VIKHOLWA 14

Paulu nende Baranaba Vilwatsa mu Ikoniamu

1Paulu nende Baranaba vatsia, nivinjila mu lisinagogi lia Vayahudi khuli mwiima kwavo kwa shia khase khosi, nivali mu litaala lia Ikoniamu. Vilwatsayo vulahi vwene, nikalomba vandu vanyishi, khali Vayahudi nende vandu vi tsimbia tsindi khusuuvila. 2Navutswa Vayahudi vali nivambakhana khusuuvila vavwana mulilu mu vandu vi tsimbia tsindi khuhinganyinya vasuuvili. 3Khulwa yako, Paulu nende Baranaba vamenyayo khumatukhu manyishi, nivilwatsanga vuchila khuria makhuva khulondokhana khu Mwami, wamanyinya ndi makhuva kavo khulondokhana khu tsimbavasi tsietsie ni katoto; lwa yavaha tsingulu tsiu khukhola viloleshitsu nende vindu viu khuchenyinya. 4Navutswa vandu vi litaala likali vavukhana mu tsinganakani. Valala khuvo vali khuluveka lwa Vayahudi, na vandi nivava khuluveka lwa varumwa.

5Nalwo lwa vandu valala vi tsimbia tsindi nende Vayahudi, halala na vimilili vavo, vavoolelana vatambitse varumwa nu khuvalesa na machina. 6Lwa varumwa vahulila ndio, vilukha nivatsia mu mataala ka Lusitura nende Deribe mu lusomo lwa Likaonia, nende mu lusomo lundi luliho himbi; 7ha vatsililila khwilwatsa Ivanjeli.

Paulu nende Baranaba Vilwatsa mu Lusitura nende Deribe

8Litukhu lindi, khwali nu mundu wivulwa ni yafwokoya vilenje mu litaala lia Lusitura; khandi yali wakhaywa khuchenda. 9Mundu mwenoyo yahulishitsa Paulu lwa yalomolomanga. Lwa Paulu yamuheenza vulunji, nalola ali ni lisuuvila liu khuhona, 10yamuvoolela nu mwoyo mukali, “Sinjila vulunji.” Mundu mwenoyo yaruma ikulu vwangu, naraanga khuchenda hawenaho. 11Lwa vituma via vandu valola ka Paulu yali nakholi, valaanjilila mululomolomo lwa Valukonia, “Vanyasaye vakhuchendelele mu likoondo khuli lia vandu!” 12Vakulikha Baranaba lira Zeusi; na Paulu nivamukulikha lira Herime, shichila yali mulomolomi khushila muno khuvira vandi voosi. 13Musalisi wa nyasaye Zeusi, wi litempeli lielie liali ihale wene khurula mu litaala lienelo, yalera vihuunwa nende mawua mu shilivwa, shichila ye mwene nende vituma via vandu venyanga khukholela varumwa misango.

14Lwa Baranaba nende Paulu vahulila vindu via vandu venyanga khukhola, varandula tsinguvu tsiavo, nivilukhaka nivatsia hakari mu shituma shia vandu nivalaanjilila, 15“Vandu munyi, shichila shina mukholanga yaka? Khutsi khuli vandu vutswa, khuli munyi! Khwitsi hanu khumwilwatsila Ivanjeli khumukalukhanyinya khurula mu vindu vitamanu via mukholanga, mulonde Nyasaye uli mwoyo, waloonga likulu nende lilova, inyanza ni vindu vilimu viosi. 16Mumatukhu kavira, yalekha vandu mu shivala khulonda tsinjila tsiavo vene. 17Navutswa akhukholelanga shia khase khosi vindu vilahi vimanyinyanga ndi aliho: amuheetsanga imbula khurula mwikulu nende viraakwa mumatukhu kenyekhanga; amuheetsanga shiukhulia khandi achila muva nu vuyaanzi vunyishi mu mioyo chienyu.” 18Khali niiva varumwa valomoloma ndio, shituma shia vandu vatsililila khwenya khuvakholela misango.

19Khulwa yako, Vayahudi valala vatsiayo khurula mu litaala lia Antiokia mu lusomo lwa Pisidia khandi mu litaala lia Ikoniamu. Vakaatilitsa shituma shia vandu khwitsa khwiyunga navo, nivalesa Paulu na machina, khandi nivamukhwesesa khurula mu litaala, nivakanakananga ndi umali khukhutsa. 20Lwa vasuuvili vakanila havundu ha yali nali, Paulu yasinjila nakalukha mu litaala lienelo. Litukhu lialondakhu, ye mwene nende Baranaba vasimukha nivatsia mu litaala lia Deribe.

Paulu nende Baranaba Vakalukha Antiokia mu Shivala shia Siria

21Lwa Paulu nende Baranaba vali nivamali khwilwatsa Ivanjeli mu litaala lia Deribe, khandi nivanyoli veechi vanyishi, vakalukha mu mataala ka Lusitura, Ikoniamu nende Antiokia, 22nivaheetsanga vasuuvili tsingulu nu khuvatinyilitsa vatsililile khumenya mu lisuuvila. Vaveechitsa, “Khuvirili mu vutiinyu vunyishi khu khwinjile mu Vwami vwa Nyasaye.” 23Lwa Paulu nende Baranaba vali nivakhasaala nu khuhonga vuchila khulia, va varovolela vasakhulu mu shia likanisa. Vasaalila vasakhulu venavo khu Mwami, wa vali nivasuuvila.

24Paulu nende Baranaba vavirila mu litaala lia Pisidia, nivatukha Pamufilia. 25Nivamali khwilwatsa Ivanjeli mu litaala lia Periga, vakholomokha nivatsia Atalia; 26lwa varulayo vambukha nivatsia mu litaala lia Antiokia, ha vali nivareevi tsimbavasi tsia Nyasaye khulondokhana khu muhinzilu kwa vali nivamali khukhola.

27Lwa vatukha mu litaala lia Antiokia, valaanga halala vandu vi likanisa, ni vavavoolela shia shindu shiosi shia Nyasaye yali navakholele; khandi khuli lwa yali niyikulili vandu vi tsimbia tsindi shiliango khu vasuuvili. 28Vamenyayo khumatukhu manyishi na vasuuvili.

Currently Selected:

VIKHOLWA 14: LLLCATHOLIC

Highlight

Copy