BOISIONIKAB CHE KIYOKTOI 25
25
Kiruokyin Paulo eng’ taitab Pesto
1Kingo kagoit Pesto koronoto, kotogosta Jerusalem kobunei Kaisaria, ko kagobata betusiek somogu. 2Ak kimwachi tisiik che eechen ak bik che toogunotin che bo Yahudik ng’alek che kiting’e Paulo; ak kogaigai ichek inendet, 3kosom chamdaet agobo inendet, kole koyokto inendet kimut konyo Jerusalem; si kobiit korat oret kobar inendet. 4Ago kiwol Pesto kole kerib Paulo eng’ Kaisaria, ak kole, Negit si awa anendet oloto. 5Ak kole inendet, Ongechortege ak che eechen eng’ okwek, si ngo mi ng’olyo age tugul ne ya eng’ chichito, komwa ichek.
6Ak kingo kagotebi eng’ kwenunywa koboto ichek eng’ betusiek che masiirei sisiit anan ko taman, kochortagei Kaisaria; ak mutai kotebe ng’echeretab kiruoget, ak kong’at kole, kimut Paulo. 7Ak kingo kagoit, koyiem inendet Yahudik che kabunu Jerusalem, koibu ng’alek che chang’ che koromen che kiitaame inendet, che kima imuch kobor komie kit ne inet; 8ago kimwa Paulo eng’ ng’alek che kisorunegei, kole, Tom ayai tengek agot kitigin agobo Ng’atutietab Yahudik, anan agobo hekalut, anan agobo Kaisari. 9Ago ye kimachei Pesto kobaibai Yahudik, kowolji Paulo, kolenji, Tos imache itogoste Jerusalem, si kiruogun eng’ oloto agobo tuguchu eng’ tainnyu? 10Ago kile Paulo, Atononi eng’ taitab ng’echeretab kiruoget ne bo Kaisari, ole kanyol kiruogunena: tom ayachi kiy ne ya Yahudik, ko u ye ingen inye aginye komie. 11Ngo a kiptengekyo, ak ngot ko koayai kiy ne nyoljin meet, ko maesioi ame: ago ngot ko ma bo iman tuguchoto, che itaamjina bichu, ko mami chi ne imuchi kondea eunekwak. Arirjini Kaisari.
12Ak kingo kagong’alal anyun Pesto ak bikab kapkiruok, kowol kole, Kairirji Kaisari: ara anyun, iwendi gab Kaisari.
Agripa ak Bernike
13Ak kingo kagosiirto betusiek alage, koit laitoriat Agripa ak Bernike Kaisaria, si kogat Pesto. 14Ak ye kita kobeniei betusiek che chang’, koborji Pesto laitoriat ng’alekab Paulo, kolenji, Mitei chi age ne kibagakta Peliki ko ratat: 15ne kimwawa ng’alekyik tisiik che eechen ak boisiekab Yahudik ye kiami Jerusalem, kisomei ng’alek che kigikyine inendet. 16Ak kiawolji ichek alenji, ma biteetab Romanik kigoito chi kotomo kogeergei kimni chito ne kitaami ak che itaamsei, ak konyor boroindo ne sorunegei eng’ ng’alek che kigitaamjin. 17Ye kingoyumgei anyun eng’ yu, ko mata agage, ago eng’ betut ne bo aeng’ atebe ng’echeretab kiruoget, ak ang’at kimut chichoto. 18Ak kingotononso icheget che kiitaami inendet, ko ma koib ng’olyo ne ya ne bo kagikyino agobo inendet ko u ye kiabwati; 19ago kiting’e inendet teebutik agobo kayanenywa, ak agobo chi ne kilen Jesu, ne kigome, ne igiiljingei Paulo kole, sobei. 20Ago kialen agin ole teptoi ng’alechu kotemena, ateebe ngo machei kwo Jerusalem, si kiruokyi eng’ olindo agobo ng’alechuto. 21Ago kingorirji Paulo kotebi kole si kotil kiruoget bounindet ne o, ang’at ale kerib agoi tun ayokte kwo gab Kaisari. 22Ak kilenji Agripa Pesto, amache agas agane ng’alekab chichito. Kolenji, Igase mutai.
23Ak mutai ko kagoit Agripa, koboto Bernike, eng’ etunatet ne o, ak ko kagoba got ne kigase ng’alek, koboto kiptainik che eechen, ak bik che toogunotin che bo nganaset, kimut Paulo eng’ ng’atutietab Pesto. 24Komwa Pesto anyun, kole, Laitoriat Agripa, ak bik tugul che kimi yu tugul, ogeere chichi, kigorirja tuiyet tugul ne bo Yahudik agobo inendet, eng’ Jerusalem ak eng’ olito, koboldos, kolen, manyol kota kosob. 25Ago kiageer ale ma yai kiy ne nyoljin meet: ak ko u ye kirirji inendet bounindet ne o, acham anyun ayokto inendet. 26Matinye ng’olyo ne bo iman ne asirjini kiptaiyandennyu agobo inendet. Noto anyun kamutu inendet konyo taing’wong’, ak ne siirei ko konyo taing’ung’, inye, laitoriat Agripa, si ye kageteepse, asich ng’olyot ne asire. 27Amu ageere ale, ma nyolu kiyokto kimonjororio, ama kibor tuguk che kigitaamjin.
Currently Selected:
BOISIONIKAB CHE KIYOKTOI 25: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
