LUKA 8
8
Kobogorisiek che kiboisiechi Jesu
1Ak kingobata noto, ne matianit, kowendote nganasok che eechen ak che mengechen koamdaati ak komwaitaati logoiywek che miach che bo bounatetab Jehovah, ak kimi tamanu ak aeng’ koboto inendet, 2ak kobogorisiek alak che kiga kosoob eng’ tamirmirik che yaachen ak mianwek, Maria ne kiguure Magdalene, ne kimandae oik tisabu, 3ak Joana osotiotab Kusa kiboitiotab Herod, ak Susana, ak kobogorisiek alak che chang’, che kiboisiechin inendet eng’ tugukwak.
Kalewenet agobo kolindet
4Ak kingo yomogei tuiyet ne o, ak kobwanji inendet che kibunu nganaset age tugul, kong’alal eng’ kalewenet kole: 5Kiwa kolindet koleta keswekyik: ak ye kita koletoi, kobutyi alak oret taban; ak kigitiegat, ak koam taritik che bo barak. 6Ak kiibutyi alak ruandet; ak ye kingobityo, koyaamnyo, amu manyor beek. 7Ak kiibutyi alak kwenutab katok; ak kibityo katok koboto keswechoto, ak kogiich. 8Ak kiibutyi alak ng’ung’unyek che miach, ak kobityo, ak koi age tugul bogol. Ak ye kita komwaei tuguchu, komwa eng’ kutit ne o, kole, Inendet ne tinyei itik che kastoe, kogas.
9Ak kiteebe alamalyennyi ole teptoi kalewenoni. 10Ak kile, kagigonok okwek onai ung’otik che bo bounatetab Jehovah: ago kimwachin alak eng’ kalewenaik; si ye keertoi ko mageerei kiy, si ye kasei ko manaei.
11Kalewenonoto ko ni: Keswek ko ng’olyotab Jehovah. 12Ak choto mi oret taban ko icheget che kigogas; yeityo konyo oindet, ak konem ng’olyot eng’ mugulelwekwak, si manyor kayanet ak kesor. 13Ak icheget che mi ruandet barak, ko ye kagas ng’alek, koyan eng’ boiboiyet, ak matinyei tigitik, iyani ne matia, ak kochuchuigei eng’ betutab yomset. 14Ak che kiibutyi katok, ko icheget che kigas, ak ye kaba kogiich kererwekab met ak magornatosiek, ak boiboiyetab tugukab soboni, ama iyo logoek che nyiitotin. 15Ak che mi ng’ung’unyek che miach, ko icheget, che ye kagogas ng’olyot, konam komie, eng’ mugulelwek che bo telunatet ak ko miachen, ak koiiyo logoek eng’ kagiiletab ge.
16Mami chi, ne, ye kagonaam tait, kotuge kiy, anan konde kureretab itogut; ago indoi kit ne tonone tait, si kobiit kogeer lapkeiyet bik che bwanei go.
17Amu mami kiy ne keunyei, ne matun ng’ang’oksei; ama mi kiy ne bo ung’ot, ne matun naaksei eng’ ole lapkei.
18Oripge anyun eng’ ole ogastoi: amu age tugul ne tinyei, ko tun kigochin; ak inendet ne matinyei, ko tun kirebe agot ne len tinyei.
Tupchonatet ne bo iman
19Ak kibwanji inendet kamet ak che tupcho, ago kima imuch korikyi amu chang’indab bik. 20Ak kigimwachi kelenji, Tonondos komet ak che otupche eng’ sang’, machei kogeerin. 21Ago kiwolji kolenji, Kamennyu ak che kitupche ko chu kasei ng’olyotab Jehovah, ak koyai.
Kogerei kong’ Jesu usonet ne o ak wasetab ge ne bo beek
22Ak kilany moingetab beek eng’ betut age eng’ betusiechoto, koboto alamalyennyi; ak kilenji, Ongelandae araraita kebe bitonin: kotoi anyun koba. 23Ak kingota kobendi, koru Jesu konuuch: kochorjigei anyun usonet ne o araraita; kot komachei konyi beek moinget ak kinyonji ng’oiyondit. 24Ak kibwa ole mi inendet, ak kong’eet, kolenji, Konetindoni, konetindoni, kagibegu. Kong’eet anyun, ak koger kong’ usonet ak wasetab ge ne bo beek: kosis anyun araraita komung’do. 25Ak kilenji ichek, Mi ano kayaneng’wong’? Kiiyweis ak kokwong’io, kolenjigei ichegei, Ng’o chichi anyun, ne ng’atei agot usonet ak beek, kot kogas it inendet?
Kisoobi chito ne bo emetab Gerasenik, ne kitinyei oik
26Kiit anyun emetab Gerasenik, ne tokyingei Galili. 27Ak ye kingonyo ngegutab araraita, kotuiyo ak inendet chito age ne kibunu nganaset, ne kitinyei oik; ak kima kolaachi ngoroik koboch betusiek che chang’, ak kima komenyei go, ago kitebote kererisiek. 28Ak kingogeer Jesu, kowaach ak kobutyi tainnyi, ak kimwa eng’ kutit ne o, kole, Ating’enen nee, Jesu Weritab Jehovah ne toror Mising? Kasomin ale, amenyalila. 29Amu king’at tamirmiriet ne muruon komong’ eng’ chichoto. Amu kiga nam eng’ betusiek che chang’: ak kigiribei mising’, ak kiga kirate sirimwek ak mugurek; ak king’etyei tuguk che kirate, ak kionei oindet inendet kwo surkwen. 30Ak kiteebe Jesu, kolenji, Kiguurenen nee? Ak kile, Chang’indo; amu kiga chut oik che chang’ inendet. 31Ak kisom kole, si mang’at koba keringet ne matinyei ole bochin.
32Ak kimi oloto akwet ne o ne bo torok che kiagetos eng’ tulwet: ak kisom ichek mising’ kole, kochamji kochut torochoto. Kochamji anyun. 33Ak kimong’ anyun oik eng’ chichoto, ak kochut torok: ak kiruai akwet kochortaegei chemng’esut koba araraita, ak kobek.
34Ak kingogeer che kiiyagisiei tuguk che kabiit, komwaei, ak koba komwaita eng’ nganaset ak eng’ emet agobo noto. 35Ak kiba kogeer kit ne kagoyaak; ak kibwa ole mi Jesu, konyor chichoto ne kamandae oik, kotebyei eng’ kelyekab Jesu, kolaagat, ak kotinyei ng’omnatennyi: ak kiiywei. 36Ak kimwachi ichek che kageerei tuguk che kabiit, ole kagisoopto chito ne katinyei oik. 37Ak kisom anyun bik tugul che bo ole negite emetab Gerasenik kole, kwo kobagakta ichek: amu kiga nam ichek kaiyweisiet ne o: ak kilany moingetab beek, ak koweektagei. 38Ago kisom inendet chito ne kamandae oik kole, kotebi tuwai: ago kimwachi kwo, kolenji, 39Iweekyigei gong’ung’, ak imwaite tuguk che eechen che kagoyaun Jehovah. Ak kiwa anyun, komwaitaat eng’ nganaset komugul tuguk che eechen che kagoyachi Jesu.
King’eeti cheptab Jairu, ak kisoobi kobogoriot ne kimandae korotik
40Ak ye kiweeksei Jesu, kotaach tuiyet; amu kiigeni bik tugul inendet. 41Ak ogeero, kinyo chito age ne keguure Jairo; ki bounindetab sunagogit: ak kiibutyi kelyekab Jesu, ak kosom inendet kole, konyo gonnyi: 42amu kitinyei chepto ne kigii inegei, ne ki bo olo bo kenyisiek taman ak aeng’, ak ki negit kome. Ago kiigiigoti tuiyosiek inendet kowendi. 43Ak kimi kobogoriot age ne kimandae korotik kenyisiek taman ak aeng’, ne kiga koboisie tugukyik tugul eng’ chepkerichinik, ama imuch kosoob inendet age tugul eng’ ichek. 44Kinyo anyun kobun let eng’ inendet, ak kotwa tabandab ngoriennyi: ak ngunoto kosisyo korotik. 45Ak kile Jesu, Ng’o ne katwaa? Ak kingotiiyo tugul, kolenji Petero ak che kimi koboto inendet, Konetindoni, kariichin tuiyosiek ak kagogiichin. 46Ago kile Jesu, Kagotwaa chi: amu kaanai ale, kagomandaena kimnatet. 47Ak ye kingogeer kobogoriot kole, ma imuch koung’ak, konyo kobotanonu, ak kobutyi ng’ony eng’ tainnyi ak komwaita eng’ taitab bik tugul kit ne kaigochi kotwa inendet, ak ole kagisoopto ngunoto. 48Ak kilenji, Chebi, kagosoobin kayaneng’ung’; ui eng’ kalyet.
49Ak ye kita kong’alali, konyo chi ne kibunu oldab bounindetab sunagogit, kole, Kagome cheptang’ung’ amatata iim Konetindet. 50Ago kingogas Jesu, kowolji kolenji, Ameiywei: iyan kityo, si kisoob.
51Ak ye kingo kagoit got, koma kochamji chi age tugul kwo go koboto inendet, kobate Petero, ak Johana, ak Jakobo, ak kwandab cheboto ak kamet. 52Ak kirirtos bik tugul, ak koteeitos agobo inendet: ago kile, Morirtosi; amu ma me inendet, ago inuuchi. 53Ak kirorechi inendet anyun kochot, amu kiingen kole kagome. 54Ago kinam inendet eutab cheboto, ak koguur, kole, Chebi, ng’eet. 55Koweek anyun tamirmiriennyi, ak kong’eet ngunoto: ak king’at kole, kigochi kiy ne amei. 56Ak kikwong’io mising’ sigikyik: ak king’at inendet ichek kolenji, amomwachi chi age tugul kit ne kagoyaak.
Currently Selected:
LUKA 8: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
