TAUNET 33
33
Kotuitos Jakobo ak Esau eng’ kalyet
1Kitobendo Jakobo, kogeer konyonei Esau, koboto bik bogol ang’wan. Ak kipchei lagok kopchjechi Lea, ak Rael, ak otwogichoto aeng’ che tibik. 2Ak kichob kondo kwonyichoto otwogik ak lagokwak, yeityo korub Lea ak lagokyik, kolet eng’ tugul Rael ak Josep. 3Kiindoe inendet ichek, yeityo kong’uruk agoi ng’ony konyil tisab, agoi korikyi ng’etab kamet. 4Ak kilabat Esau kotorokta, ak konam koue eut, kosuub kaatinnyi, kong’utut: ak koririo. 5Ak kingotobendo, kogeer osotik ak lagok; ak kiteebe kolenji, Ng’o chu omi tugul? Ak kile, Lagok che kiigochi Kamuktaindet otwogindeng’ung’, eng’ rirenennyi bo ge. 6Kirik anyun kwonyichoto otwogik ak lagokwak, ak kobwa kong’urukso. 7Ak kirik Lea agine ak lagokyik kobwa kong’urukso: ak kingobata korik Josep ak Rael, nyo kong’urukso agichek. 8Ak kiteebe kolenji, Bo nee akwotisiechu tugul kaatuiye? Kolenji, Si kobiit anyor chamet eng’ taitab kiptaiyandennyu. 9Ak kile Esau, Atinye che yama, tupchennyu; ingobunjin choto itinye. 10Ak kilenji Jakobo, Achicha, asain ale, ngo kaanyoru chamet eng’ taing’ung’, ko mie itaach chu kagonin eng’ eunnyu: amu kaageer togeng’ung’, ko u ye kigeerei togetab Kamuktaindet, ak ageere anyun ale ibaibai eng’ ane. 11Asain ale, taach inye che kagonin che kagigetun; amu kiyaiywa Kamuktaindet ne mie, ak amu atinye che yama. Ak kiigaigai kot kocham kokweri. 12Ak kile Esau, Ongenam banda, kebe, si andoenen. 13Ak kilenjin Jakobo Esau, Ingen inye kiptainandennyu, ile mengechen lagok, ak kotinyei nego arek, kotinyei tuga moek: ak ngot kekweri eng’ betut komugul, komuch kobek akwotisiek tugul. 14Asain kiptaiyandennyu ale, indoena ane otwogindeng’ung’: si aree ane mutyo, ko u bandab akwet ak ne bo lagok, agoi ait ole mi kiptaiyandennyu eng’ Seir. 15Ak kile Esau, Ngabagagun bikyuk alak che mi kobota. Ak kile, Koyai nee? Ingogaswa kiptaiyandennyu ko u noto. 16Kiweek anyun Esau betunoto eng’ bandanyi agoi Seir.
Komeng’isiei Jakobo eng’ kanan
17Ak kiwa Jakobo agoi Sukot, kwo koteekyigei got, ak kiteech kaptugusiek: kigiguure anyun yoto Sukot. 18Kiit Jakobo anyun eng’ kalyet nganasetab Sekem, ne mitei emetab Kanan, ye kibunu Padan-aram; ak kiwa koteech emainnyi ole tokyingei nganaset. 19Ak kial koret eng’ bikab Hamor, kwandab Sekem, eng’ fedaisiek bogol agenge, ole kigateech emainnyi. 20Ak kiteech kaptisisiet eng’ oloto, ak kiguure kaptisisionoto El-eloe-Israel.
Currently Selected:
TAUNET 33: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
