khutsia. 3Khwatukha havundu ha khunyala khulola shisulu shia Saipurasi. Khwambukha nu khutsia ikuvanda wi shisulu shienesho, nu khutsia Siria. Khwatukha mu litaala lia Tiro, ha imeli yali nitsitsanga khwishitsa misiko chiali muyo. 4Khwanyolayo vasuuvili valala, nu khumenya halala navo khumatukhu saba. Vavoolela Paulu khuvirila mu tsingulu tsia Roho Mutakatifu avuli khutsia Yerusalemi. 5Navutswa lwa matukhu keru kukhwikhala navo kali nikakhavwa, khwarulayo nu khutsililila nu luchendo lweru. Vandu venavo voosi, halala na vakhali vavo nende vaana vavo, vakhuheeleshitsa khurula mu litaala likali. Khwasikama khuluchinga lwi inyanza nu khusaala. 6Khwaheelelana vene milembe vulahi, nu khutsia khunina mu imeli; navo nivakalukha ingo.

7Khwatsililila nu luchendo lweru khurula mu litaala lia Tiro, nu khutukha mu litaala lia Putolemahi; ha khwahaana milembe khu vasuuvili, khandi nu khwikhala navo khulitukhu lilala. 8Khulitukhu lialondakhu, khwarulayo nu khutukha mu litaala lia Kaisaria. Khwinjila mu inzu yu muinjilisti walaangwangwa Filipu, wali mulala khu vandu saba vali nivarovolwa mu Yerusalemi, nu khumenya naye. 9Filipu yali na vaana vi shikhana vane vali nivashili khutsiakhu mu tsikhali; vaana vi shikhana venavo vali ni shihanwa shiu khuprofeta. 10Lwa khwali nu khwakhamenyayo khumatukhu manyishi, Muprofeti Agabu yatukhaho narula mu lusomo lwa Yudeya. 11Yatukha wa khwali nu khuli, navukula lukhanda lwa Paulu, navoha makhono keke nende vilenje vievie, navoola, “Roho Mutakatifu avoolanga, ‘Nindi Vayahudi va Yerusalemi valiitsa khuvoha mwene lukhanda yulu; nu khumuhila khu vandu vi tsimbia tsindi.’ ”

12Lwa khwahulila ndio, khutsi nende vandu va khwaliho khwakaya Paulu avuli khutikulukha Yerusalemi. 13Khulwa yako, Paulu yachipa, “Ni shina shia mukholanga, lwa mulilanga nu mumbelelitsa mwoyo kwanje? Nzirecheshe, shikali khuvohwa mucheela mwonyene tawe; navutswa khali khukhutsila mu Yerusalemi, shichila lira liu Mwami Yesu Kristo.”

14Lwa khwakhaywa khuhombelitsa Paulu, khwatsililila khuhonjela vutswa; nikhali khwamuvoolela, “Lienya liu Mwami khutukha live nilikholekhanga.”

15Lwa khwali nu khwakhavayo khumatukhu manyishi, khwarulayo nu khutsia Yerusalemi. 16Valala khu vasuuvili vi litaala lia Kaisaria, varulayo na khutsi, nivakhuhila mu inzu yu mundu walaangwangwa Munasoni, warulanga mushisulu shia Saipurasi; khwenyekhanga khumenye nu mundu mwenoyo. Yali mulala khu vasuuvili vali vu khuraanga.

Paulu Yacheniha Yakobo

17Lwa khwatukha mu Yerusalemi, vasuuvili vakhwinjilitsa nu vuyaanzi. 18Litukhu lialondakhu, Paulu yatsia na khutsi khutsia khulola Yakobo; khali vasakhulu voosi valiho. 19Lwa Paulu yavaha milembe, yavavoolela shia shindu shiosi shia Nyasaye yali nakholi mu vandu vi tsimbia tsindi khuvirila khu muhinzilu kwekwe. 20Lwa vahulila ndio, vitsominya Nyasaye. Vavoolela Paulu, “Musuuvili washieru, unyala khulola mwene vasuuvili tsiheelefu vamenyayo mu Vayahudi, khandi khuli voosi vali ni lienya liu khulonda malako. 21Vamali khuvoolelwa makhuva khulondokhana khu yivi ndi wechitsanga Vayahudi voosi vamenyanga mu vandu vi tsimbia tsindi valeshe khulonda Malako ka Musa; khandi uvavoolele vavuli khusheva vaana vavo inoho khulonda miima chieru. 22Khulwa yako, ni shina shia khunyala khukhola? Ni kilikali, valiitsa khuhulila likhuva ndi umali khutukha. 23Khutukha mukhole ka khumuvoolela. Khuli na vandu vane hanu vamali khwisuuha. 24Vukula vandu yava utsi navo khukhola mulukha ku khwitakasa; khandi uvarunjili mirungu chienyekhanga, khu vaveche liswi liavo. Niiva valiitsa khukhola ndio, shia mundu wosi aliitsa khumanya ndi vindu via vavoolelwa khulondokhana khu yivi shivili viatoto tawe; navutswa ndi yivi mwene wumenyanga khulondokhana khu Malako ka Musa. 25Navutswa shichila vandu vi tsimbia tsindi vali nivasuuvila, khumali khuvarumila ibarwa yu khuvavoolela vavuli khulia shiukhulia shiakholelwa musango khu misambwa inoho khung'wa masahi inoho khulia muruku kwosi kwisunga, khandi ndi valekhane nu vuheeyi.”

26Litukhu lialondakhu, Paulu yavukula vandu venavo, nakhola mulukha ku khwitakasa navo. Yasimukha natsia mu Litempeli, khuvavoolela lwa matukhu ku khwitakasa kaliitsa khuvwa, khandi lwa shihanwa shilitsa khuhaanwa khu shia mulala khuvo.

Khuli Paulu Yakumilwa mu Litempeli

27Lwa matukhu saba kenako kali nikali himbi khuvwa, valala khu Vayahudi vali nivarula mu lusomo lwa Asia valola Paulu mu Litempeli. Vavwanyinya mulilu mu shituma shia vandu voosi, nivakumila Paulu. 28Valaanjilila nivavoola, “Munyi Vaisraeli, khukhonyi! Uyu neye mundu utsitsanga shia havundu hosi, niyechitsa vandu khuhinganyinya Vaisraeli, Malako ka Musa, nende Litempeli yili. Khumeeta khu kenako, wayinjilitsa vandu vi tsimbia tsindi mu Litempeli khandi wamala khwononyinya Havundu Hatakatifu hanu!” 29Vavoola ndio, shichila vali valoli Trofima wi litaala lia Efeso nali na Paulu mu litaala lienelo. Vali ninganakani ndi Paulu anyala khuva wamwinjilitsakhu mu Litempeli. 30Shileeche shiatsililila khulanda shia havundu hosi mu litaala lienelo. Vandu voosi vilukhachila khulala, nivatsia khukumila Paulu. Vamukhwesesa khurula mu Litempeli, ma miliango chi Litempeli nichikalwa vwangu. 31Lwa vali nivachelitsanga khuli vamwiira, mwimilili wa vasikali va Varoma yanyola likhuva ndi shileeche shili mu Yerusalemi. 32Yavukula vwangu vimilili va vasikali nende vasikali, nivatsia vwangu mu shituma shia vandu. Lwa vandu vamulola nali na vasikali, valekha khurumula Paulu. 33Mwimilili wa vasikali mwenoyo yatsia nakumila Paulu; navoola avohwi ni minyololo chivili. Manareeva, “Mundu uyu ni viina, khandi ni shina shiakholi?” 34Vandu valala mu shituma valaanjilila shilala na vandi lukanu. Shileeche shialiho, khali nikalomba mwimilili wa vasikali khuvula khumanya kali nikakholeshe. Khulwa yako, yavoolela vandu veve vahili Paulu havundu ha vasikali vamenyanga. 35Lwa Paulu yatukha khu viko viu khwinjilaho, vasikali valala khuvo vamuchinga; shichila shituma shia vandu vali valulu muno. 36Voosi vamulondanga nivalaanjilila, nivavoola, “Mumwiiri!”

Paulu Yalomoloma Khwishinga

37Lwa vasikali vali nivali himbi khuhila Paulu havundu ha vasikali vamenyanga, Paulu yareeva mwimilili wa vasikali, “Unyala khumbakhu vwiyangu khuvoolelekhu likhuva?”

Mwimilili wa vasikali yamureeva, “Toto, unyala khuva wamanya Luguriki? 38Niiva ni kario, shiali nivi Mumisri wraanjitsa shileeche shia mahingani mumatukhu kavira, niyimilila makahidi tsiheelefu tsine khutsia khwinjila mu shiangalangwi?”

39Paulu yamuchipa, “Inzi ndi Muyahudi, wivulwa mu litaala lia Tarisa mu lusomo lwa Kilikia; nindi mundu wi litaala liamanyikhana muno. Nuyaanza mbe vwiyangu vu khulomoloma khu vandu yava.”

40Mwimilili wa vasikali mwenoyo yamuhuchilila. Khulwa yako, Paulu yasinjila khu viko viu khwinjilaho, nachelela shituma shia vandu mukhono vahonjele. Lwa voosi vahonjela, Paulu yalomoloma khuvo Muluhebrania, navoola,

Currently Selected:

VIKHOLWA 21: LLLCATHOLIC

Highlight

Copy