LUKA 5
5
Kuurset ne bo alamalyet ne bo tai
1Ak ye kingota kogiichi tuiyet inendet, ak kogasei ng’olyotab Jehovah, kotonon inendet eng’ ngegutab araraita ne bo Genesaret; 2ak kigeer moingonik aeng’ che bo beek kotonondos eng’ ngegutab araraita: ago kiga kochorgei ramik koba komwet regereiywekwak che kiname njirenik. 3Ak kilany moinget age, ne ki bo Simon, kosom kole, konaktae kolooit kitigin eng’ ngegut. Ak kiteb ng’ony anyun ak konet tuiyosiek komi moinget.
4Ak ye kingo kagoges ng’alalennyi, kolenji Simon, Ta ikweri moinget kwo ole chang’ beek, ak ochoorte regereiywekwok oramisie. 5Ak kiwol Simon kole, Kiptaiyandani, kogiboisie kemout komugul, ama kinyoru kiy: ago achoortoi regereiywot amu ng’olyondeng’ung’. 6Ak ye kingo kagoyai ko u noto, konam njirenik ng’isiat; kot kotoi kong’etyo regereiywekwak; 7ak king’wech bik che kiboisiei tugul che kimi moinget age, kole kobwa kotoret. Kobwa anyun, ak konyiit moingonik tuwai, kot kotoi moingonik kosu.
8Ago ye kingogeer Simon Petero, kobutyi kotung’oikab Jesu, ak kole, Istoenage, amu a chi ne bo tengek, ee Kiptaiyandani. 9Amu kikwong’, ak tugul che kimi koboto inendet, agobo njirenik che kiga nam; 10kikwong’io agichek Jakobo ak Johana, werikab Sebedi, che kiboisiei tugul koboto Simon. Ak kilenji Jesu Simon, Ameiyweisie; koboch nguno iegu ne irame bik. 11Ak ye kingo kagoget moingonikwak kobwa ngegut, kobagakta tugul, ak kosub inendet.
Kisoobi chi ne amei mogondosik
12Ak kingota komitei nganaset age, ogeero, chito ne ki nyiitat mogondosik: ak ye kingogeer inendet Jesu, kobut kosieb mo, ak kosaisai kole, Kiptaiyandani, ngicham, imuchi itilila.
13Ak kiiyogoito Jesu anyun eunnyi, ak kotwa ak kole, Kaacham; tililitu. Ak ngunoto kobagakta mogondosik inendet. 14Ak king’at anyun kolenji, Amat imwachi chi: ago ui ak iborjige tisiindet, ak igoite che bo katilileng’ung’, ko u ye king’at Musa, koek baornatet eng’ icheget.
15Ak kitesak mising’ koiyesta logoiywekyik: ak kiiyumgei tuiyosiek che chang’ kobwa si kogas ng’alekyik ak kisoob eng’ mianwekwak. 16Ago kiitabangei inegei kwo surkwen kosa.
Kisoobi chi ne meat borto
17Ak kiinetisiei eng’ betut age eng’ betusiechoto; ak kimi Parisaik ak konetik che bo ng’atutik kotebyei eng’ oloto, che kibunu nganaset age tugul ne bo Galili ak ne bo Judea ak ne bo Jerusalem: ak kimi kamuktaetab Kiptaiyat koboto inendet kosoobe bik. 18Ak ogeero, kilau bik chito eng’ itogut ne ki meat borto: ak kicheng’ oret ne imute kwo go, ak konde inendet tainnyi. 19Ak ye kimata konyor ole imute kwo go amu chang’indab bik, kolany got barak, ak kochoortae inendet itogunnyi kobun ole kigisieb, agoi kwenut eng’ taitab Jesu. 20Ak kingogeer Jesu kayanenywa, kolenji, Chichi, kagenyoun kaat tengekwogiguk.
21Ak kitoi sirik ak Parisaik kobwat agobo ng’olyondonoto kole, Ng’o nito mwaei ng’alechu yaachen? Ng’o ne imuchi konyochi chi kaat tengekwogik kobate Jehovah inegei? 22Ago ye kingonai Jesu anyun kabwatutikwak, kowolji kolenji, Obwati nee eng’ mugulelwekwok? 23Nee ne nyamnyum, ngele, Kaginyoun kaat tengekwogiguk; anan ngele, Ng’eet ak iwendote? 24Ago si kobiit onai ole tinyei kimnatet Weritab chi eng’ ng’ony konyochi kaat bik tengekwogik (kolenji chito ne ki meat borto), Amwaun ale, Ng’eet, ib itogung’ung’ ak iwe gong’ung’. 25Ak king’eet ngunoto anyun eng’ tainywa, ak kiib kit ne karue, ak kwo gonnyi, kolosunoti Jehovah. 26Ak kokwong’io ichek tugul ak kolos Jehovah; ak kinyi ichek kaiyweisiet, ak kole, Kagegeer rani tuguk che kikwong’e.
Kuurset ne kiguurei Lawi
27Ak kingobata tuguchu kwo kogeer taagindetab aisurut, ne kiguure Lawi, kotebyei eng’ ole kitaage aisurut, ak kilenji, Isubwa. 28Ak kibagakta tugul, ak kong’eet kosub inendet. 29Ak kichopchi Lawi inendet igorta ne o eng’ gonnyi; ak kimi tuiyet ne o ne bo taagikab aisurut ak bik alak che kitebyei eng’ amisiet koboto inendet. 30Ak kiing’unyng’ung’ji Parisaik ak sirikwak alamalyennyi, kole, Kalya si oamisiei ak oeeisei koboto taagikab aisurut ak kiptengeginik? 31Ak kiwolji Jesu kolenji, Mamage kiy chepkerichot bik che chamegei; kobate che miandos. 32Kima anyo aguur che bo iman, ago kiptengeginik, si kosik.
Ng’olyotab karugutetab ge
33Ak kilenji inendet, Irugutegei konyil che chang’ alamalyetab Johana, ak kosaei, ak yaei ko u noto agichek che bo Parisaik; ago amisiei cheguk ak koeeisei. 34Ak kilenji Jesu ichek, Tos omuchi ogochi korugutgei che kogiguurji katunisiet, kota komi sandet koboto icheget? 35Ago bwanei betusiek che tun kiistoe ichek sandet, korugutgei anyun eng’ betusiechoto.
36Ak kimwachi ichek anyun kalewenet kogeny kolenji, Mami chi ne kerei akwot ne bo ngoriet ne leel ak konapchi ngoriet ne os; amu ngo yai ko u noto ko kereri noto leel, ak kogeny, manamegei akwot ne leel ak ne os. 37Ama mi chi ne indoi divaik che leelach lolotinwek che osen; ngo yai ko u noto ko kereri divaik lolotinwek, ak kotumdagei, ak kong’emogis lolotinwek. 38Ago kanyol kinde divaik che leelach lolotinwek che leelachen. 39Ama mi chi ne ngo kagoee divaik che bo keny ko ta komach che leelach: amu mwaei kole, Miachen che bo keny.
Currently Selected:
LUKA 5: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
