1 VAKORINZO 8

Lireevo khu Shiukhulia Shihaanilwi khu Misambwa

1Khulondokhana khu shiukhulia shiakholelwa khuli shihanwa shiu musango khu misambwa: Khwamanya ndi khutsi voosi khwacheliha, navutswa vucheli vwenovo vuchilanga mundu yilola, nikhali vuyaanzi vumbakhanga mundu. 2Mundu wikholanga wamanya shindu, ni kilikali, avulakhu vucheli vwa ali navwo vwosi. 3Navutswa mundu wayaanza Nyasaye, neye wa Nyasaye yamanya.

4Khulondokhana khu khulia shiukhulia shihaanilwi khuli shihanwa shiu musango khu misambwa: khwamanya ndi musambwa ni shindu shikhaya mu shivala; khandi ndi Nyasaye nu mulala wonyene. 5Khali niiva khuliho na “Vanyasaye,” vave mwikulu inoho khulilova; khali niiva ni kilikali khuliho na “Vanyasaye” vanyishi khuli vo nende “Vami,” 6navutswa khulweru, khutsi khuli na Nyasaye mulala wonyene, nali Tata, Muloonji wi vindu viosi khandi neye uchilanga nu khuva mwoyo. Khuliho khandi nu Mwami mulala wonyene, nali Yesu Kristo, wa vindu viosi vialoongwa khuvirila muye; khandi neye uchilanga nu khuva mwoyo.

7Navutswa shikanyala khuva vandu voosi vali nu vucheli vwenovo tawe. Vandu valala vanala khwinamila misambwa, khali nunundi lwa valiitsanga shiukhulia khuli shienesho, vakanakananga shimali khuhaanwa khuli shihanwa shiu musango khu misambwa; tsinganakani tsiavo tsiu mukari tsiateteshela; khandi valolanga ndi shiukhulia shienesho shimali khwononyinywa. 8Shiukhulia shivula vunyali vu khukhulera himbi khu Nyasaye. Shiukhuliitsa khuva vandu vatamanu muno, niiva khuliitsa khuvula khulia shiukhulia, khandi valahi muno, niiva khuliitsa khulia.

9Nikhali, muve vacheli; vuvoholole vwenyu vuvuli khulomba yavo vali vateteshele mu lisuuvila khukwa mu vwoni. 10Khuvoole mundu wi tsinganakani tsiu mukari mwemwe, aliitsa khumulola numuliitsanga shiukhulia mu litempeli liu musambwa, munyi vandu va mwikholanga muli “Nu vucheli”; yaka shikanyala khumutinyilitsa khulia shiukhulia shimali khuhaanwa khu misambwa? 11Mundu muteteshele mwenoyo, nali musuuvili woshio wa Kristo yakhutsila khu musalaba, aliitsa khukhutsa shichila “Vucheli” vwenyu! 12Lwa mukholelanga vasuuvili veshie vwoni munjila yeneyo, khandi musalilitsa liiva liavo liteteshele li tsinganakani tsiu mukari, mukholelanga Kristo vwoni. 13Khulwa yako, niiva shiukhulia shichilanga musuuvili washianje akwa mu vwoni, nzitsanga khulekha khulia inyama, khumbuli khuchila musuuvili washianje khukwa mu vwoni.

Currently Selected:

1 VAKORINZO 8: LLLCATHOLIC

Highlight

Copy