VIKHOLWA 18

Lilwatsa lia Paulu mu Litaala lia Korinzo

1Nikamali khwikholekha, Paulu yarula mu litaala lia Atseni natsia mu litaala lia Korinzo. 2Paulu yanyolayo Muyahudi walaangwangwa Akwila, wivulwa mu litaala lia Pontia, wali naruli mumatukhu kenako mu shivala shia Italia nu mukhali wewe Prisila; shichila Mwami wa Roma walaangwangwa Kilaudia yali wahaana lilako ndi Vayahudi voosi varuli mu litaala lia Roma. Paulu yasimukha natsia khuvalola; 3khandi shichila yali mulombi wa maheemo khuli vo, yamenyayo nakholanga navo muhinzilu. 4Shia litukhu li Lisabato, Paulu yahangalitsana mulilomoloma navo mu lisinagogi, khandi nachelitsa khukhola Vayahudi nende Vaguriki khusuuvila.

5Lwa Sila nende Timoteo vatukhaho nivakharula Mekadonia, Paulu yamala vwiyangu vwevwe vwosi khwilwatsa likhuva; nachelitsa khuvoolela Vayahudi ndi Yesu neye Masiha. 6Lwa vamuhinganyinya khandi nivamunyeka, yaleka; manasukuya lukuushi khurula mu inguvu yeye. Yavavoolela, “Niiva mwakora, munyi vene mwivukuli khuva vatamanu khulondokhana khu kenako! Muvuli khumbukula khuli ninzi wakhola ndio. Khuraanjila nunundi, nzitsanga khutsia khu vandu vi tsimbia tsindi.” 7Paulu yarulaho natsia mu inzu yu mundu walaangwangwa Titio Yusita, wasaalanga khu Nyasaye; inzu yeye yali himbi khu lisinagogi. 8Navutswa mwimilili wi lisinagogi walaangwangwa Krisipa, yasuuvila mu Mwami, halala na vandu voosi vi inzu yeye. Vakorinzo vahulila milwatso ka Paulu, nivabatiswa.

9Vutukhu vundi, Mwami Nyasaye yavoolela Paulu mu malolo, “Lekha khuria; navutswa utsililile khulomoloma vuchila khuhonjela, 10shichila ndi halala nivi. Mundu avulakhuho utsitsanga khukhusalilitsa, shichila vandu vanyishi mu litaala linu ni vaanje.” 11Khulwa yako, Paulu yamenyayo khumuhika mulala ni mieli sita, niyechitsanga vandu likhuva lia Nyasaye.

12Navutswa lwa Galiho yamihitswa khuva gavana wa Varoma mu lusomo lwa Akaya, Vayahudi valaangana halala, nivakumila Paulu nivamuhila mushiina. 13Vavoola, “Khuyaalanga mundu uyu shichila achelitsanga khuvoolela vandu vasaale khu Nyasaye munjila indamanu ya malako kambakhana.”

14Navutswa lwa Paulu yali nali himbi khulomoloma, Galiho yavoolela Vayahudi, “Munyi Vayahudi, mumbulishitsi! Niiva ni kilikali, muyaalanga mundu uyu shichila vindu vitamanu inoho vutamanu vundi vutswa vwa yakhola, nyala khumuhulishitsa. 15Navutswa lwa lili likhuva khulondokhana khu makhuva inoho mira nende malako kenyu vene, munyi vene mulaviritsa kenako. Shinyala khuva mukhalachi wi vindu khuli vienevo tawe!” 16Galiho yavakhunga khurula mushiina. 17Voosi vakumila Sosizene, wali nali mwimilili wi lisinagogi, nivamukhuvila imbeli wi shiina. Navutswa Galiho shiyaheenditswa mwoyo tawe.

Paulu Yakalukha Antiokia

18Paulu yatsililila khumenya mu litaala lia Korinzo halala na vasuuvili vandi khumatukhu manyishi. Yavalekha, niyambukha na Prisila nende Akwila khutsia mu shivala shia Siria. Nashili khwambukha khurula mu litaala lia Kengureha, yavekwa liswi lielie khulondokhana khuli lwa yali niyisuuhi. 19Lwa vatukha mu litaala lia Efeso, Paulu yalekhayo Prisila nende Akwila; navutswa yinjila mu lisinagogi khuhangalitsana mulilomoloma na Vayahudi. 20Lwa vamureeva atsililile khumenya navo khumatukhu manyishi, Paulu yambakhana. 21Navutswa lwa yali navalekhanga, yavavoolela, “Niiva nu khulondokhana khu lienya lia Nyasaye, nakalukha khumulola.” Khulwa yako, Paulu yambukha narula mu litaala lia Efeso.

22Imeli yatukha mu litaala lia Kaisaria, ma Paulu natikulukha Yerusalemi khutsia khuha vandu vi likanisa milembe. Yakholomokha natsia mu litaala lia Antiokia. 23Lwa Paulu yamenyayo khumatukhu mati, yarulayo navirila shia havundu hosi mu lusomo lwa Galatia nende Firigia, natinyilitsanga vasuuvili voosi.

Apolo Yilwatsa Efeso nende Korinzo

24Mumatukhu kenako, Muyahudi walaangwangwa Apolo, wali niyivulwa mu litaala lia Alekisandaria yatukha mu litaala lia Efeso. Yali mulomolomi mulahi, khandi yali wamanya vulahi vwene Mahandiko Matakatifu. 25Yali wayechitswa mu Injila yu Mwami yamanyinya; khandi yilwatsa ni tsingulu tsinyishi; maniyechitsa makhuva katoto khulondokhana khu Yesu. Navutswa yali wamanya makhuva khulondokhana khu libatisa lia Yohana lionyene. 26Apolo yaraanga khulomoloma mu lisinagogi vuchila khuria; navutswa lwa Prisila nende Akwila vamuhulila, vamuvukula nivamuhila haluveka, nivamuvoolela vulahi vwene makhuva khulondokhana khu Injila ya Nyasaye yamanyinya. 27Lwa Apolo yenya khwambukha khutsia mu litaala lia Akaya, vasuuvili vamutinyilitsa, nivahandika khu veechi vamenyayo vamwinjilitsi. Lwa Apolo yatukhayo yali nu vukhonyi muno khu yavo vali nivasuuvili khuvirila mu tsimbavasi tsia Nyasaye; 28khandi shichila lihangalitsana lielie mulilomoloma havulavu, yakuura Vayahudi, niyivaala khurula mu Mahandiko Matakatifu ndi Yesu neye Masiha.

Currently Selected:

VIKHOLWA 18: LLLCATHOLIC

Highlight

Copy