BOISIONIKAB CHE KIYOKTOI 22
22
Amdaetab Paulo ne kiamji Yahudik
1Che kitupche ak kwanisiekyok, ogas ng’alek che amwae nguno eng’ taing’wong’ che asorunege. 2Ak kingogas kole ng’alaljin ichek eng’ kutitab Hebranik, kosisyo mising’: ak kile, 3A Yahudiot, kigisikya Tarso ne bo Kilikia, ago kianerji nganasani, ak kiineta Gamaliel, ak kigineta komie ko u ole teptoi Ng’atutietab kwanisiekyok, ak kiatinye kagiiletab ge eng’ Jehovah, ko u ole oteptoi okwek tugul rani: 4ak kiausausi Orani agoi meet, arate ak atoorjini korgoret murenik ak kobogorisiek. 5Ko u ye baorianjina tisiindet ne o, ak kapkiruoget tugul ne bo boisiek: che kianyorune baronok, che kiaibe koba oldab tupchosiek, ak kiawe Damasko, ale amut ichek che kimi oloto kobwa Jerusalem ko ratotin, si kobiit kebir.
6Ak ye kiawendi, ko karikyi Damasko, ko katonon asis, koluu eng’ sainato lapkeiyet ne o ne kibunu kipsengwet koluucha komoswek tugul. 7Ak kiabutyi ng’ony, ak agas kutit kolenja, Saul, Saul, amu nee si iusa? 8Ak kiawolu ale, I ng’o inye, Kiptaiyandani? Ak kilenja, A Jesu ne bo Nasaret, ne iuse. 9Ak kigeer lapkeiyet iman che kimi kobota, ago kima kas kutitab inendet ne king’alalwa. 10Ale, Ayai nee anyun, Kiptaiyandani? Kolenja Kiptaiyat, Ng’eet, ui Damasko; si kemwaun eng’ oloto tuguk tugul che kigeng’at iyai. 11Ak ye kima kota amuchi ageer kiy amu liletab lapkeiyonoto, ait Damasko, konamota eut ichek che kimi kobota.
12Ak kinyo ole ami, chito age ne keguure Anania, chito ne bo iman eng’ ribetab Ng’atutiet, ne kibaorianjin Yahudik tugul che kimenyei oloto kole mie. 13Ak ye kitononi eng’ ye negitena, kolenja, Ne kitupche Saul, keerte. Ak eng’ sainato ageer inendet. 14Ak kile, Kigolewenin Jehovah ne bo kwanisiekyok si kobiit inai magennyi, ak igeer Inendet ne bo Imanda, ak igas ng’olyot ne bunu kutinnyi. 15Amu iegu baoriandennyi eng’ bik tugul agobo tugul che koigeer ak che koigas. 16Ta igeni nee anyun nguno? Ng’eet kibatisanin, ak kiundo tengekwogiguk iguure kainennyi.
17Ak kingo kaaweektege Jerusalem, ak kingota asae eng’ hekalut, kobutya kit ne u ruon, 18ageer inendet kolenjina, Igirgir, chakte, mande eng’ Jerusalem: amu mataachei baornatet eng’ inye agobo ane. 19Ak kiale, Kiptaiyandani, ingen icheget kole kiarate ak abire eng’ sunagogit age tugul ichek che kiiyanin: 20ak ye kingetumdoi korotikab Stepano baoriandeng’ung’, ko, kiatononi agane eng’ yoto, ak achame, ak aribe ngoroikab icheget che kibarei inendet. 21Ak kilenja inendet, Ui: amu ayoktoin iwe ole loo agoi oldab Bororiosiek.
Komwaei Paulo kole kigisikyi bororietab Rom
22Koepchi it anyun ichek inendet agoi ng’olyondonito; yeityo komwa eng’ kutit ne o, kole, Oiste chito ne u nito kwo eng’ ng’ony: amu manyolu kosob. 23Ak ye kita koboldos, ak kowirtoi ngoroikwak, ak kowastoi temburiek koba barak, 24kong’at kiptaiyat ne o kole kimut inendet kwo irimet, kong’at kole, Ogine eng’ biret ne bo kipcharitisiek, si konai inendet kit ne kabolji ichek ko u noto agobo inendet. 25Ak ye kingo kagorate inendet anok, kolenji Paulo kiptaiyatab bogol ne kitononi eng’ yoto, Tos chamdoi ng’atutik eng’ okwek obir chi ne Romanindet, ama kiruokyi? 26Ak kingogas kiptaiyandanato bo bogol noto, kwo ole mi kiptaiyat ne o, ak komwachi inendet kolenji, Imache iyai nee nguno? Amu Romanindet chichi. 27Konyo anyun kiptaiyat ne o, ak kolenji inendet, Mwawa, tos i Romanin? Ak kile, Ee. 28Kowol kiptaiyat ne o kole, Kiaegu chitab bororioni eng’ alyet ne o. Ak kile Paulo, Kigisikya bororionito. 29Koba anyun eng’ sainato ichek che kimachei kogine inendet: ak kiiywei agine kiptaiyat ne o, ye kingonai kole kaga Romanindet inendet, ak amu kiga korat inendet.
Koetegei Paulo eng’ kapkiruok
30Ago ye kimachei konai komie eng’ betut ne bo aeng’, kit ne koitaame Yahudik, kotiach inendet, ak kong’at tisiik che eechen ak kapkiruoget tugul kotuiyo, ak komut Paulo kochorgei, ak konde inendet tainywa.
Currently Selected:
BOISIONIKAB CHE KIYOKTOI 22: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
