VIKHOLWA 11
11
Ka Petro Yavoolela Likanisa lia Yerusalemi
1Varumwa nende vasuuvili vandi shia havundu hosi mu lusomo lwa Yudeya vahulila ndi khali vandu vi tsimbia tsindi vamali khuhulila likhuva lia Nyasaye. 2Lwa Petro yasimukha natsia Yerusalemi, Vayahudi vali ni lienya lia vandu vi tsimbia tsindi khushevwa vamuhinjitsa, 3nivavoola, “Shichila shina winjila mu tsinzu tsia vandu vashili khushevwa, khali nulia navo?” 4Navutswa Petro yaraanga khuvavoolela makhuva kali nikakholeshe vulahi vwene, navoola,
5“Litukhu lindi, lwa nali nisaalanga mu litaala lia Yopa, nalola malolo. Nalola shindu shindi nishikhanga hasi khuli luvaala lukali nu lwishitswangwa hasi mu tsikona tsialwo tsine, nu lwikhanga himbi havundu ha nali nindi. 6Naheenza mukari mwalwo vulahi vwene; nindolamu miruku nende tsinyama tsiumbulimu, vilombe vimolanga hasi nende manyonyi. 7Nahulila mwoyo nu kumbolela, ‘Petro, vukha; sinza nulia!’ 8Navutswa navoola, ‘Mwami, shinyala khukhola kario tawe! Shili khuliakhu shindu shiosi shioneshe inoho shiononyinywa!’ 9Mwoyo kwalomoloma lwa khavili khurula mwikulu nu kuvoola, ‘Shia Nyasaye amali khutakasa uvuli khushivukula khuli shioneshe.’ 10Yaka kikholekha hali khavaka; ma luvaala lwenolo nulukalushitswa vwangu mwikulu. 11Mutsisaa tsienetso, vandu vavaka vali nivarumwa khwinzi khurula mu litaala lia Kaisaria vatukha munzu ha nali nimenyanga. 12Roho yambolela nzi navo vwangu, vuchila khuhaya haya. Vasuuvili vashianje sita venavo vanonda khandi, nu khwinjila voosi mu inzu ya Koronelia. 13Koronelia yakhuvoolela khuli yali naloli injelosi nisinjile munzu mwemwe; nivoola, ‘Ruma mundu khutsia mu litaala lia Yopa, khulaanga mundu ulaangwangwa Simoni Petro. 14Aliitsa khukhwivaalila makhuva katsitsanga khuchila yivi halala na vandu vi inzu yoyo muhonyinywi.’ 15Lwa naraanga khulomoloma, Roho Mutakatifu yitsa khuvo manya khuli yali niyitsa khu khutsi muliraanga. 16Nalwo lwa nitsushitsa makhuva ku Mwami yali niyavoola: ‘Yohana yabatisa na matsi, navutswa muliitsa khubatiswa na Roho Mutakatifu.’ 17Niiva Nyasaye neye wavaha shihanwa shilala shiele khuli yakhuha, khutsi lwa khwasuuvila mu Mwami Yesu Kristo, inzi ni viina khuhinganyinya Nyasaye?”
18Lwa vahulila makhuva kenako, vahonjela vutswa. Vitsominya Nyasaye, nivavoola, “Khali Nyasaye uheele vandu vi tsimbia tsindi vwiyangu vu khwikanila khurula mu vwoni, vanyole vulamu!”
Likanisa lia Antiokia
19Valala khu vasuuvili vali nivasalana khurulana khuli Stefano yatambitswa niyiirwa, vasimukha nivatsia khali khutukha Foenike, Saipurasi, nende Antiokia, nivilwatsa likhuva khu Vayahudi vonyene. 20Navutswa vasuuvili vandi, varulanga Saipurasi nende Kurene, vasimukha nivatsia mu litaala lia Antiokia, nivilwatsa khandi likhuva khu Vaguriki, nivilwatsa khulondokhana khu Mwami Yesu. 21Mwami yavakhonya; ma vandu vanyishi nivasuuvila khandi nivalonda Mwami.
22Makhuva khulondokhana khu vindu vienevo katukha khu likanisa lia Yerusalemi, nivaruma Baranaba khutsia mu litaala lia Antiokia. 23Lwa Baranaba yatukhayo nalola khuli Nyasaye yali nalolele vandu tsimbavasi, yasangala navatinyilitsa voosi, khu vatsililile khuva vasuuvilwa khandi vatoto khu Mwami nu mwoyo kwosi. 24Baranaba yali mundu mulahi; yali wayitsula Roho Mutakatifu nende lisuuvila; ma vandu vanyishi nivalerwa khu Mwami.
25Khulwa yako, Baranaba yasimukha natsia mu litaala lia Tarisa khukhava Saulu. 26Lwa yamunyola, yamulera mu litaala lia Antiokia. Vamenyaho na vandu vi likanisa khumuhika kwosi, niveechitsa vandu vanyishi. Veechi varaanga khulaangwa Vakristayo mu litaala lia Antiokia.
27Mumatukhu kenako, valala khu vaprofeti varula Yerusalemi, nivatukha mu litaala lia Antiokia. 28Mundu mulala khuvo walaangwangwa Agaba, yasinjila khandi khuvirila mu tsingulu tsia Roho Mutakatifu, yavoola khuliitsa khuvaho ni inzala inyishi shia havundu hosi khulilova. (Inzala yaliho muliamiha liu Mwami Kilaudia wa Roma). 29Veechi virulitsa nu mwoyo mulala, shia mulala khulondokhana khuli yinyalitsa, khuruma vukhonyi vwavo khu vasuuvili veshie mu lusomo lwa Yudeya. 30Vakhola ndio, nivaruma vukhonyi vwavo khu vimilili vi likanisa khuvirila khu Baranaba nende Saulu.
Currently Selected:
VIKHOLWA 11: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
