LUKA 10
10
Boisiet ne kigiyoktoe alamalyet tamanwogik tisab, ak koweeksei
1Kingobata tuguchu kolewen Kiptaiyat bik alak tamanwogik tisab agichek, ak koyokto kobee aeng’ kole, kondoe inendet koba nganaset age tugul ak komosta age tugul ole tun bunoti. 2Ago kilenji ichek, O kesisiet ago ng’ering’ kesik: noto anyun osom Kiptaiyat ne bo kesisiet, si kobiit koyokyi kesik kesisiennyi. 3Oba: ogeero kaayoktok ko u arekab kechirek eng’ kwenutab suik. 4Amoib lolet, anan suberet, anan kweonik: amogat chi eng’ oret. 5Ak got age tugul ne omong’jini, omwa ole, Ingoteb kalyet eng’ goi. 6Ak ngo mitei weritab kalyet yoto, kotebe kalyeng’wong’ inendet: ak ngo mami, koweekyinogei okwek. 7Ak otebe goyoto anyun, ak tuguk che konok, oam ak oee: amu nyoljin kiboitiot melektanyi. Amoitote gorik. 8Ak nganaset age tugul ne omong’jini, ak kotaachak, oam tuguk che kindoi taing’wong; 9ak osoob che miandos eng’ oloto, ak olenji ichek, Kagorikyok bounatetab Jehovah. 10Ago nganaset age tugul ne omong’jini, ama taachak, omande obe ortinwekyik ak omwa ole, 11kagibukyok temburiek che bo nganaseng’wong’, che kanam kelyekyok; ago onai ni, ole, kagorik bounatetab Jehovah. 12Ago amwawok ale, Tun kaigaitu Sodom eng’ betunoto, kosiir nganasanato.
13Bwa we, Korasin! Bwa we, Betsaida! Amu nda kiga kiyai eng’ Turo ak Sidon boisionik che bo kamuktaet ko u che kogiyai eng’ okwek, ta kiga kosik keny, ak kotebe orek kolaachi kuniok. 14Ago tun kaigaitu Turo ak Sidon eng’ kiruoget, kosiirok. 15Ak inye Kapernaum, tos tun kitororin iwe kipsengwet? Kiwirjinin ng’ony kot iit oldab che kigobek.
16Inendet ne kasok kogasa agane; ak inendet ne esiok koesioa agane; ak inendet ne esioa koesioi inendet ne kiiyokwa.
17Kiweek anyun bichoto tamanwogik tisabu eng’ boiboindo, ak komwa kole, Kiptaiyandani, agot oik kogasech it eng’ kaineng’ung’. 18Ak kilenji, Kiageer Setani kochorugei eng’ kipsengwet ko u kalyelet. 19Ogeero, kaagonok kamuget si kobiit otiech erenok ak melmelwek, ak oterter kimnatet tugul ne bo bunyot: ak mami kiy ne imuchi kong’emak. 20Ago amoboiboitu amu ng’olyondoni, amu kasok it oik; ago oboiboitu amu sirotin kainaikwok eng’ kipsengwet.
Komwaei Jesu kongoi
21Eng’ sainato kobaibait Jesus eng’ Tamirmiriet ne Tilil, ak kole, Aweegun kongoi, ee Baba, Kiptaiyat ne bo kipsengwet ak ng’ony, amu kiiung’e tuguchu che ng’omen ak che ingen, ak kiing’ang’ji manyurunik: ee, Baba; amu kichamak ko u noto eng’ taing’ung’.
22Kigogona tuguk tugul Baba: ak mami chi ne ingen Werit kole ng’o, kobate Kwanda; ama nai chi Kwanda kole ng’o, kobate Werit, ak chi age tugul ne chamei Werit, kong’ang’jin.
23Ak kiweleljigei alamalyet, ak kolenji eng’ ung’ot, Iberurotin konyek che keerei tuguk che ogeere: 24amu amwawok ale, kimachei maotik che chang’ ak laitorinik kogeer tuguk che ogeere, ago kima keer; ak kimachei kogas tuguk che ogase, ago kima kas.
Ole kinyorundoi sobondab koigeny
25Ogeero, kitonon ng’omotiot age ne bo ng’atutik koyom inendet, kole, Konetindoni, ayai nee si tun anyoru sobondab koigeny? 26Ak kilenji, Kigisir nee eng’ Ng’atutik? Isomandoi ano? 27Ak kiwolji inendet kolenji, Cham Kiptaiyat Jehovah neng’ung’ eng’ muguleldang’ung’ komugul, ak eng’ sobondang’ung’ komugul, ak eng’ kimnateng’ung’ komugul, ak eng’ ng’omnateng’ung’ komugul; ak icham chitab kokweng’ung’ ko u ye ichamdoige. 28Ak kilenji, Kewolu komie: yai ko u noto, si isob.
29Ago ye kimachei komieitgei, kolenji Jesu, Ng’o chitab kokwennyu?
Kalewenet agobo Samarindet ne mie
30Kowolji Jesu kolenji, Kichortaegei chito age Jerusalem kwo Jeriko; ak kotuiyo ak rebik, che kirebe ngoroik ak kobir, ak koba, kobagakta ko negit kome. 31Ak kichortaegei tisiindet age oranato: ak kingogeer inendet korob taban. 32Ak ye kingoit Lawindet yoto, ak kogeer, korob taban agine ko u noto. 33Ago ye kita kowendi Samarindet age eng’ bandanyi, koit ye mi chichoto: ak ye kingogeer inendet, korire, 34kwo ole mi inendet, koratyi ole kagibir, ak kosachinot mwaita ak divaik; ak kiganapchi chichoto sigiriennyi, ak komut kwo gotab toek, ak korib inendet. 35Ak mutai konem denarisiek aeng’, kogochi chitab kobo got, ak kolenji, Rib inendet; ak tuguk alak tugul che inyae che siirei chu, kotun kaweege, anyo ayaagun. 36Eng’ chuto somok, ilen ng’o ne kiek chitab kokwennyi eng’ chichoto kituiye rebik? 37Ak kile, Inendet ne kiriregei chichoto. Ak kilenji Jesu, Ui, iyai ko u noto.
Marta ak Maria
38Ak ye kita komi bandanywa, komong’ji anyun nganaset age: ak kitaach eng’ gonnyi kobogoriot age ne keguure Marta. 39Ak kitinyei chepkamet ne kiguure Maria, ne kitebyei eng’ ole bo kelyekab Kiptaiyat, kogasei ng’olyondennyi. 40Ago kiimgei Marta eng’ boisionik che chang’; ak konyonji inendet ak kolenji, Kiptaiyandani, meiti kiy ak kabagakta tupchennyu abois anege? Mwachi anyun kotoreta. 41Ago kiwolji Kiptaiyat kolenji, Marta, Marta, igereri met ak iimige agobo tuguk che chang’: 42ago kit agenge ne kemachei: amu kagolewen Maria kebeberta ne mie, ne magirebe.
Currently Selected:
LUKA 10: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
