VIKHOLWA 12
12
Vakristayo Vatambitswa
1Himbi mumatukhu kenako, Mwami Herode#12:1 Herode: Herode Aguripa 1, Mwami wa Palestina. , yaraanga khutambitsa valala khu vandu vi likanisa. 2Mwami Herode yiira ni shivavi Yakobo, nali amwavo Yohana. 3Lwa yalola ndi ka yali nakholi kamali khuyaanzitsa Vayahudi, yatsililila khandi nakumila Petro. (Yaka kikholekha mumatukhu ku Mulukha Kukhulia Mukati Kwalombwa Vuchila Mamela.) 4Lwa Herode yakumila Petro, yamuvoha mucheela; nahilwa khu vituma vine via vasikali khulindwa, shia shituma shiali na vasikali vane. Herode yali ninganakani yu khumulera havulavu imbeli wa vandu, nivamali Mulukha kwa Pasaka. 5Khulwa yako, Petro yavohwa mucheela; navutswa likanisa liatsililila khumusaalila nu mwoyo mulala khu Nyasaye.
Injelosi Yavoholola Petro Mucheela
6Mu vutukhu vwi litukhu lia Herode yali namuhilanga imbeli wa vandu, Petro yali nakoni hakari ha valindi vavili. Yali uvoheelwi ni minyololo chivili; khandi valindi vandi nivalindi ha shilivwa shiu mucheela. 7Nonoho lwa injelosi yu Mwami Nyasaye yalolekhaho, vulavu nuvwakha mucheela. Injelosi yanuya Petro khu maveeka keke, nimuvushitsa, nivoola, “Vukha! Khola vwangu!” Ma minyololo nichivoholokha khurula khu makhono ka Petro. 8Injelosi yavoola, “Yifwale tsinguvu tsiotsio nende vilaaro.” Petro yakhola ndio. Injelosi nivoola, “Ifwale ikaanzu yoyo, unonde.” 9Petro yarula mucheela nachilonda. Shiyali namanyi ka injelosi ikholanga ni katoto tawe; navutswa yakanakana alolanga malolo. 10Lwa vali nivakhavira khu vasikali valindanga shilivwa shiukhuraanga nende shia khavili, vatukha khu shilivwa shiali nishialombwa khu vivia shinjilanga mu litaala likali. Shilivwa shienesho shiavikushila shiene, nivavirilamu. Lwa vali nivakhachendakhu hati khu muhaanda kwi litaala likali lienelo, nonoho lwa injelosi yalekha Petro.
11Nalwo lwa Petro yamanya kali nikakholeshe khuye mwene, navoola, “Lelo manyi ni katoto! Mwami yaruma injelosi yeye khumbavina khurula khu tsingulu tsia Herode khandi khurula khu shia shindu shiosi shia Vayahudi vakanakananga shinyala khwikholekha.”
12Lwa yali niyakhamanya kenako, yasimukha vulunji natsia mu inzu ya Mariya, uli mama wa Yohana wi ni lira lindi Mariko. Vandu vanyishi vali vakanili halala munzu mwenomo, khandi vali nivasaalanga. 13Lwa Petro yakhong'onda khu muliango kuli ilwanyi, murumishi wi shikhana walaangwangwa Roda yitsa khwikula. 14Lwa yahulila nu mwoyo kwa Petro, yali nu vuyaanzi vunyishi navula khwikula muliango kwenoko. Navutswa yilukhaka natsia khuvoolela vandu vali nivali munzu mwenomo ndi Petro wusinjile ha shilivwa. 15Vamuvoolela, “Uli mulalu!” Navutswa yatsililila khuvavoolela ni katoto nindio kali. Vavoola, “Ni injelosi ya Petro.”
16Navutswa Petro yatsililila khukhong'onda khu muliango kwenoko. Lwa vikula muliango kwenoko, vamulola nivava ni lichenya. 17Navutswa Petro yavachelela mukhono vahonjele, navavoolela khuli Mwami yali namurulitsi mucheela. Khulwa yako, Petro yavavoolela, “Muvoolelekhu Yakobo nende vasuuvili veshie vindu vikholeshe.” Yarulaho natsia havundu handi.
18Lwa vwali nuvwakhashia mu mavwevwe, khwaliho ni liheenda mwoyo linyishi mu vasikali khulondokhana khu vindu viakholekha khu Petro. 19Herode yahaana lilako liu khukhava Petro, navutswa shivamunyola tawe. Yavoola valindi vareevishitswi, khali nahaana lilako lia valindi khwiirwa.
Nikamali khwikholekha kario, Herode yarula mu lusomo lwa Yudeya natsia khumenyakhu khumatukhu mati mu litaala lia Kaisaria.
Likhutsa lia Herode
20Herode yali nu vurima na vandu va mataala ka Tiro nende Sidoni. Khulwa yako, vandu venavo vitsa khumulola nivali mu shituma. Lwa vali nivakhahombelitsa Bulasita, wali nali murumishi musuuvilwa walindanga inzu yu vwami, vareeva venyanga milembe, shichila shivala shiavo shianyolanga shiukhulia mu shivala shiu Mwami Herode.
21Khulitukhu liali niliarovolwa, Herode yifwala tsikaanzu tsietsie tsiu vwami, niyikhala khu shisoko shieshie shiu vwami, nalomoloma khu vandu. 22Vandu valaanjilila nivavoola, “Ni nyasaye ulomolomanga, navutswa shiali mundu tawe!” 23Hene yaho, injelosi yu Mwami Nyasaye yarumula Herode nakwa hasi, shichila yali wayambakhana khuhaana vukhumi khu Nyasaye, navutswa mwene yihaanilanga vukhumi. Tsinyende tsiamulia, nakhutsa.
24Navutswa likhuva lia Nyasaye liatsililila khwilwatswa, nililanda shia havundu hosi.
25Lwa Baranaba nende Saulu vali nivamali muhinzilu kwavo ku khwilwatsa, vakalukha nivarula Yerusalemi, nivali na Yohana wali ni lira lindi Mariko.
Currently Selected:
VIKHOLWA 12: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
