BOISIONIKAB CHE KIYOKTOI 24
24
Kiruokyik Paulo eng’ taitab Peliki bounindet
1Ak kingobata betusiek mutu, kochorgei Anania tisiindet ne o ak boisiek alak, ak ng’alalindet age, ne kiguure Tertulo; ak koborji bounindet ng’alek che kogitaame Paulo. 2Ak kingo kageguur, kotoi Tertulo kotaam inendet kole,
Amu kiboiboitune kalyet ne o eng’ inye, ak kiistoi yaitwogik eng’ bororioni amu ng’omnateng’ung’, 3kitaach anyun eng’ ortinwek tugul ak eng’ komoswek tugul, koboto kongoi tugul, ee inye ne i toogunot, Peliki. 4Ago si mata again mising’, asomin ale igasech eng’ ng’alek che ng’ering’ eng’ mieindang’ung’, 5amu kigegeer chichi kele inendet ko chi ne itoitos bich, ne ing’eeti chemereret eng’ Yahudik tugul eng’ ng’ony tugul, ak kandoindet ne bo kasubikab Nasaretik: 6ak kogeny, ko kigotiem kong’wanit hekalut: ak kiginam inendet: [ak kigimache kiruokyi inendet ko u ng’atutikyok. 7Ago kinyo ole kimi Lusia kiptaiyat ne o ne bo askarik, ak korebenech inendet eng’ eunekyok eng’ kimnatet ne o,] 8imuchi inai tuguchu tugul eng’ inendet ye igine inyendet, agobo tuguchoto kogitaame. 9Ak kiiyomechigei Yahudik kataamsonato, kogimit kole, u noto ng’alechuto.
10Ak kingo kagoborjine bounindet Paulo eut, kole kong’alal, kowol Paulo kole, Angen ale, i kiruogindet ne bo bororioni eng’ kenyisiek che chang’, amu noto asoruge eng’ boiboindo: 11amu imuchi inai ile, tom kosiir betusiek taman ak aeng’ koboch ngab atogoste Jerusalem awe asa: 12ama nyorua ichek eng’ hekalut kibelige ak chi age tugul, anan awase tuiyet, anan eng’ sunagogisiek, anan eng’ nganaset. 13Amaimuchi ichek koborun komie tuguk che itaamena. 14Ago kang’ang’un nito, eng’ Oranato kuure ichek biteet age, aote Jehovah ne bo kwanisiekyok, ak ayani tuguk tugul ko u ye mwaei Ng’atutiet, ak che kigisir eng’ maotik: 15atinye kamang’unet eng’ Jehovah, ne cheng’ei bichu agichek, ale, tatun komi ng’eetyetab che bo imanda ak che ma bo imanda. 16Ak achobege anyun agane eng’ ng’olyondoni atebe kotugul kabwatet ne matinyei kanagut eng’ taitab Jehovah ak bik.
17Ak kingobata kenyisiek che chang’ anyo aipchi bikab bororiennyu kagochinoik ak tuguk che kigoitoi: 18ak kinyortaa kitilila eng’ hekalut, ama mi tuiyet, anan bolatet: ago kimi Yahudik alak che kibunu Asia- 19mie nda kami yu ichek eng’ taing’ung’ si komwaitaa ngo ting’ena ichek ng’olyo. 20Anan ingomwa bichu icheget boisiet ne ya ne kinyor, ye kingatonon eng’ taitab kapkiruoget, 21kobate twegunet agenge ne kiarirji atononi eng’ kwenunywa, ale, Kagiruokwa rani eng’ taing’wong’ agobo ng’eetyetab che kigobek.
Kong’tei Peliki kole ingoteb ng’alenchu korok
22Amu kiingen Peliki komie agobo Oranato, kolenji, Ogen, ye tun kachorgei kiptaiyat ne o Lusia, atil anyun ng’alekwok. 23Ak kong’at kiptaiyatab bogol kole kerib inendet, ak kigochin boroindo; amat koete age tugul eng’ choronokyik koboisiechi inendet.
24Ago kingobata betusiek alage, koit Peliki, koboto Drusila osotiondennyi, ne ki Chebyahudio, ak koyokto Paulo konyo, ak kigas eng’ inendet agobo kayanet eng’ Kristo Jesu. 25Ak ye kita kong’alali agobo imanda, ak ribetab ge, ak kiruoget ne nyonei, koiyweis Peliki, ak kowol kole, Ui korok; ak ye tun anyoru boroindo ne mie, aguurin. 26Kiimang’u kole togot kogochi Paulo siling’isiek: kiguur anyun inendet konyil che chang’, ak kong’alal koboto inendet.
27Ago kingogesgei kenyisiek aeng’u, konam Porkio Pesto boisietab Peliki; ak amu kimachei Peliki kobaibai Yahudik, kobagakta Paulo ko ratat.
Currently Selected:
BOISIONIKAB CHE KIYOKTOI 24: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
