1 VAKORINZO 6

Khuhila Woshio Mushiina

1Niiva mulala khu munyi ali ni likhuva lia yikananga khulondokhana khu weshie, shichila shina amuhilanga khuyaalwa mushiina shia vandu vatamanu vakorwa Nyasaye, vukhala vu khumuhila khuyaalwa mushiina shia vandu va Nyasaye? 2Mushili khumanyakhu ndi vandu va Nyasaye, navo valiitsa khukhalachila vandu mu shivala? Niiva muliitsa khukhalachila vandu mu shivala, muvula vunyali vu khuviritsa vindu vitititi. 3Mushili khumanyakhu ndi khuliitsa khukhalachila tsinjelosi? Ni vianga vinyishi via khuliitsa khukhalachila mu limenya linu! 4Niiva muli ni likhuva liu khwikana khuli lienelo, shichila shina mulihila mushiina khuviritswa na vandu vavula shindu shiosi shia vamanyi khulondokhana khu likanisa? 5Ni tsisoni khu munyi. Ni kilikali, mundu avulakhuho mu munyi uli nu vusitsa unyala khuviritsa likana lili mu Vakristayo? 6Nikhali, musuuvili mulala ahilanga weshie mushiina, malomba vandu vatamanu vakorwa Nyasaye khumukhalachila mushiina!

7Khali ndio, lwa muyaalana vene khuvene, kamanyinyanga ndi mwakuurwa khale. Shichila shina mwenyanga khuvula khukholelwa vindu vitamanu? Shichila shina mwenyanga khuvula khunuulwa vindu vienyu? 8Nikhali, munyi vene mukholelananga vindu vitamanu nu khunuula vandu vandi via vali navio, khali vasuuvili veshie. 9Mushili khumanyakhu ndi vandu vatamanu vakora likhola liu vulunji, shivaliitsa khwinjila mu Vwami vwa Nyasaye tawe. Mukhikaati vene tawe; vandu vakholanga mwiima kwi shifwavi inoho vasaala khu misambwa inoho vakholanga vuheeyi inoho vasatsa vakonanga na vasatsa vandi khuli vo 10inoho vihuuvi inoho vilili inoho vatandi inoho vanuuli avulakhuho, khali mulala khuvo uliitsa khunyola Vwami vwa Nyasaye. 11Valala khu munyi vakholanga mwiima khuli kwenoko. Navutswa mwakholwa khuva vanihu khurula mu vwoni. Mwakholwa khuva vatakatifu khu Nyasaye, khandi numuva valunji imbeli wa Nyasaye khuvirila mu Mwami weru Yesu Kristo, khandi khuvirila mu Roho wa Nyasaye weru.

Murumishile Mivili Chienyu Khuhaana Vukhumi khu Nyasaye

12Mulala khu munyi anyala khuvoola, “Naheelwa vunyali vu khukhola shia shindu shiosi.” Navutswa shia shindu shiosi shivula vukhonyi khwinzi. Nyala khuvoola naheelwa vunyali vu khukhola shia shindu shiosi, navutswa shindu shivulakhuho shinyala khukhola khuva murukwa. 13Mundu wundi khandi anyala khuvoola, “Shiukhulia ni shiu munda, khandi inda ni yi shiukhulia.” Navutswa Nyasaye aliitsa khutivitsa viosi. Mmbili kuvuli khurumishilwa khukhola mwiima mutamanu kwi shifwavi, navutswa khurumishila Mwami; shichila Mwami neye uheetsanga mmbili shia kwenyi. 14Nyasaye, wisimushitsa Mwami khurula mu likhutsa; aliitsa khukhwisimushitsa khurula mu likhutsa khandi khuvirila mu tsingulu tsietsie.

15Munyala khuva mushili khumanyakhu ndi mivili chienyu chili khuli vivelo viu mmbili kwa Kristo? Khulwa yako, nyala khuvukula vivelo viu mmbili kwa Kristo, nu khuhambanyinywa khu mmbili ku mukhali wu kholanga vulaaya? Shikanyala khwikholekha kario tawe! 16Munyala khuva mushili khumanyakhu ndi musatsa ukonanga nu mukhali mulaaya, khali ye aliitsa khukwa mulaaya? Mahandiko Matakatifu kavoolanga havulavu, “Vo, vavili valakwa mmbili mulala.” 17Navutswa mundu wahaambana nu Mwami, ali shilala naye mu roho.

18Mulekhane nu mwiima mutamanu kwi shifwavi. Vwoni vundi vwosi vwa mundu akholanga vuli ilwanyi wu mmbili; navutswa musatsa wu kholanga mwiima mutamanu kwi shifwavi akholelanga mmbili kwekwe vwoni. 19Munyala khuva mushili khumanyakhu ndi mmbili kwenyu kuli khuli litempeli lia Roho Mutakatifu, uli mwoyo mu munyi, wa mwanyola khurula khu Nyasaye? Shiumuli munyi vene tawe. 20Mwakuulwa nu murungu ku vukuuli vululu. Khulwa yako, murumishile mivili chienyu khuhaana vukhumi khu Nyasaye.

Currently Selected:

1 VAKORINZO 6: LLLCATHOLIC

Highlight

Copy