LUKA 11
11
Saet ne kiinet Kiptaiyat bik
1Ak ye kita kosaei eng’ oldo age, ak kingoges, kolenji age eng’ alamalyennyi, Kiptaiyandani, inetech kesa, ko u ye kiineti Johana alamalyennyi. 2Ak kilenji ichek, Ye osae, omwa ole, Kwandanyo, ingotililit kaineng’ung’. Ingonyo bounateng’ung’. [Ingoyaak mageng’ung’ ko u eng’ kipsengwet, ko u noto eng’ ng’ony.] 3Konech amitwogikyok eng’ betut age tugul. 4Ak inyoiywech kaat tengekwogikyok; amu achek kenyochini kaat besenikyok. Amemutech ole mi yomset.
Saet ne kigiilijinige; kalewenet agobo chi ne kiwa ole mi choruennyi kemoi kwen
5Ak kilenji, Ng’o eng’ okwek ne tinyei choruet, ak kwo ole mi kemoi kwen, ak kolenji, Choruani, kona makatinik somok abesen; 6amu kagoit choruennyu ne bunu rutoi, amatinye kiy ne agochini; 7kowolji ne mi go, kolenji, Amat iima: kaager kurget, ak kageruiye ak lagokyuk; ma amuchi ang’eet agonin? 8Amwawok ale, agot ngo mang’eet kogochi, amu choruennyi, ko amu somsennyi ko noto ne igochin kong’eet kogochi kiy tugul ne machei. 9Ak amwawok agane ale, Osom, si kegonok; ocheng’, si onyoru; ogongony, si keyatwok. 10Amu age tugul ne somei, kigochin; ak nyoru ne cheng’ei; ak inendet ne igongonyi keyatyin. 11Ak ng’o eng’ okwek kwanda ne ngo som werit makatiat, ko tos igochi koita? Anan ngo som njiriot, ko tos igochi erenet kogeere njiriot? 12Anan ngo som koitab ingok, ko tos igochi melmeldo? 13Ngongen okwek che o yaach ogochi lagokwok tuguk che miach, siirei anyun ne tia kagoitoet ne igochin Kwandang’wong’ ne mi kipsengwet Tamirmiriet ne Tilil ichek che somei inendet!
Kowelu Jesu kataamset ne kegimwa kele boisiei koboto Setani
14Ak kion inendet oindet ne namat kut. Ak ye kingo kagomanda oindet, kong’alal anyun ne ki namat kut; ak kikwong’io tuiyosiek. 15Ago kile alak, Onei oik eng’ Beelsebul, laitoriat ne bo oik. 16Ak kitiem alak inendet komage kaborunet ne bunu kipsengwet. 17Ago kinai inendet kabwatutikwak, kolenji, Bororiet age tugul ne pchegei ko ng’emaksei; ak got age tugul ne pchegei kolulei. 18Ak ngo pchegei agine Setani, kotonondoi ano bororiennyi? Amu omwae ole, aone oik eng’ Beelsebul. 19Ngot aone oik eng’ Beelsebul, koonei werikwok eng’ ng’o? Noto anyun ne igochin icheget koek kiruogikwok. 20Ago ngot aone oik eng’ mornetab Jehovah, ko kanyonjok anyun bounatetab Jehovah.
21Ak chi ne tinyei kimnatet ak kotinyei karikyik che ribe gonnyi, kotebyei tugukyik eng’ kalyet: 22ak ye nyonji chito ne kim kosiir inendet, ak koterter, korebe anyun inendet karikyik tugul che cham komang’u, ak kopcheita bareiywekyik. 23Inendet ne magimi tuwai kogirindaa; ak inendet ne magiyumi tuwai koiyestooti.
Kanyol keripge agobo tililindo ne ma nyiitat
24Ye kagomanda tamirmiriet ne muruon eng’ chito, kosiir ole mami beek, kocheng’oti ole imuung’e; ak ye mata konyor, komwa anyun kole, Kaweektege gonnyu ole kiabunu. 25Ak ye it, konyor kobugot ak ko chobot. 26Kwo anyun, komut tamirmirik tisab alak che yaachen kosiir inendet; kochut anyun orit ak komeny oloto: ak yaitu kagesunetab chichoto kosiir ne bo tai.
27Ak ye kita komwaei ng’alechu, komwa kobogoriot age eng’ tuiyet, kole, Iberurot moet ne kisichin, ak kinaik che kiirerie. 28Ago kile inendet, Iberurotin kosiir che kasei ng’olyotab Jehovah, ak korib.
Kateunet agobo bik che cheng’ei kaborunoik
29Ak ye kingoyumjingei inendet tuiyosiek, kotoi komwa kole, Ibini, ko ibinda ne ya: cheng’ei kaborunet; ago magigochin kaborunet kobate kaborunetab Jona. 30Amu ko u ye kiek kaborunet Jona eng’ bikab Ninebe, ko u noto Weritab chi eng’ ibini. 31Tun ng’eetei laitoriat kobogoriot ne bo murot ne bo tai eng’ kiruoget koboto bikab ibini, ak koruokyi ichek: amu kibun tabanwekab emet konyo kogas ng’omnatetab Solomon; ak ogeero, mitei yu ne o kosiir Solomon. 32Tun tonondos bikab Ninebe ak ibini eng’ kiruoget, ak koruokyi: amu kisik ichek eng’ amdaetab Jona; ak ogeero, mi yu ne o kosiir Jona.
Ng’alek che kinetegei tait
33Mami chi ne ngo kagonaam tait, konde ole ung’at, anan kitonget orit, ago indoi kit ne tonone, si kobiit kogeer lapkeiyet che bendi go. 34Taitab bortang’ung’ kondang’ung’: ngo mie kondang’ung’, ko nyiitat bortang’ung’ komugul lapkeiyet; ago ngo ya kondang’ung’ ko nyiitat bortang’ung’ agine mesundeito. 35Keer anyun ngo lapkeiyet ne mi oring’ung’ ko mesundeito. 36Ngo nyiitat bortang’ung’ komugul lapkeiyet, ama tinyei ye imen, kolapkeitu anyun bortang’ung’ tugul, ko u ye konin lapkeiyet tait ne ikweng’sei komie.
Kogerei kong’ Jesu Parisaik ak sirik
37Ak ye kita kong’alali, koguur Parisaindet age kwo koamis tuwai: ak kiwa go ak koteb ng’ony koamis. 38Ak ye kingogeer Parisaindet, kokwong’, amu kiamis ama iun eut korok. 39Kolenji Kiptaiyat, Okwek Parisaik, ouni barak kikombet ak sanit; ago nyiitat oring’wong’ rebisiet ak yaitiet. 40Okwek che o berber, inendet ne kiyaei sang’ ko ma ne kiyaei orit agine? 41Ogoite kagochinoik che bo tuguk che mi orit; ak ogeero, tililitu tuguk tugul eng’ okwek.
42Ago bwa okwek Parisaik! Amu ogoitoi kebebertab taman ne bo heduosmon ak ketik che mengech che ng’uu, ak che bo sogek alak tugul, ak ometoi kiruoget ak chamnyetab Jehovah: ago kita nyolu oyai chuto, amomete chun alak.
43Bwa okwek Parisaik! Amu ochame ng’echerok che tororen eng’ sunagogisiek, ak kagatosiek che kigatok eng’ oldinwekab aldaisiet. 44Bwa okwek! Amu o kerge ak kererisiek che matoogu, ama naei bik che bunoti barak.
45Ak kiwolji ng’omotiot age ne bo ng’atutik, kolenji, Konetindoni, ngot imwa ko u noto ko ketewerech agachek. 46Ak kole, Bwa okwek ng’omotikab Ng’atutik! Amu oganapchini bik lautik che bichien eng’ laiset, ago okwek ko motwae lautichoto agot eng’ mornet agenge. 47Bwa okwek! Amu oteeche kererisiekab maotik, ago kibarei kwanisiekwok. 48Kioegu anyun baorinik ak ochamnyechini boisionikab kwanisiekwok: amu icheget che kibarei ak oteeche okwek kererisiekwak. 49Kile anyun ng’omnatetab Jehovah amu noto, Tun ayokyini maotik ak che kiyoktoi; ak kobar alak eng’ ichek ak kousaus alak; 50si kobiit komage ibini, korotikab maotik tugul, che kigitumda koboch ko kagilumda ng’ony; 51koboch korotikab Abil agoi korotikab Sakaria, ne kime eng’ kwenutab kaptisisiet ak gotab Jehovah: ee, amwawok ale, tun kimage ibini.
52Bwa okwek ng’omotikab ng’atutik! Amu kioib yateiywot ne bo ng’omnatet ama obe orit okweget, ak kioger che kita mong’jin.
53Ak ye kingomong’ eng’ oloto, kotoi sirik ak Parisaik koriich inendet mising’, ak kogilgilye, si kobiit komwa ng’alek che chang’; 54korib kole tamangab konyor ng’olyo ne mong’une kutinnyi.
Currently Selected:
LUKA 11: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
