LUKA 4
4
Yamstab Jesu
1Ak kiweek Jesu kobunu Jordan ko nyiitat Tamirmiriet ne Tilil, ak kiimut Tamirmiriet kwo surkwen 2ak kotebi betusiek artam koyomei oindet. Ak ma am kiy eng’ betusiechoto: ak ye kingogesgei betusiechoto, koam rubet. 3Ak kilenji oindet, Ngo i Weritab Jehovah, ing’at koi koek makatiat. 4Ak kiwolji Jesu inendet kolenji, Kigisir kele, Masobei chi eng’ makatiat inegei.
5Ak kiimut anyun oindet kotogosta, kwo koborji bororiosiek tugul che bo ng’ony eng’ sainato. 6Ak kilenji anyun oindet inendet, Agonin kimnatoni tugul, ak telunatenywa tugul; amu kigigona; ak agochini age tugul ne amakyini. 7Ngot iloswa anyun, eng’ tainnyu, kobunjinin tugul. 8Ak kiwolji Jesu kolenji, Kigisir kele, Ilosu Kiptaiyat Jehovah neng’ung’, ak iboisiechi inendet inegei.
9Kiimut anyun inendet Jerusalem, kwo kotonone kimonjogutab hekalut, ak kolenji, Ngo i Weritab Jehovah, iwirjige ng’ony eng’ yu: 10amu kigisir kele, Iyogu malaikaisiekyik agobo inye, si koribin:
11ak Kotaachin eng’ eunekwak, Si marus koita keldang’ung’.
12Ak kiwolji Jesu kolenji, Kigimwa kele, Meyom Kiptaiyat Jehovah neng’ung’. 13Ak ye kingoges oindet yomset age tugul, kobagakta inendet ne matia.
Jesu eng’ Nasaret
14Koweek anyun Jesu Galili eng’ kimnatetab Tamirmiriet: ak kiyom logoiywek korotinwek tugul agobo inendet eng’ ole negite oloto. 15Ak kiinetisiei eng’ sunagogisiekwak, ak kiilos inendet bik tugul.
16Kinyo anyun Nasaret, ole kinerjin: kiwa sunagogit, eng’ betutab sabato, ko u ye kicham kowendi, ak kotonon si kobiit kosoman. 17Ak kigigochi inendet bukuit ne mamanat ne bo maotiot Isaia. Ak king’any bukuit, konyor ole kigisir kele,
18Mi Tamirmirietab Kiptaiyat kobota,
Ami kiila si kobiit aamji kibananok logoiywek che miach:
Kiiyokwa si kobiit aamji luulenik katiaget,
Asi kobiit kogeerto kipkoratinik,
Ak atiach che kigiguoten.
19Si kobiit aamda kenyit ne chamat eng’ Kiptaiyat.
20Ak kimaman bukuit, ak koweekyi kogeny kiboitiot, ak koteb ng’ony: ak kiichiilji kong’ inendet bik tugul che kimi sunagogit. 21Ak kitoi kolenji bichoto, Kagosulda rani sirutioni eng’ itikwok. 22Ak kibaorianji tugul inendet, ak kokwong’io eng’ ng’alek che bo mieindo che kamong’une kutinnyi: ak kile ichek, Tos ma weritab Josep nito?
23Ak kiwolji ichek kolenji, Iman omwawa kalewenoni, Isoopge inye, chepkerichot: tuguk tugul che kigegas kele kiyaak eng’ Kapernaum, iyai choto agichek eng’ yu eng’ emoning’ung’. 24Ak kilenji, Amwawok iman, ale, Mami maotiondo ne chamaksei eng’ emennyi. 25Ago amwawok iman ale, Kimi mosogik che chang’ Israel eng’ betusiek che bo Elija, yu kiga kiger kipsengwet kenyisiek somok ak arawek lo, yu kiga nyo rubet ne o emet tugul; 26ago ma kiyokto Elija kwo oldab age eng’ ichek, kobate kiwa Sarepta eng’ emetab Sidon agoi oldab kwondo age ne ki mosok. 27Ak kimi che chang’ che kitinyei mogondosik eng’ Israel eng’ betusiekab maotiot Elisha; ak kima kisoob chi eng’ ichek kobate Naaman inegei, Suriaindet. 28Ak kinyi neregek ichek tugul eng’ sunagogit ye kingogas ng’alechuto; 29ak king’eetyo kotoorta inendet komanda eng’ nganaset, ak kiimut kwo tulwet barak ole kigiteech nganasenywa, kolen kotoortae chemng’esut. 30Ago kisiirtoe kwenunywa kwo.
Kisoobi chi ne tinyei tamirmirietab oindet ne muruon
31Ak kichorjigei anyun Kapernaum, nganaset ne bo Galili. Ak kiinet bik eng’ betutab sabato: 32ak kikwong’io eng’ konetisiennyi; amu kitinyei kimnatet ng’olyondennyi. 33Ak kimi chi sunagogit, ne kitinyei tamirmirietab oindet ne muruon; ak kiwaach eng’ waagat ne o, 34kole, Bagaktech! Kiting’ege nee ak inye, Jesu ne bo Nasaret? Kenyo inye si ibarech? Kaanain inye ale i Ne Tilil ne bo Jehovah. 35Ak kiger kong’ Jesu inendet, ak kolenji, Sis, ak imong’u eng’ inendet. Ak kingo kagowirji oindet kwenunywa, komong’une inendet anyun, komata koita kiy. 36Ak kikwong’io bichoto tugul, ak kong’alaljigei ichegei kole, Nee ng’olyondoni? Amu kang’at eng’ kimnatet ak kamuktaet tamirmirik che muruonen, si komong’. 37Ak kiyom anyun logoiywek komoswek tugul che bo emonoto agobo inendet.
Kosoobi kametab osotiotab Simon, ak kisoobi bik alak
38Ak kimanda eng’ sunagogit ak kwo gab Simon. Kiamei kametab osotiotab Simon eset ne korom; ak kisaisai bik Jesu agobo inendet. 39Ak kotonon eng’ ye negit, ak koger kong’ eset; kibagakta anyun eset inendet: ak ngunoto kong’eet ak koboisiechi ichek.
40Ak ye ki negit kororokta asista, komutyi bik tugul bikwak che kimiandos eng’ korotwek che terotin: ak kiigonoor eunekyik age tugul eng’ ichek, ak kosoob. 41Komong’une anyun oik bik che chang’, kowaachei kolen, Inyendet ko i Weritab Jehovah. Koger kong’ Jesu icheget, ma chamji kotwek, amu kiingen ichek kole, inendet ko Kristo.
42Ak ye kingo kagoeech, komong’ eng’ oloto kwo surkwen: ak kicheng’at tuiyosiek inendet, koba ole mi, komach icheget korany inendet kole, amat kwo kobagakta ichek. 43Ago kilenji ichek, Kanyolja aamda logoiywek che miach che bo bounatetab Jehovah eng’ nganasok alak agichek: amu kigiyokwa agobo noto. 44Ak kiamdaat anyun eng’ sunagogisiek che bo Galili.
Currently Selected:
LUKA 4: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
