LUKA 9

Boisiet ne kigiyoktoe alamalyet taman ak aeng’

1Kiguur anyun taman ak aeng’ koyumgei, ak kogochi kimnatet ak bounatet koboi oik tugul, ak kosoob che miandos. 2Ak kiiyokto koamda bounatetab Jehovah, ak kosoob che miandos. 3Kolenji, Amoib kiy ne bo bandang’wong’, agot kirokto, anan lolet, anan makatiat, anan fedaisiek; amoibote sumotik aeng’. 4Ak got age tugul ne omong’jini, otebe oloto agoi obe. 5Ak alak tugul che mataachak, ye omande eng’ nganasanato, olelekte temburiek eng’ kelyekwok si koek baornatet agobo ichek. 6Koba anyun kobunot nganasok, koamdaati logoiywek che miach, ak kosooboti eng’ oldo tugul.

Kaiimetab ge ne bo Herod

7Ak kigas anyun kiruogindet Herod tuguk tugul che kigoyaak: kiimgei mising’, amu kimwaei alak, kole, kagong’eet Johana eng’ che kibek; 8ak kilen alak, kogotook Elija: kolen alak, kong’eet age eng’ maotik chu ki bo keny. 9Ak kile Herod, Kiatil metitab Johana: ago ng’o anyun chichi, ne agase tuguk che u choto agobo inendet? Ak kicheng’ kole kogeer inendet.

Kebaei bik elfusiek mut

10Ak ye kingoweek che kiyoktoi, komwachi inendet tuguk che kogoyai. Ak kiimut ichek koba taban ichegei agoi nganaset ne kiguure Betsaida. 11Ago kingonai tuiyosiek kosub: ak kitaach icheget, ak kong’alalji agobo bounatetab Jehovah, ak kiisoob ichek che kimachei kisoob.

12Ak ye kimachei koimen, kobwa anyun tamanu ak aeng’ kolenji inendet, Ilenji tuiyet koba, si koit nganasok ak emet, si konyor ole ruitos, ak amitwogik: amu kimi surkwen. 13Ago kilenji ichek, Ogochi okwek amitwogik. Ak kile, Magitinye kiy kobate makatinik mut ak njirenik aeng’; kobate kebe kealji amitwogik bichu tugul. 14Amu ki olo bo murenik elfusiek mut. Ak kilenji alamalyennyi, Ochob kobuur ak ingobeate konom. 15Ak kiyai anyun ko u noto, ak kichob tugul koteb ng’ony. 16Ak kinam makatinichoto mut ak njirenichoto aeng’, ak kiinyal kipsengwet, ak koberur, ak kotonaton; ak kogochi alamalyet si kobiit kogochi kabuureito. 17Ak kiamis, kot kobiyong’so: ak kigiyum katuganik che king’et eng’ kererutik, ak kiek kerebonik taman ak aeng’.

Kong’anyei Petero kole Jesu ko Kristo

18Ak ye kisaei inegei, ko kimi alamalyet koboto inendet: ak kiteebe icheget kolenji, Mwaei tuiyosiek kole a ng’o? 19Ak kiwolji ichek kolenji, Len Johana Kabatisanindet; kolen alage, Elija; kolen alak, kagong’eet maotiot age eng’ chu ki bo keny. 20Ak kilenji ichek, Ago olen okwek a ng’o? Ak kiwol Petero kole, I Kristo ne bo Jehovah.

Sib komwaei Jesu agobo meennyi ak ng’eetyennyi

21Ago kiitigon ichek, ak kong’at kolenji, Amomwachi chi ng’olyondonito; 22kole, Kanyolji Weritab chi konyalil eng’ tuguk che chang’, ak koesio boisiek inendet ak tisiik che eechen ak sirik, ak kebar, ak king’eet eng’ betutab somok.

Kanyol keesiege

23Kimwachi tugul kolenji, Ngo machei chi age tugul kosubwa, ko ingoesiogei, ak koib kimurtoiyondennyi betut age tugul, ak kosubwa. 24Amu age tugul ne machei kosor sobondanyi kobeeti; ak age tugul ne ibeeti sobondanyi agobo ane, ko noto ne soru. 25Amu keljin nee chi, ngonyor ng’ony komugul ak kobeetgei anan kerebe sobondanyi? 26Amu age tugul ne ililanjina ak ng’alekyuk ko tun ililanjin agine Weritab chi chichoto, ye tun nyonei eng’ torornatennyi, ak ne bo Kwanda, ak ne bo malaikaisiek che tililen. 27Ago amwawok iman ale, Mitei alak eng’ che tonondos eng’ yuto che magoi chamjam meet matiny, kot kogeer bounatetab Jehovah.

Waletab ge ne bo Jesu

28Ak kingogesgei olo bo betusiek sisiit, koboch ngomwa ng’alechato, komut Petero ak Johana ak Jakobo, kotogosta tulwet koba kosa. 29Ak ye kita kosaei, kowalak itondab togennyi, ak koleelagitu ngoroikyik kot kolil bich. 30Ak ogeero, king’alalyo ak inendet bik aeng’u; ki Musa ak Elija; 31che kigotook eng’ lilindo, ak kiga ng’alal agobo meenyi ne kimachei kosulda eng’ Jerusalem. 32Ak kiga birto met Petero koboto icheget che kimi ak inendet: ago ye kingogos, kogeer lilindanyi, ak bichoto aeng’ che kitonondos koboto inendet. 33Ak ye kimachei kobesio ak inendet, kolenji Petero Jesu, Konetindoni, mie amu kimi yuto: si keteech keriosiek somok; neng’ung’ age, ko bo Musa age, ko bo Elija age: kimwaei ama nai kit ne mwaei.

34Ak ye kita komwaei tuguchuto, konyo boldet, ak kotuch icheget: ak kiiyweis ye kingochut boldet. 35Ak kimong’ kutit eng’ boldet, ak kole, Ni Werinnyu, ne kialewen: ogas inendet. 36Ak ye kingobata kutinato, kotook Jesu inegei. Ak kosisyo anyun, ama mwachi chi eng’ betusiechoto kit age tugul ne kiga kogeer.

Kisoobi werit ne tinyei tamirmiriet ne muruon

37Ak betut ne kiisubi betunoto, ye kingochorugei eng’ tulwet, kotuiyo ak inendet tuiyet ne o. 38Ak ogeero, kibol chito age eng’ tuiyet, kole, Konetindoni, asain ale, rire werinnyu; amu kigii inegei: 39ak keero, namei inendet tamirmiriet, ak ngunoto kowaach; ak kobirabirto kot kobun bugat kutinnyi, konyalili mising’ ama chamei komanda. 40Ak koarirji alamalyeng’ung’ ale koon; ago ma imuch. 41Ak kiwolji Jesu kolenji, Ee ibini matinyei kayanet ak komaasat, atebye kobotok, ak amuitoi agobo okwek kot kotianit? Imutu wering’ung’ konyo yu. 42Ak kingota konyonei, kowirji ng’ony oindet inendet, ak kobirabirto mising’. Ago kiger kong’ Jesu tamirmiriet ne muruon, ak kosoob lakwet, ak koweekyi kwanda. 43Ak kikwong’io tugul agobo oindab Jehovah.

Sib komwaei Jesu ne bo aeng’ agobo meenyi

Ago kingota kokwong’dos tugul agobo tuguk che kayai Jesu, kolenji alamalyennyi, 44Ongochut ng’alechu itikwok: amu tun kigoitoi Weritab chi kwo eunekab bik. 45Ago ma iguiyo ichek mwaonato; kiung’ak eng’ icheget, si manai: ak kiiywei koteebe inendet agobo mwaonato.

Agobo kaming’inetab ge ak muitaet

46Kotoi anyun koteebegei kole, Ng’o ne egu ne o eng’ achek? 47Ak kingonai Jesu kabwatutikab mugulelwekwak, konam lakwet ne ming’in, ak konde ye negit inendet, 48ak kilenji ichek, Chi age tugul ne taachei lakwani ming’in eng’ kainennyu ko kataacha: ak chi age tugul ne taacha ko kataach inendet ne kiiyokwa: amu inendet ne ming’in eng’ okwek tugul, ko noto ne o.

Kowendi Jesu Jerusalem: mataachei Samarik inendet

49Ak kiwolji Johana kolenji, Konetindoni, kogigeer chi koonei oik eng’ kaineng’ung’; ak kogiete, amu magibendoti tugul. 50Ago kilenji Jesu inendet, Amoete inendet: amu inendet ne magirindook ko neng’wong’.

Kowendi Jesu Jerusalem: mataachei Samarik inendet

51Ak ye ki negit mising’ koit betusiek che kitaage inendet eng’ barak, kogiiljigei kotokyi togennyi Jerusalem; 52koyokto che ibei ng’alek koba kondoe inendet: koba anyun, komong’ji nganaset age ne bo Samarik, ak kochopchi oldo. 53Ak ma taach inendet, amu kiga kotokyi togennyi Jerusalem. 54Ak ye kingogeer noto alamalyennyi Jakobo ak Johana, kolenji, Kiptaiyandani, tos imache keng’at mat kochorgei eng’ kipsengwet, si kowong’ icheget [ko u ye kiyai Elija]? 55Ago kiweleljigei ichek, ak koger kong’. 56Koba anyun nganaset age.

57Ak kingota kobendi eng’ oret, kolenji chito age, Asubun eng’ oldo tugul ole iwendi. 58Kolenji Jesu inendet, Tineyi lelwek keringonik, ak kotinyei taritik che bo barak kesonok; ago matinyei Weritab chi ole indoi metinnyi.

59Ak kilenji age, Isubwa. Ago kilenji chichoto, Kiptaiyandani, chamwa awa korok atub baba.

60Ago kilenji, Bagakte che begu kotub chechuak che begu; ago ui inye ak iamdaate ng’alekab bounatetab Jehovah.

61Kole age agine, Tun asubun, Kiptaiyat; ago chamwa korok awa agochi bikab gonnyu saisere. 62Ago kilenji Jesu inendet, Mami chi ne namei mogombetab tuga, ak kogusgong’ kogeer let, ne nyoljin bounatetab Jehovah.

Currently Selected:

LUKA 9: BUKUIT

Highlight

Copy