1 VAKORINZO 5
5
Mwiima Mutamanu kwi Shifwavi mu Likanisa
1Makhuva kavoolelwi ndi mwiima mutamanu kwi shifwavi kukholekhanga mu munyi, mwiima kukhanyala khuvula khwikholekhakhu, khali mu vandu vi tsimbia tsindamanu tsiakorwa Nyasaye. Mali khuhulila ndi mundu musatsa akonanga nu mukhali wa tata wewe, khuli nu mukhali wewe wa yahila. 2Munyi mwayilola! Shiumunyala khuvelelakhu, khandi mukhunganyinyi mundu khuli mwenoyo mu munyi tawe. 3Khali niiva shindi na munyi mu mmbili tawe, ndi na munyi mu roho. Mali khukhalachila mundu wakhola shikholwa shienesho, khuli ninzi mwene walola nikakholekhanga. 4Lwa mwivunjelitsanga halala khuvirila mu lira liu Mwami weru Yesu, nindi na munyi mu liiva lia roho, khandi numuli ni tsingulu tsiu Mwami weru Yesu Kristo, 5mwenyekhanga Shetani mundu mwenoyo, khu mmbili kwekwe kutivitswi, navutswa mwoyo kwekwe kulihonyinywa Khulitukhu liu Mwami.
6Khwichinjilila khwenyu shiukhuli khulahi tawe. Mwamanya ndi, “Mamela mati kavimbitsanga shinokho.” 7Khutukha murulitsiho mamela makhulu, kali khuli vwoni khu muve vanihu vatoto. Muliitsa khuva khuli shinokho shiyia vuchila mamela koosi khuvikhwamu. Toto, manyi nindio munyi muli. Mulukha kweru kwa Pasaka kwirecheshe nunundi lwa Kristo, uli Shimeme shi Likondi shieru, amali khukholelwa khuli shihanwa shiu musango. 8Khulwa yako, chendi khukhole Mulukha kwa Pasaka kweru; shikali nu mukati kushili na mamela makhulu, nikali khuli vwoni nende vutamanu tawe; navutswa nu mukati kuvula mamela, mukati kuchilanga vandu nivava vanihu khandi kwatoto.
9Ibarwa yanje ya nahandika, nahandika nimukaya khuhaambana na vandu vakholanga mwiima mutamanu kwi shifwavi. 10Shikali mbolanga ndi vandu vu mu shivala shinu navo vakholanga mwiima mutamanu kwi shifwavi inoho vali nu vwilili inoho vanuuli inoho vasaalanga khu misambwa tawe. Niiva ni kario, nu vulahi numuruli mu shivala shinu. 11Navutswa namuhandichila, nimbolanga muvuli khuhaambana nu mundu wivukulanga khuva musuuvili washieru, navutswa ye akholanga mwiima mutamanu kwi shifwavi inoho ali nu vwilili inoho asaalanga khu misambwa inoho amoonyanga veshie inoho mutandi inoho shihuuvi. Muvuli khuliakhu nu mundu khuli mwenoyo.
12Ni shina shianyala khunyola nikhalachila vandu vali ilwanyi? Shikanyala khuva kilikali, munyi navo valiitsa khukhalachila yavo vali mu likanisa? 13Nyasaye aliitsa khukhalachila yavo vali ilwanyi. “Khunganyinyi mundu mutamanu khurula mu munyi.”
Currently Selected:
1 VAKORINZO 5: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
