TAUNET 36
36
Bikab oretab Esau
1Chu ko ortinwekab Esau (noto ko Edom). 2Kiitun Esau tibikab Kanan; Ada cheptab Elon Hitindet ak Oholibama cheptab Ana ne ki cheptab Sibeon Hibindet; 3ak Basemat cheptab Ismael, chepkametab Nebaiot. 4Ak kisikyi Ada Esau Elipas; ak kisich Basemat Reuel; 5ak kisich Oholibama Jeus, Jalam, ak Kora: choto ko werikab Esau, che kisichei eng’ emetab Kanan.
6Ak kiimut Esau osotikyik, ak werikyik, ak tibikyik, ak bik tugul che bo gonnyi, ak tukyik, ak akwotisiekyik tugul, ak tugukyik tugul, che kiga koyumjigei eng’ emetab Kanan; kiu kwo emet age kolooit eng’ ng’etab kamet Jakobo. 7Amu ki chang’ tugukwak mising’ kot koma imuch komeng’jin tuwai; ak kima koyamei ichek tuwai emet ne kiegunote toek amu akwotisiekwak. 8Kimeny anyun Esau tulwetab Seir: Esau ko Edom.
9Chu ko ortinwekab Esau, kwandab Edomik eng’ tulwetab Seir: 10chu ko kainaikab werikab Esau; Elipas weritab Ada osotiotab Esau, Reuel weritab Basemat, osotiotab Esau. 11Ak werikab Elipas ko ki Teman, Omar, Sepo, Gatam, ak Kenas. 12Timna ko ki chebaigeiyatab Elipas weritab Esau, ak kisikyi Elipas Amalek: chuto ko werikab Ada ne bo Esau. 13Ak chu ko werikab Reuel; Nahat, Sera, Sama, ak Misa: choto ko ki werikab Basemat ne bo Esau. 14Ak chu ko ki werikab Oholibama osotiotab Esau, cheptab Ana, ne ki cheptab Sibeon: ak kisikyi Esau Jeus, ak Jalam, ak Kora.
15Chuto ko kiruogikab werikab Esau: werikab Elipas, ne o ne bo Esau: kiruogindet Teman, kiruogindet Omar, kiruogindet Sepo, ak kiruogindet Kenas, 16ak kiruogindet Kora, kiruogindet Gatam, ak kiruogindet Amalek; chuto ko kiruogik che kisichei Elipas eng’ emetab Edom; chuto ko werikab Ada. 17Chu ko werikab Reuel weritab Esau; kiruogindet Nahat, kiruogindet Sera, kiruogindet Sama, ak kiruogindet Misa: chuto ko kiruogik che kisichei Reuel eng’ emetab Edom; chuto ko werikab Basemat osotiotab Esau. 18Chu ko werikab Oholibama osotiotab Esau; kiruogindet Jeus, kiruogindet Jalam, ak kiruogindet Kora; chuto ko kiruogik che kisichei Oholibama, osotiotab Esau cheptab Ana. 19Chuto ko werikab Esau, inendet ko Edom, ak chuto ko kiruogikwak.
20Chu ko werikab Seir Horindet, che kimenyei emonoto: Lotan, Sobal, Sibeon, Ana, 21Dison, Eser ak Disan: chuto ko kiruogik che kimong’une Horik, bikab Seir eng’ emetab Edom. 22Ak lagokab Lotan ko ki Hori ak Hemam; ak chepkametab Lotan ko ki Timna. 23Chu ko lagokab Sobal; Alban, Manahat, Ebal, Sepo ak Onam. 24Ak chu ko lagokab Sibeon: Aja ak Ana; Ana nito ko ne kinyor kong’ikab beek che beelei bich eng’ ong’atet, ye kiiyagi sigirokab Sibeon kwandanyi. 25Chu ko lagokab Ana: Dison ak Oholibama cheptab Ana. 26Ak chu ko lagokab Dison: Hemdan, Esban, Itran ak Keran. 27Chu ko lagokab Eser: Bilan, Saaban ak Akan. 28Chu ko lagokab Disan: Us ak Aran. 29Chuto ko kiruogik che kimong’une Horik; kiruogindet Lotan, kiruogindet Sobal, kiruogindet Sibeon, kiruogindet Ana, 30kiruogindet Dison, kiruogindet Eser, kiruogindet Disan; chuto ko kiruogik che kimong’une Horik, ko u kiruogikwak eng’ emetab Seir.
31Chu laitorinik che kilaitorane emetab Edom, ye kitomo kobiit laitoriat ne bou bikab Israel. 32Kilaitorane Edom Bela weritab Beor; kainetab nganasennyi ko ki Dinaba. 33Ak kime Bela, ak kinam laitornatennyi Jobab weritab Sera ne bo Bosra. 34Ak kime Jobab, ak kinam laitornatennyi Husam ne bo emetab Temanik. 35Ak kime Husam, ak kinam laitornatennyi Hadad weritab Bedad, ne kibar Midianik eng’ turguitab Moab; ak kainetab nganasennyi ko ki Abit. 36Ak kime Hadad, ak kinam laitornatennyi Samla ne bo Masreka. 37Ak kime Samla, ak kinam laitornatennyi Saul ne bo Rehobot nganaset ne negite ainet. 38Ak kime Saul, ak kinam laitornatennyi Baal-hanan weritab Akbor. 39Ak kime Baal-hanan weritab Akbor, ak kinam laitornatennyi Hadar: ak kainetab nganasennyi ko ki Pau; ak kainetab osotiondennyi ko ki Meetabel cheptab Matred, cheptab Me- sahab.
40Ak chu kainaikab kiruogik che kimong’une Esau, ko u ortinwekwak, ko u korotinwekwak, ko u kainaikwak: kiruogindet Timna, kiruogindet Alba, kiruogindet Jetet; 41kiruogindet Oholibama, kiruogindet Ela, kiruogindet Pinon; 42kiruogindet Kenas, kiruogindet Teman, kiruogindet Mibsar; 43kiruogindet Magdiel, kiruogindet Iram: chuto ko kiruogikab Edom, ko u meng’otenywa eng’ emet ne ki nenywa: nito ko Esau kwandab Edomik.
Currently Selected:
TAUNET 36: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
