VIKHOLWA 19

Lilwatsa lia Paulu mu Efeso

1Lwa Apolo yali nali mu litaala lia Korinzo, Paulu yakhalakanyila hakari mu lusomo lwenolo, natukha mu litaala lia Efeso, ha yanyola veechi valala. 2Yavareeva, “Toto, lwa mwasuuvila mwanyola Roho Mutakatifu?”

Vamuchipa, “Shikali kario tawe! Khali khushili khuhulilakhu Roho Mutakatifu aliho.”

3Khulwa yako, Paulu yavareeva, “Munyala khuva mwabatiswa khuvirila munjila shina?”

Vamuchipa, “Khuvirila mu libatiswa lia Yohana.”

4Paulu yavoola, “Libatiswa lia Yohana liali liu khwikanila khurula mu vwoni. Yavoolela vandu vasuuvili mu woyo wali niyitsanga inyuma wewe, nakhwo khuvoola, vasuuvili mu Yesu.”

5Lwa vahulila ndio, vabatiswa khuvirila mu lira liu Mwami Yesu. 6Lwa Paulu yali niyakhavikha khuvo makhono keke, Roho Mutakatifu yitsa khuvo; nivaraanga khulomoloma mu tsinomonomo tsindi khandi nivaprofeta. 7Voosi vali himbi likhomi na vavili.

8Paulu yinjila mu lisinagogi; khandi khumieli chivaka yalomoloma khu vandu vuchila khuria. Yahingalitsana mulilomoloma navo, nachelitsa khuvavoolela katoto khulondokhana khu Vwami vwa Nyasaye. 9Navutswa valala khuvo vali vahaaka, khandi vali vayambakhana khusuuvila. Varanga khulomoloma vindu vitamanu khulondokhana khu Injila yu Mwami yamanyinya. Paulu yavukula veechi vandi nivarulaho. Shia litukhu, yahingalitsana mulilomoloma navo munzu ingali ya veechitsilamu vandu ili havundu halaangwangwa Turana. 10Kikholekha kario khumihika chivili; khu khali vandu voosi vu lusomo lwa Asia, vave Vayahudi inoho vandu vi tsimbia tsindi nivahulila likhuva liu Mwami.

Vaana vi Shiyayi va Sikeva

11Nyasaye yakhola viloleshitsu viu khuchenyinya khuvirila khu Paulu. 12Khali vitambaya via makhono nende viambala via yali narumishili viahilwa khu yavo vali nivalwala. Vahona khurula mu vulwale, ma roho mitamanu nichirula muvo. 13Vayahudi valala vachenda chendanga shia havundu hosi, nivakhunga roho mitamanu, vachelitsa khurumishila khandi lira liu Mwami Yesu khukhola ndio. Vavoola, “Khukondeshelanga, ruli khuvirila khu lira lia Yesu, wa Paulu yilwatsanga.” 14Vaana vi shiyayi saba, vu Mukali wa vasalisi voosi wa Vayahudi walaangwangwa Sikeva, vakholanga ndio.

15Litukhu lindi, roho mutamanu ya vavoolela, “Namanya makhuva khulondokhana khu Yesu, khandi khulondokhana khu Paulu; navutswa munyi muli vanga viina?”

16Khulwa yako, mundu wali na roho mutamanu muye, yasila nakwa khuvo navakuura voosi ni tsingulu. Yavarumula tsinguma vutamanu muno nivilukha khurula munzu shekenye. 17Lwa Vayahudi nende Vaguriki vi litaala lia Efeso vahulila ndio, voosi varia; manivahaana vukhumi khu lira liu Mwami Yesu. 18Vanyishi khu vasuuvili vitsayo, niviyama havulavu, khandi nivavoola imbeli wa vandu miima mitamanu chiavo chia vali nivakhola. 19Vandu vanyishi mu vandu vakholanga vukhumu valera vitabu viavo halala, nivavisambila havulavu mu mulilu. Vavalitsa vukuuli vwi vitabu vienevo, nivanyola vutukhanga ifetsa vitonye tsiheelefu makhomi karanu. 20Khulwa yako, likhuva liu Mwami lialanda shia havundu hosi, khandi nilitsililila khuva ni tsingulu.

Shileche mu Litaala lia Efeso

21Lwa vindu yivi viakholekha, Paulu yakanakana mu mwoyo kwekwe khukhalakanyila Mekadonia nende Akaya, khutsia Yerusalemi. Yavoola, “Lwa mba ninakhatsiayo, natsiakhu khandi mu litaala lia Roma.” 22Lwa Paulu yali niyakharuma vakhonyani veve vavili, nivali Timoteo nende Erasito khutsia Mekadonia, ye mwene nashitsililila khumenyakhu matukhu mati mu lusomo lwa Asia.

23Mumatukhu kenako, khwali ni shileeche shinyishi mu litaala lia Efeso, shichila Injila yu Mwami yamanyinya. 24Mwiraanyi wi vivia walaangwangwa Demeturio yalombanga vimanyilu vinyishi vi litempeli viu musambwa kwa Aretemi khurula khu ifetsa; khandi muhinzilu kwekwe kwalerela ye mwene nende vahinzili veve vukhala. 25Yavalaanga halala na vahinzili vandi vakholanga muhinzilu khuli kwekwe; navavoolela, “Vandu munyi, mwamanya khunyolanga miandu chieru khurula khu muhinzilu yuku. 26Munyi vene muloli nunundi khandi muhulile makhuva ku mundu Paulu uyu akholanga, shikali mu litaala lia Efeso lionyene tawe; navutswa shia havundu hosi mu lusomo lwa Asia. Avoolelanga vandu ndi vanyasaye va vandu valomba shivali vanyasaye tawe. Vandu vanyishi vali khuluveka lwelwe. 27Vutiinyu vwa khuli navwo vuli ndi muhinzilu kweru kunyala khunyola lira litamanu. Shikali ni kenako konyene tawe, navutswa vutiinyu vundi vwa khuli navwo vuli ndi litempeli liu musambwa mukali kwa Aretemi liliitsa khuvula vukhonyi, khandi vukhumi vu musambwa kwenoko vuliitsa khwononyinywa -- musambwa kwa vandu voosi vasaalakhu mu lusomo lwa Asia khandi shia havundu hosi mu shivala!”

28Lwa vandu venavo vahulila makhuva kenako, vali nu vurima. Valaanjilila nivavoola, “Aretemi wi litaala lia Efeso, wayitsula tsingulu tsinyishi!” 29Vukoyanu vwalanda shia havundu hosi mu litaala lia Efeso. Vakumila Gayo nende Arisitarika, nivali Vamekadonia vavili vachendanga na Paulu, nivavahila mushikuri shi mivaayo. 30Paulu yenya atsi khwinjila mu shituma shia vandu, navutswa veechi vamwikalila. 31Vimilili valala vu lusomo lwa Asia, nivali valina va Paulu, vamurumila likhuva liu khumukaya khwinjila mushikuri shi mivaayo. 32Navutswa vandu valala valaanjililanga shilala, na vandi lukanu; ma shikhaalo nishikoyana; shichila valala khuvo shivali nivamanyi shivune shichilanga nivakana halala tawe. 33Vandu valala vamalila, nivavoola ndi Alekisanda neye wachila vindu vienevo nivikholekha; lwa Vayahudi vamusinjilitsa imbeli wavo. Alekisanda yachela mukhono kwekwe mu vandu vahonjele, navoola makhuva keke mwene ku khwishinga. 34Navutswa lwa vamanyishitsa ndi nu Muyahudi, voosi valaanjilila shilala khu tsisaa tsivili, nivavoola, “Aretemi wi litaala lia Efeso wayitsula tsingulu tsinyishi!”

35Navutswa muhandichi wi litaala yavoolela vandu vahonjele. Yavoola, “Munyi Vaefeso vashianje, ni viina uli mu munyi wakhamanya ndi litaala lia Efeso nalio li litempeli lilimu nu musambwa kwi tsingulu tsinyishi kwa Aretemi nende musambwa kwakulukha nu kurula mwikulu. 36Mundu avulakhuho unyala khwambakhana vindu yivi. Khulwa yako, muhonjele mamuvuli khukholakhu shindu shiosi shitamanu. 37Muleri vandu yava hanu, khali niiva shivahuuvi mu matempeli inoho khunyeka nyasaye weru wi shikhali tawe. 38Niiva Demeturio nende vahinzili veshie valoli vutamanu khu mundu wosi, shiina shili havulavu nende vwamihi vwi tsisomo; vanyala khuyaalilwa iweneyo. 39Navutswa niiva muli ni likhuva lindi likali khuvira lienelo liu khukholelwa, linyala khuviritsilwa havulavu mu shikhaalo shia vandu. 40Khulondokhana khu kakholeshe nunundi, khunyala khuyaalwa khukholi shileeche. Khuvulakhu shivune shia khunyala khuhaana khwishinga khu vukoyanu vwenovo.” 41Niyakhamala khuvoola ndio, yaseevula shikhaalo shia vandu khurulaho.

Currently Selected:

VIKHOLWA 19: LLLCATHOLIC

Highlight

Copy