VIKHOLWA 20

Paulu Yavirila Mekadonia nende Akaya

1Lwa shileeche shiali nishiakhavwa, Paulu yalaanga halala veechi. Namali khuvavoolela makhuva ku khuvatinyilitsa, nu khuvaha milembe chiu khulolelana malahi, yasimukha natsia Mekadonia. 2Namali khukhalakanyila shia havundu hosi mu tsisomo tsienetso, khandi niyakhatinyilitsa vandu na makhuva manyishi, yatukha mu litaala lia Akaya, 3wa yamenya khumieli chivaka. Yali nali himbi khwambukha khutsia Siria, lwa yavoolelwa makhuva khulondokhana khuli Vayahudi vali nivaloshitsi khumwiira. Yakanakana khukalukha khuvirila Mekadonia. 4Mundu walaangwangwa Sopateri, wali mwana wa Piria wi litaala lia Bereha, Arisitarika nende Sekunda vi litaala lia Tesalonike, Gayo wi litaala lia Deribe; Tukikasi nende Trufima, vu lusomo lwa Asia; nende Timoteo navo vatsia naye. 5Vandu venavo varaanga khwimila imbeli weru, nivakhulindila mu litaala lia Turoha. 6Navutswa khwambukha nu khurula mu litaala lia Filipi, lwa Mulukha Kukhulia Mukati Kwalombwa Vuchila Mamela kwali nu kuvwele. Matukhu karanu nikakhavira, khwiyunga navo mu litaala lia Turoha, wa khwamenya khulisitsa lilala.

Paulu Yacheniha Litaala lia Turoha Lukhumalilikha

7Khulitukhu lia Jumamosi khulukolovo, khwakana nu khulia shiukhulia shia halala. Paulu yalomoloma khu vandu, khandi natsililila khulomoloma khutukha hakari mu vutukhu, shichila yali natsitsanga khurula mu litaala lienelo khulitukhu lilondakhu. 8Tsitaaha tsinyishi tsiakha vulavu munzu yikolofa ya khwakanilamu. 9Musatsa muvukha walaangwangwa Ahutuka, yali wikhale mu litirisha. Yaraanga khurenjetsa, lwa Paulu yalomoloma khuluhono. Lwa tsindolo tsiamukumila, yakulukha hasi khuvirila mu litirisha khurula mukolofa ya khavaka; manivamunyola umali khukhutsa. 10Navutswa Paulu yikha hasi namukhumbelela, navoola, “Muvuli khuheenda mwoyo, shichila ashili mwoyo!” 11Paulu yakalukha mukolofa, nameka mukati nalia. Lwa yalomoloma navo khuluhono, khali khutukha mu mavwevwe, yarulaho. 12Vavukula musatsa muvukha mwenoyo, nivamuhila ingo nashili mwoyo, manivaleminywa muno mu mioyo.

Paulu Yarula Turoha Natsia Mileta

13Navutswa lwa khwisuundakhu hambeli khu imeli, khwambukha nu khutsia mu litaala lia Asosi, wa khwaninyinya Paulu mu imeli. Yali ukhuvoolele khukhole ndio, shichila yenyanga khutsiayo khu vilenje. 14Lwa Paulu yakhunyola nu khuli Asosi, khwasinjilitsa imeli naninamu nu khutukha mu litaala lia Mitulene. 15Litukhu lialondakhu, khwambukha nu khurulayo; nu khutukha mu litaala lia Kihosi. Litukhu lia khavili lialondakhu, khwambukha nu khutsia havundu halaangwalaangwa Samosi, nu khutukha mu litaala lia Mileta khulitukhu lia khavaka. 16Paulu yali ninganakani yu khutsililila nu luchendo lwelwe, vuchila khusinjilakhu mu litaala lia Efeso, khwenya khuvula khumalila vwiyangu vwevwe mu lusomo lwa Asia. Yali ni lienya liu khutukha vwangu Yerusalemi, nikanyalikha khulitukhu lia Pentekosti.

Paulu Yalomoloma khu Vasakhulu mu Efeso Lukhumalilikha

17Lwa Paulu yali niyakharula mu litaala lia Mileta, yarumana likhuva mu litaala lia Efeso, niyenyanga vakane na vasakhulu vi likanisa. 18Lwa vatukha khuye, yavavoolela, “Munyi vene mwamanya khuli lwa namenyanga na munyi, khuraanjila khulitukhu liu khuraanga lia natukha mu lusomo lwa Asia. 19Narumishilanga Mwami nu mwoyo ku vwichehitsi nu khulila, khali niiva nikhutsila mu machelitso khulondokhana khuli lwa Vayahudi vali nivaloshitsi khunziira. 20Mwamanya ndi shinamuvisa khumuvoolela makhuva kali nu vukhonyi khu munyi, lwa nilwatsanga khandi ninzechitsa vandu havulavu nende mu tsingo tsienyu tawe. 21Navoolela Vayahudi nende vandu vi tsimbia tsindi, vuchila khuvisa ndi vikanile khurula mu vwoni vwavo khu Nyasaye khandi vasuuvili mu Mwami weru Yesu Kristo. 22Nunundi, Roho Mutakatifu anzimililanga khutsia Yerusalemi; navutswa shimanyikhu shitsitsanga khungwilayo tawe. 23Namanya ndi shia mu litaala likali liosi, Roho Mutakatifu yanjelihitsa ndi icheela nende manyakhano ka nindilila. 24Navutswa shikali mbukulanga vulamu vwanje khuva ni shindu shikali tawe; nyenyanga vutswa khurweshitsa muhinzilu kwanje, khandi male vutswa muhinzilu ku Mwami Yesu yamba khole, khwilwatsa Ivanjeli yi tsimbavasi tsia Nyasaye.

25“Khali ndio, manyi vulahi ndi mundu avulakhuho mu munyi voosi va nachendelela ninzilwatsanga Vwami vwa Nyasaye, uliitsa khandi khulolakhu inzi. 26Khulwa yako, nyenyanga nunundi khumuvoolela havulavu ndi niiva mulala khu munyi yakhakori, muvuli khumbukula khuli ninzi wachila nikakholekha; 27shichila shinamuvisa khumwilwatsila lienya lia Nyasaye liosi tawe. 28Mwiheenze vene vulahi; mulinde shiayo shiosi, shia Roho Mutakatifu yamuha khusinjilila. Muve vayi vi likanisa lia Nyasaye, lia mwene yakhola khuva lielie, khuvirila khu masahi ku Mwana wewe wonyene. 29Manyi ndi lwa mba ninakharulaho, vihulukhu vilulu viliitsa khwinjila mu munyi, navio viliitsa khusalanyinya shiayo. 30Khali valala khu munyi vene valiitsa khukoyanyinya katoto, nivavoolela vasuuvili vuvehi khu vavalonde. 31Khulwa yako, muve vacheli, khandi mwitsushitse khumanya ndi nali namenya ninzechitsanga munyi khumihika chivaka, vutukhu nu mbasu, nindilanga miliika.

32“Musaalilanga nunundi khu Nyasaye amulinde, khandi munyole likhuva li tsimbavasi tsietsie, lili ni tsingulu tsiu khumumbakha nu khumuha tsikhaavi tsia Nyasaye yenyelanga vandu veve voosi. 33Shikali nikombakhu ifetsa inoho itsahabu inoho inguvu yu mundu wundi tawe. 34Munyi vene mwamanya ndi nakhola muhinzilu na makhono kaanje khunyole shia nyenyanga, khandi shia vashianje venyanga. 35Namumanyinya mu shia shindu shiosi shia nakhola ndi lwa khukhola mihinzilu munjila irio, khutukha khukhonye vandu vateteshele; nu khwitsushitsa makhuva ku Mwami Yesu mwene yavoola, ‘Ali ni ikhaavi mundu uhaananga khuvira khunyola.’ ”

36Lwa Paulu yali namali khulomoloma, yasikama navo voosi, nivasaala. 37Vandu voosi valila, nivamukhumbelela nivamuha milembe chiu khulolelana malahi. 38Vavelelitswa khushila muno, khulondokhana khu ka Paulu yali navooli, ndi valiitsa khuvula khumulolakhu khandi. Khulwa yako, vasimukha nivamuhila mu imeli.

Currently Selected:

VIKHOLWA 20: LLLCATHOLIC

Highlight

Copy