LUKA 3
3
Johana Kabatisanindet ak ng’alekyik
1Ak eng’ kenyit ne bo taman ak mut ne bo laitornatetab Tiberio Kaisari, ye ki bounindet ne bo Judea Pontio Pilato, ak Herod ko ki kiruogindet ne bo Galili, ak ki kiruogindetab Iturea ak Trakoniti Pilipu ng’etab kametab Herod, ak ki Lusania kiruogindet ne bo Abilene, 2eng’ betusiek che bo tiseinatet ne o ne bo Anas ak Kaiapa, koityi anyun ng’olyotab Jehovah Johana weritab Sakaria eng’ surkwen. 3Ak kinyo komoswek tugul che bo tabanwekab Jordan, koamdooti kabatisanetab sigunet agobo nyoetab kaat ne bo tengekwogik; 4ko u ye kigisir eng’ bukuitab ng’alekab maotiot Isaia, kele,
Kutitab chi ne ititeni eng’ surkwen kolen,
Ochob oretab Kiptaiyat,
Olititoti ole bunoti.
5Tun kilong’u atebwet age tugul,
Ak tun kiribribi tulwet age tugul ne o ak ne ming’in:
Ak tun kilititi che kunuren,
Ak kichaboi ortinwek che sing’ortot:
6Ak tun keerei bik tugul yetunetab Jehovah.
7Kimwachi anyun tuiyosiek che kibendi ole mi inendet, si kobatisan, kolenji, Ee okwek lagokab erenokab ng’wonet, ng’o ne kagoteeiywok omweune nereknatet ne tun nyonei? 8Oii anyun logoek che nyoljin sigunet, amotau omwa eng’ mugulelwekwok ole, Kitinye kwandanyo Abraham: amu amwawok ale, eng’ koichu komuchi Jehovah kong’eetyi Abraham lagok. 9Agot nguno ko kaginde aiywet tigitikab ketik: noto anyun, ketit age tugul ne maiyei logoek che miach, keebei, ak kewirji ma.
10Ak kiteebe inendet tuiyosiek kole, Kiyai nee anyun? 11Ak kiwolji ichek kolenji, Inendet ne tinyei sumotik aeng’, kogochi ne matinyei; ak ingoyai ko u noto agine ne tinyei amitwogik. 12Ak kibwa agichek taagikab aisurut si kibatisan, ak kolenji inendet, Konetindoni, kiyai nee? 13Ak kimwachi ichek kolenji, Amomage bik tuguk che siirei che kiging’at. 14Ak kiteebe askarik agichek kolenji, Kiyai nee anyun achek? Ak kilenji, Amomu chi age tugul, anan orebe chi kiy; ago ingoyamak melekwekwok.
15Ak kingota kogeni bik kit ne biitu, ak kogereri met eng’ mugulelwekwak bik tugul agobo Johana, kolen ngo tos Kristo inendet; 16kowolji Johana ichek tugul kolenji, Abatisanok eng’ beek iman; ago nyonei inendet ne kim kosiira, ne manyoljina atiach anokab kweonikyik: ibatisanok inendet eng’ Tamirmiriet ne Tilil ak mat: 17tinyei keibet eng’ eunnyi, ak kotilili komie ruanyut, ak koyumji nganok chogennyi; ago beelei metetek eng’ mat ne ma misoksei.
18Kiamji anyun bik logoiywek che miach koboto kotigonutik alak che chang’. 19Ago ye kingo kagoger kong’ Johana kiruogindet Herod agobo Herodia, osotiotab ng’etab kam, ak agobo tuguk tugul che yaachen che kiga koyai Herod, 20kotesyi nito anyun chun tugul, noto ko kiger Johana eng’ korgoret.
Kabatisanet ne bo Jesu
21Ak ye kingo kagibatisan bik tugul, ak ko kagibatisan Jesu agine, ak ye kisaei, koyatak kipsengwet, 22ak kochorjigei inendet Tamirmiriet ne Tilil, eng’ kergeindab cheptuget, ak komong’une kutit kipsengwet kole, Inyendet ko i Werinnyu, chamanennyu; abaibai mising’ eng’ inye.
Tetutikab ibinwek che kigosiirto agobo Jesu
23Ak kingotau Jesu konetisiei, ko ki negit kenyisiek sosom, (kolen ichek abere) weritab Josep, weritab Heli, 24weritab Matat, weritab Lawi, weritab Melki, weritab Janai, weritab Josep, 25weritab Matatia, weritab Amos, weritab Nahum, weritab Esli, weritab Nagai, 26weritab Maat, weritab Matatia, weritab Semein, weritab Josek, weritab Joda, 27weritab Joanan, weritab Resa, weritab Serubabel, weritab Sealtiel, weritab Neri, 28weritab Melki, weritab Adi, weritab Kosam, weritab Elmadam, weritab Er, 29weritab Jose, weritab Elieser, weritab Jorim, weritab Matat, weritab Lawi, 30weritab Simeon, weritab Juda, weritab Josep, weritab Jonam, weritab Eliakim, 31weritab Melea, weritab Mena, weritab Matata, weritab Natan, weritab Daudi, 32weritab Jesii, weritab Obed, weritab Boas, weritab Salmon, weritab Nason, 33weritab Aminadab, weritab Armi, weritab Hesron, weritab Peres, weritab Juda, 34weritab Jakobo, weritab Isak, weritab Abraham, weritab Tera, weritab Nahor, 35weritab Serug, weritab Reu, weritab Peleg, weritab Eber, weritab Sela, 36weritab Kainan, weritab Arpaksad, weritab Sem, weritab Noa, weritab Lamek, 37weritab Metusela, weritab Enok, weritab Jared, weritab Maalaleel, weritab Kainan, 38weritab Enos, weritab Set, weritab Adam, weritab Jehovah.
Currently Selected:
LUKA 3: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
