BOISIONIKAB CHE KIYOKTOI 14
14
Komi Paulo ak Barnaba Ikomio
1Ak ye kimi Ikonio, koba tuwai agoi sunagogitab Yahudik, ak kong’alal kot koyan tuiyet ne o ne bo Yahudik ak Yunanik. 2Ago kiim Yahudik che ki bistoik sobonwekab Bororiosiek kot kogochi kowech tupchosiek. 3Kitebe oloto anyun betusiek che chang’ ak kong’alali eng’ nyiganatet agobo Kiptaiyat, ne kibaorianji ng’olyotab mieindanyi, ak kogochin koyaak kaborunoik ak kwong’utik eng’ eunekwak. 4Ago kipcheigei tuiyet ne bo nganaset; ak kinamgei alage ak Yahudik, konamgei alage ak che kiyoktoi.
5Ak ye kimachei Bororiosiek ak Yahudik koboto bounikwak kobokyi ichek, kole koyachi ne ya, ak kolach eng’ koik, 6kosib konai, ak kimwechi Lustra ak Derbe, nganasok che bo Lukaonia, ak korotinwek che negite oloto: 7ak kiamda logoiywek che miach eng’ oloto.
Komi Lustra
8Ak kitebyei chito age eng’ Lustra, ne kima ko kimen kelyekyik, ne ki solomwo koboch komi moetab kamet, ne kitomo kowendot. 9Kigas chichoto Paulo kong’alali: ak kingochiilji kong’ inendet chichoto, ak kogeer kole tinyei kayanet ne kimuchi kisoob, 10komwa eng’ kutit ne o kole, Tonon komie eng’ kelyeguk. Ak kitoromben ak kowendot. 11Ak kingogeer tuiyosiek kit ne kayai Paulo, kobolyo eng’ ng’alekab Lukaonia, kole, Kachorjech ge cheptalelisiek eng’ kergeindab bik. 12Ak kiguure Barnaba, Seu; koguure Paulo, Herme, amu ki ng’alalindet ne o inendet. 13Ak kiget tisiindetab Seu ne kimi hekalunnyi taitab nganaset, tuga ak sinendoik kobwa kurgotik, ak kimachei inendet koboto tuiyosiek kogoito tisieywot.
14Ago ye kingogas agobo noto che kiyoktoi Barnaba ak Paulo, kogerer ngoroikwak, ak koruai koba kwenutab tuiyet, koboldos, 15kolen, Murenju, kalya si oyai tuguchu? Ki bik agachek, che kergei ak okwek, ak kagiibwok logoiywek che miach, si kobiit oweige omete tuguchu matilei kiy ak obwanji Jehovah ne sobei, inendet ne kiyaei kipsengwet ak ng’ony ak nyanjet, ak tugul che mi oloto: 16kibagakyi inendet bororiosiek tugul eng’ ibinwek che kigosiirto, kobendat eng’ ortinwekwak. 17Ago kima tebi buch inendet ama tinyei baoria, amu kiyai ne mie, ak kogonok ropta ne bunu kipsengwet ak betusiekab ruratet, kogochin kobiyong’so mugulelwekwok eng’ amitwogik ak kagasetab ge. 18Ak ki negit kotemene koger tuiyosiek eng’ ng’alechu si mata kogochi tiseiywot.
19Ago kibwa Yahudik che kibunu Antiokia ak Ikonia: ak kingo kagolom tuiyosiek, kolach Paulo eng’ koik, ak kochuut komanda eng’ nganaset, kolen kagome. 20Ago ye kitonondos alamalyet ko kayiem inendet, kong’eet, ak kwo nganaset: ak eng’ betut ne kiisubi noto koba Derbe ak Barnaba.
Koweekyingei che kiyoktoi Antiokia
21Ak ye kingo kagoamji logoiywek che miach nganasanato, ak ko kagoyai che chang’ koek alamalyet, koweektagei koba Lustra, ak Ikonia, agoi Antiokia, 22kogimitoti sobonwekab alamalyet, kogiili koba tai eng’ kayanet, ak kolenji, kanyol keit bounatetab Jehovah eng’ nyalilwogik che chang’. 23Ak kingo kagolewenji ichek boisiek eng’ kaniset age tugul, ak kosa eng’ karugutetab ge, konde ichek eutab Kiptaiyat, ne kiga koyan.
24Ak kibun Pisidia, ak koit Pampulia. 25Ak kingo kagoamda ng’olyot eng’ Perga, kochortagei Atalia; 26ak kibun melit eng’ oloto agoi Antiokia, oloto ole kigindae ichek mieindab Jehovah agobo boisiet ne kiga koyai kosulda.
27Ak kingo kagobwa, koyum kaniset komugul, komwachi tuguk tugul che kiga koyai Jehovah eng’ ichek, ak ko u ye kiga koyatyi Bororiosiek kurget ne bo kayanet. 28Ak kitebi betusiek che chang’ koboto alamalyet.
Currently Selected:
BOISIONIKAB CHE KIYOKTOI 14: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
