1 VAKORINZO 9

Khuli Murumwa Kenyekhanga Ave

1Ni kilikali, nyala khuva mundu muvoholole? Nyala khuvula khuva murumwa? Nyala khuva shili khulolakhu Mwami Yesu? Munyi shivali navo vandu va nalera khu Mwami, shichila muhinzilu kwanje? 2Khali niiva vandu valala vambakhananga khumbukula khuli murumwa, navutswa ni kilikali, munyi mumbukulanga khuli murumwa; shichila limenya lienyu mu Mwami, lili khuli shimanyilu shimanyinyanga ndi inzi nu murumwa.

3Lwa vandu vanjayanga, nindi mwene nzishinganga mulilomoloma. 4Nyala khuva mbulakhu vunyali vu khuheelwa shiukhulia, khandi shiu khung'wa khulondokhana khu muhinzilu kwanje? 5Nyala khuva mbulakhu vunyali vu khulonda mwiima kwa varumwa vandi nende vasuuvili vu Mwami nende Petro, khuchenda nu mukhali wanje wasuuvila mu luchendo lwanje? 6Inoho inzi nende Baranaba, navo vonyene vutswa vatushili khukhola muhinzilu khu vanyole lilia mu limenya liavo? 7Nu musikali shina wi liihe urumikhanga wirunganga mwene? Nu mulimi shina wambakhana khuliakhu matunda ki misabibu khurula mu mulimi kwekwe mwene? Nu mwayi shina unyala khuvula khung'wakhu maveele khurula mu makondi keke?

8Shimbolanga ndio khulondokhana khu vunyali vurulanga khu mundu tawe; shichila Malako kavoolanga ndio khandi. 9Kahandikwa mu Malako ka Musa: “Uvuli khuvohakhu ihili munwa lwa uchirumishilanga khuhula imu.” Nyasaye aheendelanga mwoyo tsihili? 10Kanyala khuva Nyasaye yali ninganakani khulondokhana khu khutsi, lwa yavoola ndio? Nindio kali kahandikwa khulondokhana khu khutsi. Mundu ulimanga nende mundu uhulanga imu vakhole mihinzilu chiavo, nivalindililanga khukavana via vachesa. 11Niiva khwaraaka imu yu mu roho mu munyi, nu vutamanu shina vuliho, niiva khuliitsa khunyola khu miandu chienyu chia mwachesa? 12Niiva vandi vali nu vunyali vu khunyola vukhonyi khurula mu munyi, khali khutsi shiukhuli nu vunyali vu khunyola vukhonyi vunyishi khuvira vo?

Navutswa khushili khurumishilakhu vunyali vwenovo. Nikhali, khwayikhutsila mu vindu viosi, khulu khwenya khuvula khwikalila Ivanjeli khulondokhana khu Kristo. 13Ni kilikali, mwamanya ndi vandu vakholanga muhinzilu mu Litempeli, vanyolanga shiukhulia shiavo khurula mu Litempeli; khandi ndi yavo vakholanga musango khu vwaali, vanyolakhu shitonye khurula khu misango. 14Munjila indala yeneyo, Mwami yahaana lilako ndi vandu vilwatsanga Ivanjeli, vanyole shia valia khurula khu Ivanjeli ya vilwatsanga.

15Navutswa khali shili khurumishilakhu vunyali vwenevo vwosi, inoho shimbandikanga nunundi, khulu khunyola vunyali vwenovo tawe. Vwakhavele vulahi, niiva nyala khuraanga khukhutsa! Mundu avulakhuho utsitsanga khukalukhanyinya khwichinjilila khwanje khuve khwi shikhaya! 16Niiva nzilwatsanga Ivanjeli mbula vunyali vu khwichinjililakhu. Nu muhinzilu kwa ndushili khole. Wooyi! Niitsa khuva khuvutiinyu, niiva niitsa khulekha khwilwatsa Ivanjeli! 17Niiva nyala khuva nzilwatsanga khulondokhana khu lienya lianje mwene, niitsa khurungwa; navutswa kholanga ndio, khuli nu vwasio, shichila Nyasaye neye wamba muhinzilu kwenoko khole. 18Ni shina shiliitsa khuva murungu kwanje? Murungu kwanje, navwo vunyali vu khwilwatsa Ivanjeli vuchila khurungwa, nu khuvula khurumishila vunyali vwanje shichila ndi mwilwatsi.

19Khali niiva ndi muvoholole khurula mu vandu voosi, namala khwikhola mwene khuva khuli murukwa khu vandu voosi, nikanyalikha nyole vanyishi. 20Lwa kholanga muhinzilu mu Vayahudi, menyanga khuli Muyahudi, khu nyole Vayahudi. Khali niiva Malako ka Musa shikanyala khunzimilila tawe, menyanga khuli mundu ukalondanga lwa kholanga mihinzilu na yavo vakalondanga khulu khunyola yavo va malako kimililanga. 21Munjila indala yeneyo, lwa kholanga mihinzilu mu vandu vi tsimbia tsindi, menyanga khuli mundu urulanga mu vandu vi tsimbia tsindi, uli ihale wene khurula khu Malako ka Vayahudi, khulu khunyola vandu vi tsimbia tsindi. Yaka shikavoolanga nzambakhananga khulonda Malako ka Nyasaye tawe; navutswa ni kilikali, malako ka Kristo ka nzimililanga. 22Ndi muteteshele mu vandu vateteshele mu lisuuvila, khu nikanyalikha nyole vandu vateteshele. Namala khukwa shia shindu shiosi khu vandu voosi, khu nikanyalikha mbonyinyi valala khuvo.

23Kholanga kenako koosi shichila Ivanjeli, khu nyolekhu tsikhaavi tsirulanga mu Ivanjeli yeneyo. 24Mushili khumanyakhu ndi mu maliviri, ni vilukhachi voosi vilukhakanga; navutswa nu mulala wonyene unyolanga shihanwa? Nikali nindio, yilukhachi ni tsingulu tsiosi, khulu khunyola shihanwa. 25Shia mwilukhachi wosi alondanga mwiima mulahi ku khwilinda, khulu khufwala itaachi inyala khuvula khutivitswa. Navutswa khutsi khukholanga ndio, khulu khunyola itaachi ya khuliitsa khuva nayo mihika ni mihika. 26Nako kachilanga ninzilukhaka vulahi vwene khutukha khu mukoye; khandi nako kachilanga nimba khuli mukwani wi tsingumi, ukhahuutsanga tsingumi tsietsie mu vushindu tawe. 27Ndinyinyanga mmbili kwanje ni tsingumi khukwimilila vulahi vwene, khulu khuvula khwenya khurulitswa ilwanyi, nimali khulaanga vandi khwiyunga mu muvaayo kwenoko.

Currently Selected:

1 VAKORINZO 9: LLLCATHOLIC

Highlight

Copy