BOISIONIKAB CHE KIYOKTOI 23
23
1Ak kingogeer Paulo kapkiruogonoto komie, komwa kole, Che kitupche, kiatebe kotugul kabwatet ne mie eng’ taitab Jehovah agoi rani. 2Kong’at Anania, tisiindet ne o, ichek che kitonondos eng’ yoto kole, korabach kutinnyi. 3Kolenji anyun Paulo inendet, Tun birin Jehovah, inye inatut ne kigisal koleelit: itebye ak iruokwa ko u ye mwaei Ng’atutiet, ak ing’ate kebira ama chamdoi Ng’atutiet? 4Komwa ichek che kitonondos eng’ yoto kole, Ichube tisiindet ne o ne bo Jehovah? 5Kole anyun Paulo, Kama anai, che kitupche, ale inendet ko tisiindet ne o: amu kigisir kele, Amemwa ne ya agobo bounindetab biguk.
6Ago ye kingonai Paulo kole, Sadukaik alage, ko Parisaik alage, komwa eng’ kutit ne o eng’ kapkiruok kole, Che kitupche, a Parisaindet, weritab Parisaik: kagiruokwa agobo kamang’unet ak ng’eetyet ne bo che kigobek. 7Ak kingo kagomwa ko u noto, kong’eet anyun toiyet eng’ Parisaik ak Sadukaik: ak kipcheak tuiyet. 8Amu mwaei Sadukaik kole, mami ng’eetyet eng’ che kibek, anan malaika, anan tamirmiriet: ago iyani tugul Parisaik. 9Kong’eet anyun bolatet ne o: ak kitononso sirik alak che bo Parisaik, ak koborio kolen, Ma kinyoru yaitio eng’ chichi: ak tos nee eng’ okwek ngot ko kang’alal ak inendet tamirmiriet, anan malaika?
10Ak ye kingong’eet toiyet ne o, koiywei kiptaiyat ne o kole, abere togot kotonaton bichu Paulo, kong’at anyun askarik kochortagei ak komut inendet eng’ kimnatet eng’ kwenunywa, ak komut konyo irimet.
11Ak eng’ kemout ne kiisubi noto kotonon Kiptaiyat eng’ ye negite inendet ak kolenji, Nyiganitu: amu ko u ye kiibaorianja eng’ Jerusalem, ko u noto kanyol ibaorian eng’ Rom agine.
Kochobei Yahudik kobar Paulo
12Ak kingoeech koyumgei Yahudik, ak korategei kayosiet, kole magiame kiy ama kiee agoi kebar Paulo. 13Ak kisiirei artam icheget che kiyosio. 14Ak kibwa ole mi tisiik che eechen ak boisiek, ak kolenji, Kageratge eng’ kayosiet ne o kele, magichamjami kiy agoi kebar Paulo. 15Oborji anyun okwek ak boisiek kiptaiyat ne o komut inendet kochorgei konyo ole omi, ko u ne omache ogin komie ng’alekyik: ak ki chobotin achek kebar inendet agot kotom korikyech.
16Ago kigas weritab chepkametab Paulo agobo setyinenywa, ak kinyo kwo irimet ak komwachi Paulo. 17Koguur anyun Paulo age eng’ kiptainikab bogolwogik, ak kolenji, Imut murenoni kwo ole mi kiptaiyat ne o: amu tinye ng’olyo ne machei komwachi inendet. 18Komut anyun inendet kwo ole mi kiptaiyat ne o, ak kolenji, Kaguura Paulo, kimonjororiot, awa ole mi inendet, ak komwawa amutun murenoni konyo ole imi, tinyei ng’olyo ne machei komwaun. 19Konam anyun kiptaiyat ne o eutab weroto, ak komut taban, ak koteebe eng’ ung’ot kole, Nee noto imache imwawa? 20Kole, Kagochamnyechi Yahudik kole, kosomin imutu Paulo kochorgei mutai konyo kapkiruok, ko u ne imache iteepse inendet komie. 21Ameyanji anyun: amu mitei eng’ ichek che siirei artam che setyin inendet, che kagoratgei eng’ kayosiet, kole maamei kiy anan koee agoi kobar inendet: ak chobotin ichek nguno kogeni ng’atutiet ne bunun. 22Kounda anyun kiptaiyat ne o murenonoto kwo, ak kong’at inendet kolenji, Amemwachi chi agot agenge ilenji, Kaimwa tuguchu.
Kiyoktoi Paulo kwa Kaisaria
23Ak kiguur kiptainik aeng’ che bo bogolwogik koba ole mi inendet, ak kolenji, Ochob askarik bogol aeng’ koba agoi Kaisaria, ak askarik tamanwogik tisab che lanyei mbartanyisiek, ak murenikab ng’otwek bogol aeng’, eng’ sait somok ne bo kemoi: 24ak kimwachi kochob mbartanyisiek, si kobiit komute ichek Paulo, ak komut kot koit ole mi Peliki bounindet kochamegei. 25Ak kisir baruet ko u ni:
26Ane Klaudio Lusia, agatin inye bounindet Peliki, ne i toogunot.
27Konam Yahudik chichi, ak ki negit kobar ichek inendet, awe anyun ak askarik ole mi ichek, ak asoru inendet, ko kaanai ale kaga Romanin inendet. 28Ak ye kiamache anai kit ne kiitaame ichek inendet, amutu anyun kochorgei kapkiruogenywa: 29ageer ale, kigitaam inendet agobo ng’alekab ng’atutikwak, ago mami ng’olyo ne kigiityi inendet ne nyoljin meet anan ratutik. 30Ak ye kongiborua kele kogechob ng’alek eng’ ung’ot agobo inendet, ayogu inendet konyo olong’ung’ achogune, ak ang’at che kataamikyik si komwa ng’alek eng’ taing’ung’, che itaame inendet.
31Komut anyun askarik Paulo, ko u ye kaga king’at, ak komut kemoi kwo Antipatris. 32Ago mutai kobagakta murenik che kilanyei mbartanyisiek koba koboto inendet, ak koweektagei koba irimet: 33ak kingo kagoit Kaisaria, ak kogochi bounindet baruet, konde Paulo agine tainnyi. 34Ak ye kiga kosoman baruet, koteebe ichek kolenji, Ano emetab chichi? Ak kingogas kele, bo inendet Kilikia, 35kole, Tun agasun ng’aleguk ko kait bik che kiitaamin: ak king’at kerib inendet eng’ gotab kiruoget ne bo Herod.
Currently Selected:
BOISIONIKAB CHE KIYOKTOI 23: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
