TAUNET 34
34
Tewernatetab Dina, ak koyaaktoi mugetut tupchosiekyin Simeon ak Lawi
1Ak kiwa Dina cheptab Lea, ne kisikyi Jakobo, kwo kogeer tibikab emonoto. 2Ak kigeer Sekem, weritab Hamor ne bo Hibik, kiruogindetab emonoto, ak kinam inendet, koruiyo tuwai, ak kotewer. 3Ak kicham muguleldanyi Dina cheptab Jakobo, kicham cheboto ak king’alalji inendet kogaigai. 4Ak king’alal Sekem ak kwandanyi Hamor, kolenji, Weiywa koito cheboto si kobiit atun. 5Ak kigas Jakobo kole, kigong’em chichoto cheptanyi Dina: ak kiiyagisiei werikyik eng’ kewanin: ak kisis Jakobo agoi koit. 6Kiwa anyun Hamor kwandab Sekem kong’alaljin ak Jakobo. 7Ak kingogas werikab Jakobo, kobwa ga kobunu kewanin: ak kigas ng’wanindo murenjoto, ak kinerekso kot, amu kiyai abusnatet eng’ Israel, amu kiruiyo ak cheptab Jakobo; kit ne magichamei keyai. 8Ak king’alal Hamor ak icheget, kolenji, Machei Sekem werinnyu cheptang’wong’ mising’: asomok ale, ogochi inendet kotun. 9Mie keegu bik che kigonegei: ogonech tibikwok, ak otun chechok ak okwek. 10Ak ongemeng’jine: ak mi emoni taing’wong’; omeng’isie ak oyae mung’aret, ak onyoru magornatet eng’ olito. 11Ak kilenji Sekem kwandab Dina ak tupchosiekab Dina, Mie anyor chamet eng’ taing’wong’, ak kiy age tugul ne omwawa amuchi agonok. 12Agonok kanyiok che te che omache, ak kagochinoik: ago ogona chepto atun. 13Ak kiwolji eng’ ng’alset werikab Jakobo, Sekem koboto kwandanyi Hamor, ak king’alalji, amu kiga ng’em tupchenywa Dina, 14ak kilenji, Magimuchi keyai kit ne u nito, kigochi chi ne ma kimuratan tupchennyo; amu egu tewernat noto eng’ achek. 15Kimuch kechamnyechi ak okwek eng’ ng’olyondoni kityo, ngocham oige achek, kele keyatita muren age tugul eng’ okwek; 16eng’ noto anyun kegonok tibikyok, ak kitun tibikwok agichek, ak kemeny kobotok, ak keegu agenge. 17Ago ngot ko mogasech ak ocham keyatitak; kimuti anyun cheptanyo, ak kebe.
18Kicham anyun Hamor, ak Sekem weritab Hamor ng’alekwak. 19Ak kima igagei murenonoto koyai ko u noto, amu kiga cham mising’ cheptab Jakobo, ak kigigonyiti inendet kosiir bik tugul che bo gotab kwandanyi. 20Ak kiba Hamor ak werinnyi Sekem ormarichetab nganasenywa, ak king’alal ak bikab nganasenywa, kolenjigei, 21Kichamdosi ak bichuto; eng’ noto anyun, mie komeny emoni, ak koyai mung’aret eng’ olito, amu baraa emoni, yamei ichek; ongitun tibikwak ak kigochi chechok agichek kotun. 22Ago imuchi bichoto kocham komeny kobotech, ak keegu agenge, ngot kechamnyechi kit agenge, noto ko kiyaitia muren age tugul eng’ achek, ko u ye yatitoi ichek. 23Tos mabunjinech akwotisiekwak che bo nego ak tugukwak ak tukwak tugul? Ongecham ng’olyondonito kityo, si komeny kobotech. 24Ak kicham ng’alekab Hamor ak Sekem werinnyi tugul che kimandae ormarichetab nganasennyi; ak kigiyatita muren age tugul, tugul che kimandae ormarichetab nganasennyi.
25Ak eng’ betutab somok ye kimiandos, konam age tugul rotwennyi bo chok, eng’ werjoto aeng’ bo Jakobo, Simeon ak Lawi, tupchosiekab Dina, koba nganaset eng’ nyiganatet, kobar murenik tugul. 26Ak kibar Hamor ak Sekem werinnyi eng’ rotwetab chok, ak komut Dina eng’ gotab Sekem, koba oldanyua. 27Ak kibwa werikab Jakobo ole mi bik che kagebar, ak kiluul nganaset, amu kiga kong’em chepkametinywa. 28Kiluul kechirekwak ak tukwak ak sigirokwak ak kiy age tugul ne kimi nganaset, ak tuguk che kimi mbarenik; 29ak tugukwak tugul, ak lagokwak ak osotikwak, kiluul tugul, kiib agot che kimi gorik.
30Ak kilenji Jakobo Simeon ak Lawi, Kaoiima, ak kaogona aek ne kiwechei eng’ bik che menyei emoni, eng’ Kanaik ak Perisik: ak koyumjagei, kobara kowong’wa koboto gonnyu, ago achek, kota ko ki ng’ering’. 31Ak kile ichek, Tos kanyolu koyai tupchennyo koek chepkugonio?
Currently Selected:
TAUNET 34: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
