VIKHOLWA 13

Baranaba nende Saulu Varovolwa Nivarumwa

1Khwali na vandu valala vaprofeti nende veechitsi mu likanisa lia Antiokia. Vandu venavo vali Baranaba, Simoni walaangwangwa Nigeri, Lukia wi litaala lia Kurene, Manaheni (wali niyatushitswa nu mwamihi Herode), nende Saulu. 2Lwa vali nivasaalanga khu Mwami, nivahonga vuchila khulia, Roho Mutakatifu yavoola, “Mbishili haluveka Baranaba nende Saulu, vakhole muhinzilu kwachila nivalaanga.”

3Lwa vamala khuhonga vuchila khulia nivasaala, vavikha khuvo makhono kavo nivavaruma.

Baranaba nende Saulu Vilwatsa Saipurasi

4Baranaba nende Saulu varumwa na Roho Mutakatifu khutsia mu litaala lia Seleukia. Vambukha nivarulayo nivatsia mushisulu shia Saipurasi. 5Lwa vatukha havundu halaangwangwa Salamisi, vilwatsa likhuva lia Nyasaye mu masinagogi ka Vayahudi. Yohana yali navo khuvakhonya mu muhinzilu kwavo. 6Lwa vali nivamali khukhalakanyila shia havundu hosi mushisulu shia Saipurasi khutsia khutukha mu litaala lia Pafosi, vakana nu mukhumu walaangwangwa Bari-yesu, wali nali Muyahudi wikholanga khuva muprofeti. 7Bari-yesu yali mulina wa gavana wi shisulu shia Saipurasi walaangwangwa Serigia Pahulu, mundu wali nu vucheli vunyishi. Khulwa yako, gavana mwenoyo yalaanga Baranaba nende Saulu khwitsa khuye, shichila yali ninganakani yu khuhulila likhuva lia Nyasaye. 8Navutswa mukhumu walaangwangwa Elimasi (nalio lira lielie Muluguriki), yavahinganyinya khandi nachelitsa khwikalila gavana khulonda lisuuvila. 9Navutswa Saulu, wali ni lira lindi Paulu, niyitsule Roho Mutakatifu yaheenza vulunji Elimasi 10navoola, “Yivi mwana wi Ibilisi! Uli mutsiku wa shia shindu shiosi shilahi; wayitsula vupele vwosi lukanu, khandi uchelitsanga shia khase khosi khukalukhanyinya katoto ku Mwami khukwa vuvehi! 11Mwami alakhusalilitsa nunundi. Utsitsanga khuvekhula tsimoni nu khukhukhaywa khulolakhu mbasu kwi liuva khumatukhu mati.”

Hene yaho, Elimasi yavekhulitswa nu mwooshoshi, nachenda chenda nakhava mundu unyala khumwimilila namukumile mukhono. 12Lwa gavana wi shisulu shia Saipurasi yalola vindu viakholekha, yasuuvila, lwa mechitso khulondokhana khu Mwami kamuchenyinya.

Baranaba nende Paulu mu Antiokia mu Lusomo lwa Pisidia

13Paulu nende veshie vambushila mu liaro khurula mu litaala lia Pafosi, nivatsia mu litaala likali lia Periga lili Pamufilia. Yohana, wali ni lira lindi Mariko yavalekha nakalukha Yerusalemi. 14Vatsililila nu luchendo lwavo khurula mu litaala lia Periga nivatukha mu litaala lia Antiokia lili Pisidia; khandi khulitukhu li Lisabato vinjila mu lisinagogi nivikhala hasi. 15Lwa Malako ka Musa nende mahandiko ka vaprofeti kali nikamali khusomwa, vimilili vi lisinagogi va varumila likhuva nivavoola, “Vasuuvili vashieru, niiva muli ni likhuva liu khutinyilitsa vandu, numuyaanza vavooleli.” 16Khulwa yako, Paulu yasinjila, nachela nu mukhono kwekwe navoola, “Munyi Vaisraeli vashianje nende vandu vandi vali hanu vasaalanga khu Nyasaye, numuyaanza mumbulishitsi! 17Nyasaye wa Israeli yarovola vakuuka veru khandi nalomba vandu venavo khuva luhia lwi tsingulu lwa vali nivamenyanga khuli vandu vacheni mu shivala shia Misri. Nyasaye yavarulitsa mu shivala shia Misri khuvirila mu tsingulu tsietsie tsiu vunyali; 18khandi khumihika makhomi kane, yikhutsila mwiima kwavo mu shiangalangwi. 19Nyasaye yativitsa vandu vi tsimbia saba vamenyanga mu shivala shia Kanaani, naha vandu veve shivala shienesho vamenyemu. 20Yaka koosi kavukula himbi mihika tsimia tsine na makhomi karanu.

“Yaka nikamali khwikholekha, Nyasaye yavaha vakhalachi khutukha mumatukhu ku Muprofeti Samweli. 21Nalwo lwa vandu vareeva venyanga mwami; ma Nyasaye navaha mwana wa Kishi walaangwangwa Saulu, warulanga mu vandu vuluhia lwa Benyamini. Yamiha khumihika makhomi kane. 22Lwa Nyasaye yamurulitsa khu vwamihi, yamihitsa Daudi khuva mwami. Yaka nako ka Nyasaye yavoola: ‘Mali khunyola ndi Daudi mwana wa Yese neye mundu unyanzitsanga mu mwoyo. Aliitsa khukhola shia shindu shiosi shia niitsa khumuvoolela akhole.’ 23Yesu, uli mwitsukhulu wa Daudi neye wa Nyasaye yakhola khuva Muhonyinyi wa Vaisraeli, khuli yali ni yalaaka. 24Yesu nashili khwitsa, Yohana yilwatsila Vaisraeli voosi likhuva khulondokhana khu likanila khurula mu vwoni khandi libatiswa na matsi. 25Lwa Yohana yali namalanga muhinzilu kwekwe, yareeva vandu, ‘Mukanakananga ninzi viina? Shindi woyo wamulindililanga khulola tawe. Navutswa muhulishitsi! Aliitsa khwitsa inyuma wanje nimali khurulaho; khandi mbulakhu vunyali vu khumunavula vilaaro vievie.’

26“Munyi Vaisraeli vashianje, vitsukhulu va Aburahamu, nende vandu vi tsimbia tsindi voosi vamuli hanu vasaalanga khu Nyasaye, nyenyanga khumuvoolela ndi likhuva khulondokhana khu vuhonyinyi vwenovo liarumwa khu khutsi! 27Vandu vamenyanga Yerusalemi nende vimilili vavo shivali vamanyakhu ndi neye Muhonyinyi inoho khali shivali vamanyakhu makhuva khulondokhana khu vaprofeti kasomwangwa shia litukhu li Lisabato tawe. Navutswa vachila makhuva khulondokhana khu vaprofeti nikava katoto lwa vakhalachila Yesu. 28Khali niiva vavulakhu shivune shiosi shiachila nivamukhalachila likhutsa, vareeva Pilato ahaane lilako liu khumwiira. 29Lwa vakhola shia shindu shiosi shiahandikwa mu Mahandiko Matakatifu khulondokhana khuye, vamurulitsa khu musalaba nivamura mu shilindwa. 30Navutswa Nyasaye yamwisimushitsa khurula mu likhutsa, 31khandi khumatukhu manyishi yalolekha khu vandu va yali nachendi navo khurula Galilaya khutukha Yerusalemi. Navo vahaananga nunundi vushiahidi khu Vaisraeli khulondokhana khuye. 32Navutswa khumwilwatsilanga Ivanjeli, ya Nyasaye yali ni yalaaka vakuuka venyu 33umali khukhurweshitsila khutsi, vitsukhulu vavo, lwa yisimushitsa Yesu khurula mu likhutsa, khulondokhana khuli kahandikwa mu Tsitsaburi tsia khavili,

‘Nivi Mwana Wanje;

nunundi ngwili Tata wowo.’

34Yaka nako makhuva ka Nyasaye yavoola khulondokhana khuli Yesu yisimushitswa khurula mu likhutsa, avuli khukuundila mu shilindwa,

‘Niitsa khukhuha tsikhaavi tsindakatifu khandi tsiatoto

tsia nali nalaaka Daudi.’

35Ni kilikali, avoolanga mu muliango kundi:

‘Uliitsa khuvula khulekha murumishi wowo musuuvilwa khukuundila mu shilindwa.’

36Lwa Daudi yali namali khurumishila Nyasaye mumatukhu keke ka yali nashili mwoyo, yakhutsa nayeveelwa mu shilindwa halala na vakuuka veve; ma mmbili kwekwe nu kukuundila mu shilindwa. 37Navutswa woyo wa Nyasaye yisimushitsa khurula mu likhutsa shiyakuundila mu shilindwa tawe. 38Khulwa yako, vasuuvili vashianje, nyenyanga mumanye ndi musemehwa khurula mu vwoni vwenyu khuvirila mu Yesu. 39Khuvirila muye, shia mundu wosi usuuvilanga muye avohololwangwa mu shia shindu shiosi shia Malako ka Musa kakhaywa khumuvoholola khurulamu. 40Khulwa yako, muve vacheli mulole ndi makhuva ka vaprofeti vavoola kavuli khwikholekha khu munyi:

41‘Munyi vamuchayanga vandi, muhulishitsi!

Muve ni lichenya nu khutivitswa;

shichila shia kholanga nunundi

ni shindu shia muliitsa khuvula khusuuvila,

khali niiva mundu wundi aliitsa khumuvoolela!’ ”

42Lwa Paulu nende Baranaba vali nivarulanga mu lisinagogi, vandu vavavoolela vakalushi khandi khulitukhu lindi li Lisabato; khandi vavavoolele makhuva manyishi khulondokhana khu vindu vienevo. 43Lwa vandu vi lisinagogi vaseevulwa, Vayahudi vanyishi nende vandu vi tsimbia tsindi vali nivakholwa khuva vi idini ya Vayahudi, valonda Baranaba nende Paulu. Varumwa valomoloma navo, nivavavoolela vatsililile khumenya khuvirila mu tsimbavasi tsia Nyasaye.

44Litukhu li Lisabato lialondakhu, khali shia mundu wosi mu litaala lienelo yaliho khuhulila likhuva lia Nyasaye. 45Navutswa lwa Vayahudi valola vituma vienevo, vali nimbotokha inyishi, nivalomoloma vindu vitamanu khulondokhana khu makhuva ka Paulu yali navoolanga. 46Khulwa yako, Paulu nende Baranaba valomoloma khuvo vuchila khuria, nivavoola, “Khwalomoloma lukhuraanga khu munyi likhuva lia Nyasaye. Navutswa shichila muliambakhane khandi mwivukulanga vene khuvula khunyola vulamu vwi mihika ni mihika, khutukha khulamulekha nunundi khutsi khu vandu vi tsimbia tsindi. 47Mwami neye wakhuha lilako yili:

‘Mali khumukhola khuva khuli vulavu khu vandu vi tsimbia tsindi,

khu vandu voosi mu shivala vahonyinywi.’ ”

48Lwa vandu vi tsimbia tsindi vahulila ndio, vasangala nivaha likhuva liu Mwami luyali; ma yavo vali nivarovolwa khunyola vulamu vwi mihika ni mihika, nivasuuvila.

49Likhuva liu Mwami lialanda shia havundu hosi mu lusomo lwenolo. 50Navutswa Vayahudi vavwana mulilu mu vimilili vasatsa vi litaala lienelo, khandi mu vakhali vi tsimbia tsindi vali nivaheelwa luyali vasaalanga khu Nyasaye. Varanga khutambitsa Paulu nende Baranaba, khandi nivavakhunga khurula mu lusomo lwavo. 51Varumwa vasukuya lukuushi khurula mu vilenje viavo, khuli shimanyilu khuvo ndi valechi; nivatsia mu litaala lia Ikoniamu. 52Vasuuvili vi litaala lia Antiokia vali nu vuyaanzi vunyishi, khandi nivitsula Roho Mutakatifu.

Currently Selected:

VIKHOLWA 13: LLLCATHOLIC

Highlight

Copy