LUKA 7
7
Kisoobi otwogindetab kiptaiyatab bogol
1Ak kingo kagogesyi ng’alekyik tugul itikab bik, kwo anyun Kapernaum. 2Kimi kiptaiyatab bogol, ne kitinyei otwogindet ne kichamei kot, ak kimiani otwogindonoto ne ki negit kome. 3Ak ye kingogas agobo Jesu, koyokto inendet boisiekab Yahudik, koba komwachi konyo kosoob otwogennyi. 4Ak ye kingoit icheget ole mi Jesu, kosaisai inendet mising’, kolenji, Nyoljin inendet iyachi ko u noto: 5amu chamei bororiennyo, ak kiteekwech inendet sunagoginnyo. 6Kwo anyun Jesu koboto icheget. Ak ye kima kota ko loo eng’ goyoto, koyokto kiptaiyandanato choronokyik koba ole mi inendet ak kolenji, Kiptaiyandani, amata iimge: amu ane, ko ma a chito ne nyolu inyo gonnyu: 7noto anyun, agot ane, ko ma aiitge ale nyolu anyonjin: ago mwa ng’olyot kityo, ak kosob otwogindennyu. 8Agot ane, nganda a chi ne kiboiywa, atinye askarik che abou, ak ngalenji ni, Ui, kwo; ak ngalenji age, Nyo, konyo; ak ngalenji otwogindennyu, Yai ni, koyai.
9Ak ye kingogas Jesu ng’alechuto, kokwong’ agobo inendet, ak kiwelelgei ak kolenji tuiyet ne kiisubi inendet, Amwawok ale, tom anyoru kayanet ne o ne te ni, achicha, agot eng’ Israel. 10Ak kingoweek anyun che kiga kiyokto, koba ga, konyor otwogindonoto ko kagosob.
King’eeti weritab mosoget eng’ Nain
11Ak ye kingo kagobata betunoto, kwo nganaset ne kiguure Nain; ak kiba alamalyennyi koboto inendet, ak tuiyet ne o. 12Ak ye kiga rikta ormarichetab nganaset, ogeero, kigisutei musto, ne ki werit ne kii kamet inegei, ak ki mosok chebiosonato: ak kimi koboto inendet bik che chang’ che bo nganaset. 13Ak ye kingogeer Kiptaiyat inendet, korire, ak kolenji, Amat irir. 14Ak kirikta ye negit ak kotwa kit ne kigisute inendet: ak kitononso anyun che kisutei. Ak kilenji Jesu inendet, Neranani, kamwaun ale, Ng’eet. 15Ak king’eet anyun ne koga kome, ak kotoi kong’alal. Ak kiigochi kamet. 16Ak kiiyweis tugul: ak kolos Jehovah, kole, Kagong’eet eng’ kwenunnyo maotiot ne o: ak, Kagorutochi Jehovah bikyik. 17Ak kiyom ng’olyondonito agobo inendet Judea komugul, ak korotinwek tugul che kiyiem oloto.
Johana kabatisanindet
18Ak kimwachi alamalyetab Johana inendet tuguchuto tugul. 19Ak kiguurjigei Johana aeng’ che bo alamalyennyi ak koyokto koba ole mi Kiptaiyat, koteebe kole, Tos inyendet ni nyonei, anan kigeni age? 20Ak ye kiga it bik ole mi inendet, kolenji, Kagoyokwech Johana Kabatisanindet kebwa ole imi, kole, Tos inyendet ne nyonei, anan kigeni age?
21Eng’ sainato kosoob che chang’ che kitinyei mianwek ak korotwek ak tamirmirik che yaachen; ak kiigochi kipkoratinik che chang’ kogeerto. 22Kowolji kolenji, Oba omwachi Johana tuguk che kaogeer ak che kaogas; kigochin kipkoratinik kogeerto, ak bendoti che koing’waldos, kitilili che tinyei mogondosik, ak kastoi che ming’otin, king’eeti che kigobek, kiamjin kibananok logoiywek che miach. 23Ak baibai age tugul ne manyorunena kanagut.
24Kingo kagoba che kiga koyokto Johana, kotoi komwachi tuiyosiek agobo Johana, kole, Kiomande surkwen ogeer nee? Tegat ne itumdumi usonet? 25Ago kiomande ogeer nee okwek? Chito ne ilaachi ngoroik che tangusen? Ogeero, icheget che ilaachi ngoroik che bo lelesta, ak che meng’isiei eng’ talbisto, komitei gorikab laitorinik. 26Ago kiomande ogeer nee? Maotiot? Ee, amwawok ale, siirei maotiot. 27Nito ne kigisir agobo inendet, kele,
Ogeero, ayoktoi kiboitiondennyu kondoenen,
Ne chobei oreng’ung’ eng’ taing’ung’.
28Amwawok ale, Eng’ che kisich kobogorisiek ko mami ne o ne siirei Johana: kobate inendet ne ming’in eng’ bounatetab Jehovah ko o kosiir inendet.
29Ak ye kingogas bik tugul, koboto taagikab aisurut, koiityi imanda Jehovah, amu kiga kibatisan eng’ kabatisanetab Johana. 30Ago kiesio Parisaik ak ng’omotikab Ng’atutik, kiruogutikab Jehovah, ma makyigei, amu kima ibatisan inendet icheget.
31Ak kile Kiptaiyat, Aroge nee bikab ibini, ak kergei ak nee? 32Kergei ak lagok che tebyei eng’ oldab aldaisiet, ak koguuregei; kolen, Kigegutwak ndurerusiek, ak ma oureren; kigirirjok, ak ma oririe. 33Amu kinyo Johana Kabatisanindet ama am makatia anan divaik; ak omwae anyun ole, Tinyei oindet. 34Kinyo Weritab chi koamis ak koeeiso; ak omwae ole, Ogeero, kipkeiya chichi, ak eeindetab divaik, choruetab taagikab aisurut ak kiptengeginik! 35Ak naat ng’omnatet kele bo iman, eng’ lagokyik tugul.
Kiile mwaita kelyekab Jesu; kalewenet agobo besenik aeng’
36Ak kimach age eng’ Parisaik kole koamis ak inendet. Ak kiwa gotab Parisaindonoto, ak koteb ng’ony koamis. 37Ak ogeero, kobogoriot age ne kimi nganaset, ne ki kiptengekyo; ye kingonai kole, tebyei ng’ony Jesu koamisiei eng’ gotab Parisaindonoto, koib chubait ne mi mwaita ne nyamdut, 38ak kitonon eng’ let ole negite kelyekyik, korirei, ak kitoi kosachi beekab kong’ kelyekyik, ak kouuse sumeekyik, ak kong’utut kelyekyik ak koiile mwaata. 39Ak ye kingogeer noto Parisaindonoto ne kiguurei inendet, komwa eng’ orinnyi, kole, Nda ka maotio chichi, ta kagonai kole ng’o kobogoriondoni katwa inendet, ak chi ne u nee, kole kiptengekyot. 40Ak kiwolji Jesu inendet kolenji, Simon, atinye ng’olyot ne amache amwaun. Ak kile, Konetindoni, mwa anyun. 41Kole, Kimi besendoindet anum ne kitinyei besenikyik aeng’: kibesen age denarisiek bogol mut, ak kibesen age konom. 42Ak ye kima kotinyei kiy ne yaakyin, konyochi kaat ichek tuwai. Ng’o anyun eng’ ichek tuwai ne chamei inendet kosiir? 43Kowol Simon kole, Alen inendet ne kiginyochi kaat che chang’. Ak kilenji, Kairuoch komie.
44Ak kingoweleljigei kobogoriot, kolenji Simon, Igeere kobogoriondoni? Kaanyo gong’ung’ ama inaga beek aune kelyekyuk: ago kagosachi kelyekyuk beekyik bo kong’ kobogoriondoni, ak kouuse sumeekyik. 45Ma ing’ututa; ago inendet, koboch ngab anyo, kotomo kobagakta kong’utut kelyekyuk. 46Ma iile metinnyu mwaita: ago kagoiile ine kelyekyuk mwaita ne nyamdut. 47Noto anyun ne kamwaun ale, kagenyochi kaat tengekwogikyik, che ka chang’; amu chamei mising’: ago inendet ne kinyochin kaat kitigin, kochamei agine kitigin. 48Kolenji kobogoriondonoto, Kagenyoun kaat tengekwogiguk.
49Ak kitoi icheget che kimitei amisiet koboto inendet, komwa eng’ orinywa, kole, Ng’o ni kot konyochi kaat bik tengekwogik? 50Ak kilenji kobogoriot, Kagosorun kayaneng’ung’; ui eng’ kalyet.
Currently Selected:
LUKA 7: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
