1 VAKORINZO 7

Mareevo khu Lihilana

1Khulondokhana khu makhuva ka mwali nu mwahandika: nu vulahi mundu musatsa khulekha khuhila mukhali. 2Navutswa shichila machelitso ku khukhola mwiima mutamanu kwi shifwavi shiu khukona na vakhali, shia mundu musatsa wosi ave niyahila mukhali wewe; khandi shia mukhali wosi ave nu musatsa wewe. 3Mundu musatsa wahila mukhali yenyekhanga arweshitsi muhinzilu kwekwe khuli mundu musatsa, khandi mukhali wahilwa khutukha arweshitsi muhinzilu kwekwe khuli mukhali. Khutukha shia mulala arweshitsile wundi ka yenyanga khwikholekha. 4Mmbili ku mukhali shiukuli nu kwekwe wonyene tawe, navutswa nu ku musatsa wewe khandi. Munjila indala yeneyo, mmbili ku musatsa shiukuli nu kwekwe wonyene tawe, navutswa nu ku mukhali wewe khandi. 5Uvuli khwiima woshio; nikakhali numuhuchilitsane khukhola ndio hatititi, khu munyole vwiyangu vu khusaala. Navutswa khutukha mukalushi halala, khu Shetani avuli khumuchelitsa shichila muvula vunyali vu khwilinda vene.

6Mbolanga makhuva yaka, khulu khwenya khumukhonya mu tsinganakani, navutswa shikanyala khuva ni lilako tawe. 7Nakhayaanzi vandu vasatsa voosi vave khuli lwa ndi. Navutswa shia musatsa wosi wanyola shihanwa shieshie shilahi khurula khu Nyasaye. Mulala ali ni shihanwa yishi, na wundi ali ni shihanwa shindi lukanu.

8Mbolelanga vandu vashili khuhilana nende vakhutsakhali ndi nu vulahi nivatsililile khumenya vonyene, khuli lwa inzi menyanga wonyene. 9Navutswa niiva vavula vunyali vu khwilinda vene vulahi, khutukha vahilane; shichila nu vulahi khuhilana, khuvira khwikomba khwenya khukona nu mukhali inoho khukona nu musatsa.

10Mbananga lilako yili khu vandu vahilana khale. Shilinyala khuva ni lianje mwene tawe, navutswa lirulanga khu Mwami: mukhali avuli khulekhana nu musatsa wewe. 11Navutswa niiva anyala khulekhana naye, alatsililila khumenya wonyene, inoho vakalushitsane nu musatsa wewe; musatsa avuli khulekhana nu mukhali wewe.

12Mbolelanga vandu varikale makhuva yaka; shikanyala khuva nu Mwami neye uvoolanga tawe. Niiva musatsa musuuvili ali nu mukhali wakhasuuvila, navutswa mukhali mwenoyo yenyanga vamenye naye, musatsa mwenoyo avuli khulekhana naye. 13Niiva mukhali musuuvili ali nu musatsa wakhasuuvila, navutswa musatsa mwenoyo yenyanga vamenye naye, mukhali mwenoyo avuli khulekhana naye. 14Musatsa wakhasuuvila akholwangwa khuva mutakatifu imbeli wa Nyasaye khuvirila khu mukhali wewe; khandi mukhali wakhasuuvila akholwangwa khuva mutakatifu imbeli wa Nyasaye khuvirila mu musatsa wewe. Niiva shikali kario, vaana venyu vakhoneshe, navutswa khuli kali ni vatakatifu. 15Navutswa niiva musatsa wakhasuuvila yenyanga khulekhana nu mukhali wewe wasuuvila, khutukha kave kario. Ave nu musatsa inoho mukhali wasuuvila nu muvoholole khukhola ka yenyanga. Nyasaye wamulaanga munyi khumenya mu milembe. 16Yivi mukhali wasuuvila, wakhamanya munjila shina, niiva shiuliitsa khuhonyinya musatsa wowo tawe? Inoho yivi musatsa wasuuvila, wakhamanya munjila shina, niiva shiuliitsa khuhonyinya mukhali wowo tawe?

Mumenye khuli Nyasaye Yamulaanga

17Shia mundu wosi atsililile khumenya khulondokhana khu shihanwa shiu Mwami yamuha, khandi khuli yamenyanga lwa Nyasaye yamulaanga. Yili nalio lilako lia nzechitsanga vandu mu makanisa koosi. 18Niiva mundu washevwa wahuchilila mulaango kwa Nyasaye, avuli khuchaya khushevwa. Niiva mundu wakhashevwa wahuchilila mulaango kwa Nyasaye, mundu mwenoyo avuli khushevwa. 19Khushevwa inoho khuvula khushevwa ni shindu shikhaya. Shindu shikali khuvira viosi nu khulonda Malako ka Nyasaye. 20Shia mundu wosi atsililile khuva khuli yamenyanga nashili khuhuchilila mulaango kwa Nyasaye. 21Wali nuli murukwa lwa Nyasaye yakhulaanga? Niiva nikario, lekha khuheenda mwoyo. Navutswa niiva uli nu vwiyangu vu khuvohololwa, unyala khuvurumishila. 22Murukwa wu Mwami yalaanga wakwa muvoholole wu Mwami. Munjila indala yeneyo, mundu muvoholole wa Kristo yalaanga ali khuli murukwa wa Kristo. 23Mwakuulwa vukuuli vululu: muvuli khukholwa khuli varukwa va vandu. 24Vasuuvili vashianje, shia mulala khu munyi atsililile khuhaambana na Nyasaye mu liiva lia yalimu lwa yalaangwa.

Mareevo khu Vandu Vakhahilana nende Vakhutsakhali

25Khulondokhana khuli mwahandika khu vandu vakhahilana: mbulakhu lilako liosi khurula khu Mwami; navutswa nyenyanga khumuvoolela makhuva kaanje khuli mundu wa munyala khusuuvila khuvirila mu tsimbavasi tsiu Mwami.

26Khulondokhana khu vukoyanu vwa matukhu kanu, nganakananga nu vulahi musatsa khumenya khuli lwa ali yolo. 27Unyala khuva wahila mukhali? Uvuli khulekhana naye. Unyala khuva ushili khuhila mukhali? Uvuli khuchelitsa khukhava mukhali. 28Navutswa niiva uliitsa khuhila mukhali, shiuliitsa khuva nukholi vwoni tawe. Niiva mukhali aliitsa khuhilwa, shialiitsa khuva nakholi vwoni tawe. Navutswa nyenyanga khumukhonya muvuli khunyola matiinyu ka shia khase khosi kanyolanga vandu vahila.

29Vasuuvili vashianje, kambolanga ni yaka: matukhu kavwele; khandi khurula nunundi, vandu vahila vakhali khale, khutukha vamenye khuli vandu vashili khuhila vakhali. 30Yavo vikhulanga vave khuli vandu vakhikhulanga tawe; khandi yavo vali nu vuyaanzi vave khuli vandu vavula vuyaanzi; yavo vakuulanga vindu vave khuli vandu vavula vindu via vakuulanga vene; 31vandu vavikha tsinganakani tsiavo mu vindu viu mu shivala, vave khuli vandu vakhavikha tsinganakani tsiavo mu vindu viu mu shivala tawe. Shivala shinu shilitsa khuvula khuvaho khuluhono khuli shili nunundi.

32Nyenyanga muve vavoholole khu muvuli khuheenda mioyo. Mundu wakhahila mukhali, aheendelanga mwoyo muhinzilu ku Mwami, shichila achelitsanga khuyaanzitsa Mwami. 33Navutswa mundu wahila mukhali, aheendelanga mwoyo vindu viu mu shivala shinu, khuli anyala khuyaanzitsa mukhali wewe; 34khandi ahaya hayanga. Mukhali wakhahilwa nu musatsa, inoho mwana wi shikhana muchima aheendelanga mwoyo muhinzilu ku Mwami; ali ni lienya liu khurumishila Mwami m mu mmbili khandi mu roho; navutswa mukhali wu musatsa yahila aheendelanga mwoyo vindu viu mu shivala shinu, khuli anyala khuyaanzitsa musatsa wewe.

35Mbolanga ndio shichila nyenyanga khumukhonya. Shinjelitsanga khumukaya tawe. Nikhali, nyenyanga mumenye munjila inunji yene, khandi mwihaane nu mwoyo mulala khurumishila Mwami.

36Niiva mundu aliitsa khulola ndi avula mwiima mulahi kwa amanyinyanga mwana wi shikhana wa yaselela; khandi niiva likomba lielie liu mmbili liliitsa khumukuura, nu khukhola ka mwene alolanga ni malahi, nu vulahi nivahilane -- vavula vwoni vwa valiitsa khuva nivakholi. 37Navutswa niiva mundu yali waviritsa khale aliitsa khuvula khuhila mukhali, vuchila khunikwa khuhila; khandi niiva mwene yi yimililanga mu ka yenyanga khukhola, khandi umali khuviritsa mu tsinganakani tsietsie khukakhola -- khulwa yako, aliitsa khuva nakhola likhuva lilahi, niiva aliitsa khuhila mwana wi shikhana mwenoyo. 38Khali ndio, mundu uhilanga mwana wi shikhana muchima akholanga malahi, khali woyo wambakhananga khumuhila akholanga khali malahi muno.

39Mukhali wahilwa aliitsa khutsililila khuvula khuva muvoholole khumatukhu koosi, ka musatsa wewe aliitsa khuva nashili mwoyo; navutswa niiva musatsa wewe aliitsa khukhutsa, mukhali mwenoyo aliitsa khuva muvoholole khutsia lukhali khu musatsa wosi wa yenyanga; navutswa musatsa mwenoyo aliitsa khuva nali mu Mwami. 40Khulwanje mwene, mukhali mwenoyo aliitsa khuva nu vuyaanzi muno, niiva aliitsa khumenya khuli amenyanga wonyene vutswa; nindio nganakananga, khali inzi mwene ndi na Roho wa Nyasaye.

Currently Selected:

1 VAKORINZO 7: LLLCATHOLIC

Highlight

Copy