VIKHOLWA 17

Paulu nende Veshie Vanyashitswa Tesalonike

1Lwa Paulu nende Sila vali nivamali khukhalakanyila mu mataala ka Amufipoli nende Apolonia, vatukha mu litaala lia Tesalonike, mwa lisinagogi lia Vayahudi liali nilili. 2Paulu yinjila mu lisinagogi, khulondokhana khu mwiima kwekwe kwa shia khase khosi, khandi khumatukhu kavaka ki Lisabato yareevana navo mulilomoloma, narumishalanga Mahandiko Matakatifu, 3navivaalila nu khuvamanyinya ndi ni kilikali Masiha yali utushili khunyakhana nu khwisimukha khurula mu likhutsa. Yavoola, “Yesu, wa mwilwatsilanga uyu neye Masiha.” 4Vayahudi valala khuvo vahuchilila niviyunga na Paulu nende Sila. Khali vimilili vanyishi va vandu vakhali nende Vaguriki vamanya nivasaala khu Nyasaye.

5Navutswa Vayahudi valala vavalolela imbotokha; nivatsia khulera vandu vali ni miima mitamanu khurula musokoni, khandi nivalomba shituma; nivaraanga shileeche shiu khulera vuyookanu mu litaala likali. Vasimukha nivatsia khuseera inzu ya Yasoni, nivakhavanga Paulu nende Sila, khuvalera khu shituma shia vandu voosi. 6Navutswa lwa vakhaywa khuvanyola, vakhwesesa Yasoni nende vasuuvili valala, khuvahila imbeli wa vimilili vi litaala likali. Valanjilila, nivavoola, “Vandu yava vakhulerele vutiinyu shia havundu hosi! Nunundi vamali khwitsa mu litaala likali lieru; 7khandi Yasoni umali khuvinjilitsa munzu mwemwe. Valechelitsanga malako ku Mwami wa Roma, nivavoola ndi khuliho nu mwami wundi ulaangwangwa Yesu.” 8Lwa vahulila ndio, vimilili vi litaala likali halala ni shituma shia vandu vaheenditswa mwoyo. 9Yasoni nende veshie varunga tsisenti, tsia vali nivavooli vave ni varunganga, khulu khuvohololwa. Nalwo lwa vahuchililwa khurulaho.

Vandu Vanyishi mu Bereha Vasuuvila Paulu

10Lwa vutukhu vwali nu vwakhatukha, vasuuvili varuma Paulu nende Sila khutsia mu litaala lia Bereha. Lwa vatukhayo, vinjila mu lisinagogi lia Vayahudi. 11Vandu vi litaala lia Bereha vali vahulile likhuva khushila muno khuvira vandu vi litaala lia Tesalonike, shichila vahulishitsa likhuva nu mwoyo mulala. Vali vamenya nivasomanga Mahandiko Matakatifu shia litukhu, khulola niiva ka Paulu yilwatsanga ni katoto. 12Vandu vanyishi khuvo vasuuvila; khali vakhali vanyishi Vaguriki vali nivaheelwa luyali muno, halala na vasatsa Vaguriki vanyishi vasuuvila. 13Navutswa lwa Vayahudi vi litaala lia Tesalonike vahulila ndi Paulu yilwatsanga likhuva lia Nyasaye mu litaala lia Bereha khandi, vasimukha nivatsiayo, khukhola shileeche nu khuvwanyinya mulilu mu shituma shia vandu. 14Nalwo lwa vasuuvili varuma Paulu khutsia vwangu khuluchinga lwi inyanza; navutswa Sila nende Timoteo varikala mu litaala lia Bereha. 15Vandu vaheleshitsa Paulu nivamutushitsa mu litaala lia Atseni. Varumwa ni likhuva liu khulaanga Sila nende Timoteo khwitsa vwangu muno khwiyunga naye.

Paulu Yacheniha Litaala lia Atseni

16Lwa Paulu yali nalindililanga Sila nende Timoteo mu litaala lia Atseni, yikosa mu mwoyo kwekwe, lwa yalola misambwa chia yitsula mu litaala lienelo. 17Khulwa yako, yahingalitsana mulilomoloma mu lisinagogi na Vayahudi nende Vaguriki vasaalanga khu Nyasaye, khali musokoni shia litukhu na vandu vanyolekhamu. 18Valala khu veechitsi vechela Filosofia khulondokhana khu mechitso ka Epikuria nende Sitoiki, vahangalitsana khandi mulilomoloma na Paulu. Valala khuvo vareeva, “Ni shina shiu mundu washila khwilomolominya uyu achelitsanga khuvoola?”

Valala vachipa, “Alolekhanga khuli mwilwatsi wilwatsanga makhuva khulondokhana khu vanyasaye va vandu vi tsimbia tsindi.” Vavoola ndio, shichila Paulu yilwatsa makhuva khulondokhana khu Yesu, khandi khuli yisimushitswa khurula mu likhutsa. 19Khulwa yako, vavukula Paulu, nivamuhila mu shikhaalo shia Areopaga #17:19 Areopaga: Havundu ha vandu vi shikhaalo vikhalanga khuyaala nu khuviritsa makhuva kavo., nivamureeva, “Khwenyanga khumanya ni liechitso shina licheni lia wechitsanga yili? 20Vindu vilala via khuhulilanga nuvoola ni vicheni khu khutsi; khandi khwenyanga khumanya makhuva khulondokhana khu vindu vienevo.” 21Vandu voosi vi litaala lia Atseni nende vacheni vamenyayo vamalila vwiyangu vwavo khwilwatsa nu khuhulishitsa makhuva macheni.

22Paulu yasinjila imbeli wi shikhaalo shia Areopaga navoola, “Vandu vi litaala lia Atseni! Mali khulola ndi mu limenya lienyu liosi, mwamanya shia shindu shiosi khulondokhana khu idini. 23Lwa nachenda nikhalakanyila shia havundu hosi mu litaala likali lienyu, khandi nimbenzishitsa vindu via musaalakhu, nanyola vwaali vwali nu vwahandikwakhu: ‘Khu Nyasaye wa khwakorwa.’ Khulwa yako, woyo wamusaalakhu, khali niiva mwamukorwa, neye wa mwilwatsilanga nunundi. 24Nyasaye, walomba shivala nende shindu shiosi shilimu, neye Mwami wu mwikulu nende lilova; shianyala khumenya mu mateempeli ka vandu vumbakha tawe. 25Shiukhunyala khumukholela muhinzilu khwanyole shia yikombanga aheelwi tawe; shichila ye mwene neye uheetsanga shia mundu wosi vulamu, miuya chiu khwesesa khandi shia shindu shiosi. 26Yalomba khurula khu mundu mulala vandu vi tsimbia tsiosi mu shivala, khu vamenye shia havundu hosi khulilova. Wamanya khale matukhu ka venyekhanga khumenya, khandi havundu ha valiitsa khuva nivamenyanga. 27Nyasaye yakhola ndio, khu vandu vi tsimbia tsienetso vamukhave; khandi haundi vamunyole khuli vikombanga khumumanya. Khali ndio, Nyasaye shiali ihale wene khurula khu shia mulala khu khutsi tawe; 28khuli mundu wundi yavoola,

‘Khuli mwoyo, khuchendanga khandi khuliho khuvirila muye.’

Kali vutswa khuli valala khu vahandichi venyu vi tsinyimbo vavoola,

‘Khali khutsi khuli vaana veve.’

29Lwa khuli vaana va Nyasaye, khuvuli khukanakana ndi liiva lia Nyasaye lili khuli itsahabu inoho ifetsa inoho lichina inoho shimanyilu khuli shiu mundu yalomba ni tsinganakani tsietsie. 30Nyasaye yikhola khuli wakorwakhu shindu shiosi mumatukhu ka vandu valolekhanga khuva vamukorwa. Navutswa nunundi yenyanga shia mundu wosi uli shia havundu hosi, yikanile khurula mu vwoni vwevwe; 31shichila waviritsa khale litukhu lialiitsa khukhalachila shia mundu wosi, mu shivala munjila yu vulunji khuvirila mu mundu wa yarovola. Neye wahaana shimanyilu khu shia mundu wosi lwa yisimushitsa mundu mwenoyo khurula mu likhutsa.”

32Lwa vahulila Paulu nalomolomanga makhuva khulondokhana khuli vandu vakhutsa valiitsa khwisimushitswa khurula mu likhutsa, valala khuvo vamukholela shihenye henye. Navutswa vandi vavoola, “Khwenyanga ukalushili khulomoloma makhuva khulondokhana khu likhuva lienelo.” 33Khulwa yako, Paulu yarula mu shikhaalo shia vandu venavo. 34Navutswa vandu valala viyunga naye nivasuuvila. Mulala khu vandu venavo yali Dionisiu, mulala khu vandu vi shikhaalo shia Areopaga, halala nu mukhali mulala walaangwangwa Damara, nende vandu vandi va vali nivaliho navo.

Currently Selected:

VIKHOLWA 17: LLLCATHOLIC

Highlight

Copy