BOISIONIKAB CHE KIYOKTOI 21
21
Kong’eete Mileto agoi Turo
1Ak ye kingo kagebesie ak icheget, ak ketau kebe eng’ melit, kilitit banda, kitorjige Kos, ak betut ne kiisubi noto keit Rodo, ak kebe eng’ oloto agoi keit Patara: 2ak ye kingenyoru melit ne landoi kowendi Poinike, kelany, ak kebe. 3Ak ye kiga kegeer Kupro, kesiirtoe komi eut ne bo katam, kebe agoi Suria, ak kechoruge eng’ melit eng’ Turo: amu yoto ye kinemune tugukab melit. 4Ak ye kiga kenyoru alamalyet, ketebi eng’ oloto betusiek tisab: ak kimwachi ichek Paulo eng’ Tamirmiriet kolenji, amat kotiech Jerusalem. 5Ak kingo kagigesu betusiechoto, kebe bandanyo; ak kiiyomisech ichek tugul koboto osotik ak lagok, agoi kemande eng’ nganaset: ak kegutung’se eng’ ngegut, kesa 6ak kigochige saisere; kelany anyun melit koweek ichek koba ga.
Agoi Kaisaria
7Ak ye kiga kigesu banda ne bo melit kebunu Turo, keit Ptolemai; ak kigat tupchosiek, ak ketebi koboto ichek betut agenge. 8Ak eng’ betut ne bo aeng’ kebe, agoi keit Kaisaria: ak kebe gotab Pilipu amdoindet ne bo logoiywek che miach, inendet ko agenge eng’ bik tisab, ak kigitebi ak inendet. 9Kitinyei chichito tibik ang’wan, bergeinik, che kimaoteni. 10Ak ye kita ketebye eng’ betusiek che chang’ eng’ oloto, konyo kochorgei maotiot age ne bunu Judea ne kigiguure Agabo. 11Ak kingo kagoit ole kimi, konam birenetab Paulo, ak korate kelyekyik ak eunekyik, ak kole, Mwaei Tamirmiriet ne Tilil ko u ni kole, Ratei ko u nito Yahudik che mi Jerusalem chitab kobo birenoni, ak tun indoi inendet eunekab Bororiosiek.
12Ak kingegas ng’alechuto, kigaigai inendet, achek ak bikab oloto, si matogosta Jerusalem. 13Kowol Paulo kole, Oyae nee, orirtosi ak obare muguleldanyu? Amu a chobot, ma kerata kityo, ago ame eng’ Jerusalem agobo kainetab Kiptaiyat Jesu. 14Ak ye kimata kocham ko u noto, kesisye, kemwa kele, Ingoyaak magetab Kiptaiyat.
Agoi Jerusalem
15Ak kingobata betusiechoto kenam tugukyok ketogoste Jerusalem. 16Ak kigibe koboto alamalyet che kibunu Kaisaria, komutu Mnason ne bo Kupro, ne agenge ne bo alamalyet ne bo keny, ne kigibendi ketebe gonnyi.
Kotiemei Paulo kotuiyo Yahudik che Kristianik
17Ak kingeit Jerusalem, kotaachech tupchosiek eng’ boiboiyet. 18Ak betut ne kiisubi betunoto kebe achek ak Paulo gab Jakobo; ak kimi boisiek tugul. 19Ak kingo kagogat ichek, kotetyi tuguk tugul agenge agenge che kiga koyai Jehovah eng’ boisiennyi eng’ Bororiosiek. 20Ak kingogas ichek ng’olyondonoto, kogonyit Jehovah; ak kolenji ichek inendet, Igeere anyun, ne kitupche, ole te elfusiek ng’isiat eng’ kwenutab Yahudik che kigoyan; ak tinyei tugul kagiiletab ge agobo Ng’atutiet: 21ak kigiborji ichek agobo inye, kele, ineti Yahudik tugul che mi oldab Bororiosiek kobagakta Musa, ilenjini amat komuratan lagokwak, anan kosub bitonwek. 22Nee anyun nguno? Magogas ichek iman kole kaiitu. 23Yai anyun ni kimwaun: Kitinye bik ang’wan che kigoarorta kiy eng’ kayosiet; 24imut anyun bichu, ak ianyinyge koboto ichek, ak igamanji feda, si kobiit kicherji metowekwak: si konai tugul kole mami imanit eng’ tuguchoto kigiborji agobo inye; ago inye iwendoti komie, iribe Ng’atutiet. 25Ago eng’ Bororiosiek che kigoyan, ko kigesir ketil kiruoget kele, kotabanegei tuguk che kieng’jin kanamonik, ak korotik, ak banyek che bo che kagiget, ak sokset. 26Komut anyun Paulo murenjoto, ak eng’ betut ne bo aeng’ koanyinygei koboto icheget ak kwo hekalut orit, kobortoi kasuldaetab betusiek che bo kaanyinyet, agoi kigoito kagochinet ne bo age tugul eng’ ichek.
Bolatet eng’ Jerusalem; kenamei Paulo
27Ak ye kimachei kogesgei betusiek tisabu, kowas tuiyet Yahudik che kibunu Asia, ye kingogeer inendet komi hekalut, ak konam inendet, 28koboldos, kolen, Okwek bikab Israel, otoretech! Chichito ne ineti bik tugul eng’ komosta age tugul kowech bik, ak Ng’atutiet, ak yuto: ak koboto noto koimut Yunanik agichek kobwa hekalut, ak kagong’wanit yuto tilil. 29Amu kiga kogeer Tropimo Epesoindet komi koboto inendet eng’ nganaset, ne kilen kiimutu Paulo konyo hekalut.
30Kowasgei anyun nganaset komugul, ak kiruai bik kibagenge: ak konam Paulo, ak kochuut komong’ eng’ hekalut: ak kigiger kurgotik eng’ sainato. 31Ak ye kicheng’ei kobar inendet, koityi ng’alek kiptaiyat ne o ne bo murenikab luget kole, mitei chemarget Jerusalem komugul. 32Komut ngunoto askarik ak kiptainikab bogolwogik, koruai kochortagei ole mi ichek: ak kingogeer ichek kiptaiyat ne o ak askarik, kobagakta biret ne kibirei Paulo. 33Konyo anyun kiptaiyat ne o korik, ak konam inendet, ak kong’at kole, kerat inendet eng’ sirimwek aeng’; ak koteebe kole, ng’o nito? Ak kayai nee? 34Ak kobolyo alak eng’ tuiyet komwaei kit age komwaei alage kit age: ak ye kima imuch konai komie kit ne bo bolatet, kong’at kole kimut inendet kwo irimet. 35Ak kingoit long’eiywot, koganab askarik inendet amu koromnatetab tuiyet; 36amu kiisubi tuiyet ne bo bik, koboldos, kolen, Oiste inendet.
37Ak ye kigimachei kimut Paulo kwo irimet, kolenji kiptaiyat ne o, Ichamwa amwaun ng’olyo? Kolenji, Tos ingen kutitab Yunanik? 38Tos ma i Misrindet ne kiing’eet lomset yaginye ak komut bik elfusiek ang’wan koba ong’atet, bik che kiguure Rumik? 39Ago kile Paulo, A Yahudiot ne bo Tarso eng’ Kilikia, a bo nganaset ne ma nyerat: ak asomin ale, chamwa ang’alalji bik. 40Ak ye kingo kagochamji, kotonone Paulo long’eiywot, ak koborji bik eng’ eut kosisyo; ak ye kingo kagosisyo inne, kong’alalji ichek eng’ kutitab Hebranik, kole,
Currently Selected:
BOISIONIKAB CHE KIYOKTOI 21: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
