LUKA 2

Signet Jesu

1Kibun anyun ng’atutiet Kaisari Agusto eng’ betusiechoto, kole, kesir kainaikab bik tugul. 2Ne bo tai sirisioni ye ki bounindetab Suria, Kurenio. 3Kiba anyun tugul si kesir, chi tugul eng’ nganasennyi.

4Kitogos agine Josep eng’ Galili, kobunu nganasetab Nasaret, agoi Judea, kot koit nganasetab Daudi, ne kiguure Betlehem, amu ki bo inendet gotab Daudi, ak ki bo orennyi; 5si kobiit kesir inendet koboto murerennyi Maria, ne ki chio. 6Ak kiit sigetab lakwet, kota komi oloto. 7Ak kisich werinnyi ne bo tai; ak kolaakyi ngoroikab lakwandit, ak komogonji kaptugut, amu kima komi boroindo eng’ gotab toek.

8Ak kimi emonoto mestowek che kitebyei eng’ kewet koribei akwenywa ne bo kechirek kemoi. 9Ak kitonon malaikaiyatab Kiptaiyat eng’ ole negite ichek, ak kiiluuchi lilindab Kiptaiyat komoswekwak tugul: koiyweis anyun mising’. 10Ak kilenji malaikaiyat ichek, Amoiyweisie; ogeero, aibwok logoiywek che miach che bo boiboiyet ne o ne ityin bik tugul: 11amu kagisikwok Yetindet rani, eng’ nganaset ne bo Daudi, noto Kristo Kiptaiyat. 12Ak nit kaborunet eng’ okwek: Onyoru lakwet ko kagilaakyi ngoroikab lakwandit, korue moinget ne amisie tuga.

13Ak kimi eng’ sainato koboto malaikaiyandanato chang’indab lugosiekab kipsengwet che kiilosu Jehovah kolen,

14Bo teegisto Jehovah, eng’ ole toror mising’,

Ak kalyet eng’ ng’ony eng’ bik che chamotin eng’ inendet.

15Ak kingo kagoweek malaikaisiek koba kipsengwet, kolenjigei mestowechoto, Ongebe nguno agoi Betlehem, si kobiit kegeer ng’olyondonito kagoyaak, ne kagoboruech Kiptaiyat.

16Ak kibwa anyun kochok, ak kinyor Maria ak Josep, ak lakwet korue moinget ne amisie tuga. 17Ak ye kingogeer kobarta mwaet ne kaga kemwachi agobo lakwanato. 18Ak kikwong’io tugul che kigas ng’alechato kimwachi mestowek. 19Ago kirib Maria ng’alechato tugul, kobwatoti eng’ muguleldanyi. 20Ak kiweek anyun mestowek, kotorori Jehovah ak kolosunoti eng’ tuguk tugul che kagogas ak che kagogeer, ko u ye kaga kemwachi.

21Ak kingoit betusiek sisiit che kiyatitoe inendet, keguure kainennyi JESU, ko u ye kiga kotochi malaikaiyat kotomo kemanach.

Kagoitoetab Jesu eng’ hekalut

22Ak kingo kagobata betusiekab katililenywa ko u Ng’atutietab Musa, komut inendet konyo Jerusalem, si kogochi Kiptaiyat 23(ko u ye kigisir eng’ Ng’atutietab Kiptaiyat, kele, Kiguure ne itabanat agobo Kiptaiyat werit age tugul ne yatei iyotet), 24ak kogoito korosiot ko u ye kigimwa eng’ Ng’atutietab Kiptaiyat, kele, Cheptugenik aeng’, anan arek aeng’ che bo cheptugenik.

Simeon ak ng’lekyik

25Ogeero, kimi chito age Jerusalem, ne kigiguure Simeon; ak ki chito ne bo iman ak kigonyiti Jehovah, ne kiigeni kagaigaetab Israel: ak kitebe Tamirmiriet ne Tilil inendet. 26Ak kiga kong’ang’ji inendet Tamirmiriet ne Tilil, kole, mageerei meet, kotom kogeer Kristo ne bo Kiptaiyat. 27Kinyo anyun hekalut eng’ Tamirmiriet: ak ye kingomut sigik lakwet Jesu, si kobiit koyachi inendet ko u biteetab Ng’atutiet, 28konam anyun lakwet eng’ eunekyik, ak kolos Jehovah, kole,

29Ee, Kiptaiyat, ichamjini nguno otwogindeng’ung’ kwo

Eng’ kalyet, ko u ng’olyondeng’ung’;

30Amu kagogeer konyekyuk yetuneng’ung’,

31Ne kiichob eng’ taitab bik tugul;

32Lapkeiyet ne bo ng’ang’utiet ne king’ang’jin Bororiosiek,

Ak torornatetab biguk Israel.

33Ak kikwong’io Josep ak kametab lakwet agobo tuguchoto kagimwa agobo inendet; 34ak kiiberur Simeon ichek, ak kolenji Maria kamennyi, Keero, kaginde lakwani si kobutyo che chang’ ak kong’eetyo che chang’ eng’ Israel; asi koek kaborunet ne tun kiesioi; 35(ee agot inyendet ko tun torei rotwetab chok muguleldang’ung’;) si kobiit kong’ang’ogis kabwatutikab mugulelwekab bik che chang’.

36Ak kimitei agine Ana, chebo Panuel, ne ki maotio, ne bo oretab Aser (ne kiga koosit mising’; kitebi ak manong’otiot kenyisiek tisab koboch ngitun. 37Ak kitebi ko mosok kenyisiek tamanwogik sisiit ak ang’wan), ko mamandoi eng’ hekalut, ak kolosu, koboto karugutetab ge, ak somutik, kemoi ak bet. 38Ak kinyo eng’ sainato ak kogochi Jehovah kongoi, ak king’alalji tugul che kiigeni katiaget eng’ Jerusalem agobo inendet.

Ana

39Ak kingo kagoges tugul ko u Ng’atutietab Kiptaiyat, koweektagei koba Galili, agoi nganasenywa Nasaret. 40Ak kiner lakwet, ak kotesak kimnatet, ak kinyi ng’omnatet: ak kimi mieindab Jehovah koboto inendet.

Ming’inatetab Jesu

41Kicham kobendi sigikyik kenyit age tugul Jerusalem eng’ igorta ne bo paska. 42Ak ye ki bo kenyisiek taman ak aeng’, kotogosta ichek koba Jerusalem ko u biteet ne bo igorta; 43ak ye kingowong’ betusiek, ye kiweeksei, kong’et lakwet Jesu eng’ Jerusalem: ak kima nai sigikyik; 44ago kilen mi koboto bik che kibendi tugul, koba anyun bandab betut komugul; ak kicheng’ inendet eng’ kwenutab bikab orenywa ak che kiingengei: 45ak ye kimanyor inendet, koweektagei Jerusalem, kocheng’at.

46Ak ye kingogesgei betusiek somogu, konyorji inendet hekalut, kotebyei eng’ kwenutab konetik, koepchin it ng’alekwak, ak koteepse icheget: 47ak kikwong’io ichek tugul che kiepchin it inendet amu naennyi ak wolunaikyik. 48Ak ye kingogeer inendet, kokwong’io: ak kilenji kamennyi inendet, Lakwani, kalya si iyaiywech ko u ni? Keero, kogicheng’in ane ak kwandang’ung’ eng’ arogenet. 49Ak kilenji ichek, Amu nee si ocheng’a? Ma onai ole kanyolja atebe boisietab Baba? 50Kima iguiyo ichek ng’olyondonoto kamwachi.

51Kichorgei anyun koboto icheget, ak kiit Nasaret; ak kigase it ichek: ak kigonor kamet ng’alechato tugul eng’ muguleldanyi. 52Kitesak ng’omnatetab Jesu, ak etunatet, ak mieindo eng’ Jehovah ak eng’ bik.

Currently Selected:

LUKA 2: BUKUIT

Highlight

Copy