TAUNET 35
35
Koteechei Jakobo kaptisisiet eng’ Bet-el
1Kilenji Kamuktaindet Jakobo, Ng’eet, ui togoste Betel, imeny olindo: ak iteekyi Kamuktaindet kaptisisiet eng’ oloto, inendet ne kimong’jin ye kiimwee ng’etab komet Esau. 2Kimwachi Jakobo anyun bikab gonnyi, ak tugul che kimi koboto inendet, kolenji, Olakte kanaamonik che mi kwenung’wong’ che bo bororiosiek alak, ak oanyingei, ak owal ngoroikwok: 3ong’eetye anyun, kebe ketogoste Betel; si awo ateekyi Kamuktaindet kaptisisiet eng’ olindo, inendet ne kiwolwa eng’ betutab bichiindanyu ne kimi kobota eng’ bandanyu. 4Kiigochi anyun bichoto Jakobo kanamonichoto tugul bo bororiosiek alak che kitinyei, ak munaok che kimi itikwak, ak kiuny Jakobo choto eng’ ketit kel ne kimi Sekem. 5Kiba anyun: ak kitebe nganasok che kimi ole negite icheget, kamuisetab Kamuktaindet, ak ma isub werikab Jakobo. 6Kiit Jakobo Lus anyun (noto ko Betel), ne mi emetab Kanan, inendet ak bik tugul che kimi koboto inendet. 7Ak kiteech kaptisisiet eng’ oloto, ak kiguure oloto El-bet-el: amu yoto ko ye king’ang’jinegei Kamuktaindet, ye kimwee ng’etab kamet. 8Ak kime Debora cheblakwetab Rebeka, ak kigitupchi ole negite Betel, eng’ ketit kel ne kimi oloto: ak kigiguure ketoto Alon-bakut.
9Komong’ji Kamuktaindet Jakobo kogeny, koberur, ye kibunu Padan-aram. 10Ak kilenji Kamuktaindet inendet, Kaineng’ung’ ko Jakobo: ma keguurenen Jakobo kogeny, ago ngeguurenen Israel, ak kiguure kainennyi Israel. 11Ak kilenji Kamuktaindet, A Kamuktaindet ne bo Kamuktaet: ii ak itesage; ak tun mong’unenen inye bororiet ak chang’indab bororiosiek, ak mong’une bortang’ung’ laitorinik; 12ak tun agonin emonoto kiagochi Abraham ak Isak, ak agochini lagoguk agichek che tun biitu let. 13Ak kiwa anyun Kamuktaindet eng’ yoto kotogosta eng’ ole king’alale. 14Ak kilumda Jakobo toloita eng’ yoto king’alale, toloita ne bo koita: ak kirong’ji kagochinet ne bo tuguk che kieei, yeityo korong’ji mwaita. 15Ak kiguure Jakobo kainetab yoto Betel ole king’alale ak Kamuktaindet.
Meetab Rael, ak kalilatetab Isak
16Kiba anyun eng’ Betel; ak kingo tom koit Eprat, koam moet Rael, ak kinyor bichiindo eng’ moonato. 17Ak ye kimachei kosigis eng’ bichiindo, kolenji korgetab sigisio, Ameiywei amu imache isich ng’etet age nguno. 18Ak ye kingo machei kome koguure kainennyi Ben-oni ak kome: ago kiguure inendet kwandanyi Benjamin. 19Ak kime Rael, ak kigitupchi oret ne wendi Eprat (yoto ko Bet-lehem). 20Ak kilumda Jakobo toloita eng’ kererinnyi: ak kereritab Rael toloata agoi kora. 21Kiu anyun Israel, ak kiteech emainnyi ole negite teekset ne koi ne bo Eder komosin. 22Ak ye kita komenyei Israel emonoto, kwo Reuben koipgei ak Bila, chebaigeiyatab kwandanyi: ak kigas Israel ng’olyondonoto.
Ki taman ak aeng’ werikab Jakobo: 23Chu ko werikab Lea: ne bo tai ko Reuben, ne o ne bo Jakobo, ak Simeon, Lawi, Juda, Isakar, ak Sebulun. 24Chu ko werikab Rael: Josep ak Benjamin. 25Chu ko werikab Bila, kwondo ne ki otwogindetab Rael: Dan ak Naptali. 26Chu ko werikab Silba, kwondo ne ki otwogindetab Lea: Gad ak Aser: chuto ko ki werikab Jakobo che kisichei eng’ Padan-aram. 27Ak kiit Jakobo Mamre, oldab Isak kwandanyi, agoi Kiriat-arba (noto ko Hebron), oloto ole kicham komenyei Abraham ak Isak ye ki ta ko toek.
28Ak kenyisiekab Isak ko ki bogol ak tamanwogik sisit. 29Ak kiilil Isak, ak kigiyum koboto bikwak, boiyot ne kiga koosit mising’: ak kitub inendet werikyik Esau ak Jakobo.
Currently Selected:
TAUNET 35: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
