VIKHOLWA 16

Timoteo Yatsia na Paulu nende Sila

1Paulu yatsililila nu luchendo lwelwe natukha mu mataala ka Deribe nende Lusitura, ha Mukristayo walaangwangwa Timoteo yali niyamenya. Mama wa Timoteo yali musuuvili khandi Muyahudi; navutswa tata wewe yali Muguriki. 2Vasuuvili voosi mu mataala ka Lusitura nende Ikoniamu valomolomanga vulahi khu Timoteo. 3Paulu yenya khuvukula Timoteo khutsia naye. Yamuvukula nahaana lilako ashevwi, shichila Vayahudi voosi mu mataala kenako vali vamanya ndi tata wa Timoteo yali Muguriki. 4Lwa vachenda chenda mu shia litaala, vavoolela vasuuvili makhuva ka varumwa nende vasakhulu vakanila halala mu Yerusalemi vali nivaviritsi. 5Khulwa yako, vandu va makanisa vatinyilitswa mu lisuuvila; khandi shia litukhu vatsililila khumeetekha mu vunyishi.

Malolo ka Paulu mu Litaala lia Turoha

6Paulu nende veshie vachenda nivakhalakanyila mu mataala ka Firigia nende Galatia, shichila Roho Mutakatifu yavikalila khwilwatsakhu likhuva liosi mu lusomo lwa Asia. 7Lwa vali nivakhatukha khuluveka lundi lwi litaala lia Misia, vachelitsa khwinjila mu lusomo lwa Bitsinia; navutswa Roho wa Yesu yavikalila khwinjilamu. 8Khulwa yako, vachenda nivavira mu litaala lia Misia, nivakholomokha khutsia khutukha mu litaala lia Turoha. 9Mu vutukhu vwenovo, Paulu yalola malolo ndi mundu wa Mekadonia wusinjile namusayanga nayaanza, “Hamba Mekadonia ukhukhonye!” 10Lwa Paulu yalola malolo kenako, khwachelitsa khwambukha vwangu khutsia Mekadonia, shichila khwali ni lisuuvilitsa ndi Nyasaye wakhulaanga khwilwatse Ivanjeli khu vandu vamenyayo.

Likalukhanyinywa lia Lidia mu Filipi

11Khwambushila mu imeli nu khurula mu litaala lia Turoha nu khutsia vulunji khutukha mu litaala lia Samoturake; khandi khulitukhu lialondakhu nu khutsia mu litaala lia Nehapoli. 12Khwarulaho nu khutsia mukari nu khutukha Filipi, litaala likali liu khuraanga mu Mekadonia; lia Varoma vamihanga khandi. Khwikhalayo khumatukhu manyishi. 13Khwarula mu litaala lienelo khulitukhu li Lisabato, nu khukholomokha khutsia himbi khu muchela, wa khwasuuvilanga khunyala khunyola havundu ha Vayahudi vasaalilanga. Khwikhala nu khulomoloma khu vakhali vali nivivunjelitsiho. 14Mulala khuvo khurula mu litaala lia Tsiatira, walaangwangwa Lidia wasaalanga khu Nyasaye yakhuhulishitsa. Yakuulitsanga tsinguvu tsia sambarau. Mwami yikula mwoyo kwekwe nahulishitsa milwatso ka Paulu. 15Lwa ye mwene nende vandu vi inzu yeye vabatiswa, ya khwinjilitsa hango hehe; navoola, “Numulolanga ni kilikali ndi mundu wasuuvila mu Mwami, hambi mumenyekhu hango hanje.” Yakhuvoolela nu khuyaanza khwinjiliho.

Paulu nende Sila Vavohwa Mucheela mu Filipi

16Litukhu lindi, lwa khwali nu khutsitsanga havundu ha khusaalila, khwakana nu mwana wi shikhana murukwa wali ni tsingulu tsia makhumu; khandi yalerelanga varuchi veve tsisenti tsinyishi khurulana khu muhinzilu ku khuvoola makhuva kaliitsa khwikholekha. 17Mwana wi shikhana mwenoyo yalonda Paulu nende khutsi, nalaanjilila navoola, “Vandu yava ni varumishi va Nyasaye Uli Ikulu khu Viosi! Vamwilwatsilanga makhuva khulondokhana khuli muliitsa khuhonyinywa!” 18Mwana wi shikhana mwenoyo yatsililila khukhola ndio khumatukhu manyishi. Navutswa lukhumalilikha, Paulu yaleka mu mwoyo, niyishevukha nakondeshela litimoni lienelo, navoola, “Khukondeshelanga khuvirila mu lira lia Yesu Kristo, rula muye.” Litimoni lienelo liarula mu mwana wi shikhana mwenoyo isaa yeneyo.

19Navutswa lwa varuchi veve valola ndi vwiyangu vu khunyola tsisenti vumali khuvwa, vakumila Paulu nende Sila. Vavakhwesa nivavahila musokoni imbeli wa vimilili vali nivaliyo. 20Lwa vavahila khu vakhalachi, vavoola, “Vandu yava ni Vayahudi khandi valeranga vutundanu vwi shileeche mu litaala likali lieru. 21Vechitsanga miima chia malako keru, ka khutsi Varoma khulolanga nu vutamanu nu khuhuchilile inoho khulonda.” 22Shituma shia vandu voosi viyunga navo, lwa vinjilila Paulu nende Sila.

Vakhalachi vahaana lilako liu khunavulwa tsunguvu nu khushutwa vivoko. 23Lwa vali nivakhashutwa vululu, vahilwa mucheela; ma musikali wu mucheela navoolelwa avalinde vulahi. 24Lwa musikali wu mucheela yanyola mivaalo kenako, yavahila mukari mwene mucheela, manavoha vilenje viavo hakari mu tsifulemu tsi misala tsinditoho.

25Navutswa himbi mu vutukhu hakari, lwa Paulu nende Sila vali nivasaalanga nivimba tsinyimbo tsiu khwitsominya Nyasaye; vavohe vandi va vahulishitsanga. 26Nonoho lwa shivala shiatechela, ma icheela nitechela misinji chiayo. Miliango chicheela chiosi chikukha, ma minyololo nichikwa hasi khurula khu vavohe voosi vwangu. 27Musikali wu mucheela yavukha; khandi lwa yanyola miliango chicheela chiosi nichikukhi, yakanakana ndi vavohe vamali khwilukha. Khulwa yako, yasomola shivavi shieshie nachelitsa mwene khwenya khwiyiira. 28Navutswa Paulu yalaanjilila nu mwoyo mukali navoola, “Lekha mwene khwisalilitsa! Voosi khuli hanu!”

29Musikali wu mucheela yalaanga vamulerele itaaha, niyinjilamu vwangu. Yakwa ha vilenje via Paulu nende Sila natechelanga. 30Yavahila ilwanyi navareeva, “Vandu munyi, shina shianyala khukhola khumbonyinywi?”

31Paulu nende Sila vamuchipa, “Yivi nende vandu vi inzu yoyo, musuuvile mu Mwami Yesu, muhonyinywi.” 32Paulu nende Sila vilwatsila musikali mwenoyo likhuva liu Mwami, khali khu vandu vandi voosi vali nivamenya munzu mwemwe. 33Musikali mwenoyo yavavukula mu tsisaa tsiu vutukhu tsienetso, manavochitsa makuule kavo. Ye mwene nende vandu vandi voosi vali nivamenya munzu mwemwe vabatiswa vwangu. 34Musikali wu mucheela mwenoyo yavahila munzu mwemwe, navaha shiukhulia. Ye mwene nende vandu vi inzu yeye voosi vali nu vuyaanzi, shichila yali umali khusuuvila mu Nyasaye.

35Litukhu lialondakhu mu mavwevwe, vakhalachi varuma vasikali, nivavoola, “Vohololi vandu yavo.” 36Khulwa yako, musikali wu mucheela yavoolela Paulu, “Vakhalachi vakhurumi khwitsa khumuvoholola khurula mucheela. Munyala khurula mutsi mu milembe.”

37Navutswa Paulu yavoolela vasikali venavo, “Vakhushuta havulavu mu vandu vuchila khukhukhalachila, khali niiva khuli Varoma, khandi nivakhuvoha mucheela. Venyanga khukhulakhula muvwivisi? Shikanyala khwikholekha kario tawe! Leshi vene vakhuhile ilwanyi.”

38Vasikali vavoolela vakhalachi makhuva kenako. Varia, lwa vahulila ndi Paulu nende Sila ni Varoma. 39Khulwa yako, vasimukha nivatsia khuvareeva vusemehwi. Vavarulitsa mucheela, ni vavavoolela varuli mu litaala likali. 40Lwa Paulu nende Sila varula mucheela, vatsia hango ha Lidia. Vakanayo na vasuuvili valala, nivavatinyilitsa. Vasimukha nivarulaho.

Currently Selected:

VIKHOLWA 16: LLLCATHOLIC

Highlight

Copy