VIKHOLWA 15

Shikhaalo mu Yerusalemi

1Navutswa vandu valala varula mu lusomo lwa Yudeya nivaraanga khwechitsa vasuuvili, “Numushili khushevwa khulondokhana khuli Malako ka Musa kavoolanga, shiumunyala khuhonyinywa tawe.” 2Paulu nende Baranaba varaanga khuhangalitsana mulilomoloma, nivareevana mareevo shichila kenako. Khulwa yako, Paulu nende Baranaba, halala na vasuuvili valala varovolwa khutsia Yerusalemi khulola varumwa nende vasakhulu khulondokhana khu lireevo lienelo.

3Likanisa nalio lia varuma khutsia. Lwa vakhalakanyila mu mataala ka Foenike nende Samaria, vavoolela vandu makhuva khulondokhana khuli vandu vi tsimbia tsindi vakalukhanyanyinywa nivasuuvila mu Nyasaye. Makhuva kenako kachila vasuuvili voosi nivava nu vuyaanzi. 4Lwa vatukha Yerusalemi, likanisa, varumwa nende vasakhulu vavinjilitsa; nivavavoolela koosi ka Nyasaye yali navakholele. 5Navutswa valala khu vasuuvili vu mukaanda kwa Vafarisayo vasinjila nivavoola, “Khutukha vandu vi tsimbia tsindi vashevwi, nu khwechitswa khuli vanyala khulonda Malako ka Musa.”

6Varumwa nende vasakhulu vakana halala khureevana lireevo lienelo. 7Nivamali khulomoloma khuluhono khulondokhana khu likhuva lienelo, Petro yasinjila navavoolela, “Vasuuvili vashianje, mwamanya ndi mumatukhu kakhale Nyasaye yandovola khurula mu munyi khwilwatsa Ivanjeli khu vandu vi tsimbia tsindi, khu vahulile nu khusuuvila. 8Nyasaye, wamanya kali mu mwoyo ku mundu, neye umali khuvahuchilila, lwa yavaha Roho Mutakatifu, khuli lwa ya khuha khutsi. 9Shikali yalera vwavukhani hakari heru nende vo tawe. Yavatakasa mu mioyo chiavo khuvirila mu lisuuvila. 10Khulwa yako, shichila shina mwenyanga khuchelitsa Nyasaye, lwa mutiukhanga vasuuvili misiko militoho khu mikongo chiavo, chia vakuuka veru, inoho khali khutsi vene shiukhwali khwanyala khuchinga tawe? 11Khali ndio, khuli ni lisuuvila ndi khuliitsa khuhonyinywa khuvirila mu tsimbavasi tsiu Mwami Yesu, khuli vo khandi valiitsa khuhonyinywa.”

12Vandu vi shikhaalo voosi vahonjela, lwa vahulishitsa Baranaba nende Paulu nivavoolanga makhuva khulondokhana khu viloleshitsu nende vindu viu khuchenyinya, via Nyasaye yakhola mu vandu vi tsimbia tsindi khuvirila khuvo. 13Lwa vali nivamali khulomoloma, Yakobo yavoola, “Vasuuvili vashianje, mumbulishitsi! 14Simoni umali khuvoola vulahi vwene makhuva khulondokhana khuli Nyasaye yamanyinya lukhuraanga wayaanza vandu vi tsimbia tsindi, lwa yarovola khurula muvo vandu veve mwene. 15Makhuva ka vaprofeti valomoloma katsianakananga nako; khuli Mahandiko Matakatifu kavoolanga,

16‘Mwami Nyasaye avoolanga,

Niitsa khukalukha yaka nikamali khuvira,

khandi niitsa khumbakha vuyia inzu ya Daudi yali niyakwa.

Niitsa khuchiumbakha vuyia khuraanjila ha yapomolwa

khuchilomba khusinjila.

17Vandu vandi voosi mu shivala valiitsa khukhava inzi Mwami Nyasaye,

vandu vi tsimbia tsindi voosi va mwene nalaanga khuva vaanje.

18Nindio inzi Mwami Nyasaye mbolanga,

wachila likhuva yili nilimanyikhana khurula khale.’ ”

19Khulwa yako, Yakobo yatsilila navoola, “Khulwanje, ndolanga nu vutamanu khunyashitsa vandu vi tsimbia tsindi vasuuvilanga mu Nyasaye. 20Navutswa khutukha khuhandichi ibarwa yu khuvavoolela vavuli khulia shiukhulia shioneshe, nishimali khuhaanwa khu misambwa. Valeshe khuheeya; khandi valeshe khulia inyuma yu muruku kumali khwisunga inoho khung'wa masahi koosi. 21Malako ka Musa kasomwangwa mu masinagogi shia litukhu li Lisabato khumihika minyishi, khandi makhuva keke ka yilwatswa mu shia litaala.”

Ibarwa khu Vasuuvili vi Tsimbia Tsindi

22Nalwo lwa varumwa nende vasakhulu, halala na vandu vi likanisa liosi, vaviritsa varovole vandu valala khurula muvo vene. Vavaruma na Paulu nende Baranaba khutsia mu litaala lia Antiokia. Varovola Yuda (wali ni lira lindi Barasaba) nende Sila, nivali vandu vavili vimililanga vasuuvili. 23Varulaho ni ibarwa iyi,

“Khutsi, varumwa nende vasakhulu, vasuuvili veshie, khuhaananga milembe khu vasuuvili vashieru vivulwa mu vandu vi tsimbia tsindi vamuli Antiokia, mu shivala shia Siria, nende Kilikia. 24Khuvoolelwi likhuva ndi vandu valala khurula mu shituma shieru vamuvoolele makhuva ku khumanyishitsa nu khukoyanyinya tsinganakani tsienyu, khali niiva vavula mivaalo koosi ka vali nako khurula khu khutsi. 25Khulwa yako, khuviritsi khularovola vandu valala vakhuruma khu munyi, halala na valina veru va khwayaanza Paulu nende Baranaba -- 26nivali vandu virulitsa khali khukhutsa shichila lira liu Mwami Yesu Kristo. 27Khulwa yako, khumurumilanga Yuda nende Sila. Vene valiitsa khumuvoolela makhuva malala mele. 28Roho Mutakatifu, halala na khutsi vene khuhuchilitsane khuleshe khumutiukha musiko kundi kwosi mulitoho khuvira makhuva ku vukhonyi ka khwenyanga mulonde yaka, 29Muleshe khulia shiukhulia shihaanilwi khu misambwa; muleshe khung'wakhu masahi koosi; muleshe khulia inyama yosi yu muruku kumali khwisunga; khandi muleshe khuheeya. Niiva muliitsa khulekhana ni vindu yivi, muliitsa khuva numukholi vulahi. Khumwenyelanga malahi.”

30Varumwa venavo vaseevulwa khurulaho, nivakholomokha khutsia mu litaala lia Antiokia. Lwa valaanga halala shituma shiosi shia vasuuvili, vavaha ibarwa yeneyo. 31Lwa vandu vasoma ibarwa yeneyo, vali nu vuyaanzi vunyishi shichila ya vatinyilitsa. 32Yuda nende Sila, shichila vali vaprofeti vivaalila vasuuvili makhuva manyishi ku khuvatinyilitsa. 33Lwa Paulu nende Sila vali nivakhamenyayo khumatukhu mati, vaseevulwa khutsia mu milembe, navutswa vasuuvili khukalukha khu yavo vali nivavarumi. [ 34Navutswa Sila yalola nu vulahi khurikalayo.]#15:34 Mahandiko kandi kavula luvaso 34.

35Navutswa Paulu nende Baranaba varikala mu litaala lia Antiokia, wa vo vene nende vandi vanyishi veechitsa, khandi nivilwatsa likhuva liu Mwami.

Paulu nende Baranaba Vavukhana

36Matukhu mati nikakhavira, Paulu yavoolela Baranaba, “Chenda khukalushi khulola vasuuvili vashieru mu shia litaali lia khwilwatsamu likhuva liu Mwami; khandi khulole khuli vatsilililanga mu limenya liavo.” 37Baranaba yenya vatsi na Yohana wi lira lindi Mariko; 38navutswa Paulu yalola ndi nu vutamanu khutsia naye, shichila yilukha nivali mu litaala lia Pamufilia; khandi navula khuvakhonya khukhola muhinzilu kwa vakholanga. 39Vahingalitsana vululu mulilomoloma, khali nivavukhana. Baranaba yavukula Mariko manivambukha khutsia Saipurasi; 40navutswa Paulu yarovola Sila, nivarulaho, khali vasuuvili nivamusaalila anyole tsimbavasi tsiu Mwami. 41Nali khu luchendo lwelwe, yakhalakanyila Siria nende Kilikia, natinyilitsanga makanisa.

Currently Selected:

VIKHOLWA 15: LLLCATHOLIC

Highlight

Copy