BOISIONIKAB CHE KIYOKTOI 15
15
Kristianik che bo Bororiosiek, ak Ng’atutikab Musa
1Ak kichorgei bik alak che kibunu Judea ak konet tupchosiek, kole, Ngot ko magimuratanak ko u biteetab Musa, ko momuchi onyoru sorunet. 2Ak ye kingo kagotiiyo Paulo ak Barnaba mising’ ak koteebegei mising’ koboto ichek, kolewen tupchosiek Paulo ak Barnaba, ak alak eng’ ichek, kotogosta koba Jerusalem ole mi che kiyoktoi ak boisiek agobo ng’olyondonito.
3Ak kingo kagoyomis anyun ichek kaniset eng’ bandanywa, kobun Poinike ak Samaria, komwaitaati agobo che kigowalogis koyan Jehovah eng’ Bororiosiek: ak kiigochi ng’olyondonoto tupchosiek tugul boiboiyet ne o. 4Ak kingo kagoit Jerusalem, kotaach ichek kaniset ak che kiyoktoi ak boisiek, ak komwachi ichek tuguk tugul che kiga koyai Jehovah koboto icheget. 5Ago kitononso alak eng’ kasubikab Parisaik che iyanotin, kole, Kanyol kimuratan ichek, ak keng’at ichek korib Ng’atutietab Musa.
Kapkiruok eng’ Jerusalem
6Ak kiiyumgei che kiyoktoi ak boisiek si kobiit kogeer ole teptoi ng’olyondonito. 7Ak kingo kagoteebegei mising’, kotonon Petero ak komwachi ichek, kole, Che kitupche, ongen okwek ole kigolewen Jehovah eng’ kwenung’wong’ koboch ye bo ui, kole, kogas Bororiosiek ng’olyot ne bo logoiywek che miach eng’ kutinnyu, ak koyan. 8Ak kibaorianji ichek Jehovah ne ingen mugulelwekab bik, kogochi ichek Tamirmiriet ne Tilil, ko u ye kigonech; 9ak kima ibesiech ak icheget, ye kiitilili mugulelwekwak eng’ kayanet. 10Kalya nguno anyun si otiem Jehovah kot onde chogit kaatitab alamalyet, ne kima imuch koib kwanisiekyok anan achek? 11Ago kiyani kele kisoruech eng’ mieindab Kiptaiyat Jesu, ko u ye kisoru agichek.
12Kosisyo anyun tuiyet komugul; ak koepchi it Barnaba ak Paulo kotetyin ichek kaborunoik ak kwong’utik che kiga koyai Jehovah eng’ ichek eng’ kwenutab Bororiosiek. 13Ak kingo kagosisyo, kowol Jakobo, kole, Che kitupche, ogaso. 14Kagomwa Simion ko u ye kirutochi Jehovah Bororiosiek eng’ tai, si kobiit kolewenji kainennyi bik eng’ ichek. 15Ak kanamgei nito ak ng’alekab maotik; ko u ye sirat, kole, 16Ye ibata tuguchu aweege, Ak ateech kogeny gotab Daudi, ne kigolul; Ak ateech kogeny komoswek che kigolulyo, Ak alum kotonon: 17Si kocheng’ bik che ng’etunotin Kiptaiyat, Ak Bororiosiek tugul che kiguurtoe kainennyu. 18Mwaei Kiptaiyat, ne yaei tuguchu si konaak koboch taunetab ng’ony.
19Noto anyun, atile kiruoget ko u ni ale, amata kinyalil achek ichek che bo Bororiosiek che bwanjin Jehovah; 20ago ongesirji ichek, kelenji kotabanegei muruonindab kanamonik, ak sokset, ak ne bo tuguk che kagiget, ak korotik. 21Amu kitinyei Musa koboch ibinwek che bo keny eng’ nganasok tugul, icheget che amdoi agobo inendet, che kisomani eng’ sunagogisiek eng’ sabato age tugul.
Baruet ne kisirjin Kristianik che bo Bororiosiek
22Kogeer anyun che kiyoktoi ak boisiek, koboto kaniset komugul, kole mie kolewen bik alak eng’ ichek, ak koyokto koba Antiokia koboto Paulo ak Barnaba; choto ko Judas ne kigiguure Barsaba, ak Sila, bik che eechen eng’ tupchosiek: 23ak kisir ko u ni ak koyoktoe ichek, Kisirjini achek che kiyoktoi ak tupchosiek che boisiek, tupchosiek che bo Bororiosiek che mi Antiokia ak Suria ak Kilikia, kigatok: 24amu kogegas kele, inyalilok eng’ ng’alek bik alak che kibunei kwenunnyo, kong’emei sobonwekwok; bik che kima king’at ko u noto; 25kagigeer kele mie eng’ achek, che kagechamnyechi, kelewen bik ak kiyokwok koboto chamanikyok Barnaba ak Paulo, 26bik che kigogoito sobonwekwak amu kainetab Kiptaiyandennyo Jesu Kristo. 27Kagiyogu anyun Juda ak Sila, si komwawok icheget agichek tuguchuto eng’ kutuswekwak. 28Amu kigeere kele mie eng’ Tamirmiriet ne Tilil, ak eng’ achek kele, magigesenjok milet ne nyigis kosiir tuguchu nyolu; 29kele otabanege tuguk che kieng’jin kanamonik, ak korotik, ak banyekab che kagiget, ak sokset; ngotabanege choto, komieitu eng’ okwek. Saisere.
30Ye kingo kagiyokto koba anyun, kochortagei koba Antiokia; ak kingo kagoyum tuiyet, kogochi baruet. 31Ak kingo kagosoman koboiboitu agobo kagaigaet. 32Ak kiigiil Juda ak Sila, tupchosiek eng’ ng’alek che chang’, ak kogimit amu ki maotik agichek. 33Ak kingo kagotebe oloto betusiek alak, kounda tupchosiek ichek eng’ kalyet koba ole mi ichek che kiiyogu. 34Ago kicham Sila kota kotebe oloto.
35Ago kitebe Paulo ak Barnaba Antiokia, koneti ak koamdoi ng’olyotab Kiptaiyat, koboto bik alak che chang’ agichek.
Kobestos Paulo ak Barnaba
36Ak kingobata betusiek alak kolenji Paulo Barnaba, Ingeweege nguno kerutochi tupchosiek eng’ nganaset age tugul ole kigeamdaate ng’olyotab Kiptaiyat, ak kegeer ole teptoi. 37Ak kimachei Barnaba mising’ komut Johana, ne kigiguure Mariko, koba tugul. 38Ago kiibwat Paulo kole, ma mie kimut inendet ne kiga kobagakta ichek eng’ Pampulia, ama cham koba boisiet koboto ichek. 39Ak king’eetyo ng’alek che koromen, kot kopcheigei ichegei, ak kiimut Barnaba Mariko, ak kobun melit agoi Kupro; 40ago kilewen Paulo Sila, ak koba, ko kagonde tupchosiek ichek mieindab Kiptaiyat. 41Ak kobun Suria ak Kilikia, kogimitoti kanisosiek.
Currently Selected:
BOISIONIKAB CHE KIYOKTOI 15: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
