BOISIONIKAB CHE KIYOKTOI 13
13
Kaniset ne mi Antiokia
1Ak kimi kaniset ne kimi Antiokia, maotik ak konetik, Barnaba, ak Simion ne kigiguure Niger, ak Lukio ne bo Kurene, ak Manaen ne kigigui koboto kiruogindet Herod, ak Saul. 2Ak ye kiboisiechin Kiptaiyat ak korugutegei, kole Tamirmiriet ne Tilil, Otabanwa Barnaba ak Saul agobo boisiet ne kiaguurji. 3Ak ye kingo kagorugutgei ak kosaei ak kogonoor ichek eunekwak, koyokto koba.
Barnaba ak Saul eng’ Kupro
4Ak kingo kagoyokto ichek Tamirmiriet ne Tilil, kochorjigei Seleukia; ak kiba eng’ oloto kobun melit agoi Kupro. 5Ak ye kimitei Salamis, koamda ng’olyotab Jehovah eng’ sunagogisiekab Yahudik: ak kimi koboto Johana ne kiboisiechinoti.
6Ak kingo kagobun emet komugul ne kiikwen beek agoi koit Papos, konyorji oloto bonin, maotio ne bo lembech, ne Yahudiot, ne kigiguure Bar-Jesu; 7ne kimi koboto bounindet, Sergio Paulos, chito ne ng’om. Kiguur chichito Barnaba ak Saul koba ole mi inendet, ak kimachei kogas ng’olyotab Jehovah. 8Ago kigirinda ichek Eluma ng’orindet (amu u noto kainennyi ye kiweech), kigirinda bounindonoto, kocheng’ei komaas kole si manyor kayanet. 9Ago kinyi Tamirmiriet ne Tilil Saul, ne kiguure Paulo, ak kiichiilji kong’, 10ak kole, Ee inye ne nyiitat ng’alset tugul ak ng’omnatet tugul ne bo kabeetet, inye weritab oindet, inye bunyotab imanda tugul, mebagaktoi imaas ortinwek che lititen che bo Kiptaiyat? 11Ak keer nguno anyun-o, mi eutab Kiptaiyat baragung’ung’, ak iegu kipkoratia, si mata igeer asista eng’ betusiek alak. Ak kiibutyi ngunoto mirmirindo ak mesundeito; ak kiwendot kocheng’at bik che namoti inendet eut. 12Kingogeer anyun bounindet kit ne kayaak, koyan, kokwong’ agobo konetisietab Kiptaiyat.
Antiokia eng’ Pisidia: Amdaet ne Kiamji Paulo Yahudik
13Kiba anyun Paulo ak che kimi koboto inendet kobun melit eng’ Papos, ak koit Perga eng’ Pampulia: ak kiwa Johana koweektagei Jerusalem kobagakta ichek. 14Ak kingobun ichek Perga, koit Antiokia ne bo Pisidia; ak kiba sunagogit eng’ betutab sabato, ak koteb ng’ony.
15Ak kingobata somanetab Ng’atutiet ak sirutikab maotik koyokto bounikab sunagogit bik koba ole mi ichek, kolenji, Che kitupche, ngotinye ng’olyo age tugul ne imuchi kotoret bichu, omwa. 16Kotonon anyun Paulo, ak koborjine eut, kole, Ogaso okwek bikab Israel, ak okwek che oiywei Jehovah. 17Kilewen Jehovah ne bo bichu Israel kwanisiekyok, ak kotoror bichoto ye ki bunotik eng’ emetab Misri, ak kiimut ichek komong’ eng’ eut ne kim. 18Ak kimuitochi ichek eng’ atebosiekwak eng’ olo bo kenyisiek artam eng’ ong’atet. 19Ak kingo kagong’em bororiosiek tisab eng’ emetab Kanan, kogochi ichek emenywa koek borotet, eng’ olo bo kenyisiek bogol ang’wan ak konom: 20ak kingobata tuguchu kogochi ichek kiruogik agoi Samuel maotiot. 21Ak kingobata kosom laitoriat: ak kiigochi Jehovah ichek Saul weritab Kis eng’ kenyisiek artam, chito ne bo oretab Benjamin. 22Ak kingo kagoisto inendet, kong’eetyi Daudi koek laitoriandenywa; ne kibaorianji agine kole, Kaanyoru Daudi weritab Jesii, chito ne iboiboi muguleldanyu, ne tun yaei magutikyuk tugul. 23Ak kiimutyi Jehovah Israel Yetindet, Jesu, eng’ keswekab chichito, ko u arorutiet; 24ye kiga sib koamji Johana bik tugul che bo Israel, kabatisanet ne bo sigunet, ye kitomo konyo inendet. 25Ak ye ki negit koges Johana bandanyi, komwa kole, Olen a ng’o? Ma a inendet. Ago ogeero, isubwa age, ne manyoljina atiakyi kweonikab kelyekyik.
26Che kitupche, lagokab keswek che bo Abraham, ak alak che mi kwenung’wong’ che iywei Jehovah, kagiyokwech achek ng’olyondoni bo yetunet. 27Ichek che menyei Jerusalem, koboto bounikwak, amu kima nai inendet, anan kutuswekab maotik che kisomani eng’ sabato age tugul, kosuldae kutuswechuto kiruoget ne kiiruokyi inendet. 28Ak nganda kimanyor eng’ inendet ng’olyot ne igochin kome, ago kisom ichek Pilato kole, kebar inendet. 29Ak ye kingo kagoges tuguk tugul che kiga kisir agobo inendet, kochoor inendet eng’ ketit, ak konde kererit. 30Ago kiing’eet Jehovah inendet komong’ eng’ che kibek: 31Ak kigeer inendet eng’ betusiek che chang’ ichek che kitogosu koboto inendet kobunu Galili kobwanei Jerusalem, che nguno ko baorinik eng’ bik. 32Ak kiibwok logoiywek che miach che bo arorutiet, ne kigigochi kwanisiekyok, 33ko u ye kigosuldochi Jehovah lagokyok noto, amu kiing’eet Jesu; ko u ye sirat eng’ Tiendab Kalosunet ne bo aeng’, kole, I werinnyu, kaasichin rani. 34Ak ko u ye kiing’eet inendet komong’ eng’ che kibek, ma koweekyingei amu inendet kogeny nunet, kimwa ko u ni, kole, Tun agonin kaberuroik che tililen, ak ko bo iman, che bo Daudi. 35Amu kimwa agine eng’ Tiendo age, kole, Matun igochini neng’ung’ Ne Tilil kogeer nunet. 36Amu ye kingo kagoboisiechi Daudi kiruogutikab Jehovah eng’ ibindanyi, konuuch, ak kigitub koboto kwanisiekyik, ak kogeer nunet: 37ago ma keer nunet inendet ne kiing’eet Jehovah. 38Ingonaak anyun eng’ okwek, che kitupche, kele, kimwawok eng’ chichi nyoetab kaat ne bo tengekwogik: 39ak kiityin imanda eng’ inendet age tugul ne iyani, eng’ tuguk tugul, che koma komuchi koiityok imanda Ng’atutietab Musa. 40Oripge anyun, si manyonjok ne kigimwa eng’ maotik; kele,
41Ogeero, okwek sasik, okwong’ie, ak olusye;
Amu ayae boisiet eng’ betusiekwok,
Boisiet ne magoi oyan matiny, agot ngo mwawok chi.
42Ak kingota komandoi ichek, kosom kole, tun ko ta koamji ichek ng’alechato eng’ sabato ne nyonei. 43Ak kingo kagomanda tuiyet eng’ sunagogit, kosub Paulo ak Barnaba che chang’ che bo Yahudik ak che konyiti Jehovah che kiwalak kobunji Yahudik: ye kingong’alaljin ichek, kogiil kole koba tai eng’ mieindab Jehovah.
44Ak eng’ sabato ne isubi noto, koyumgei nganaset che negit tugul kole kogas ng’olyotab Jehovah. 45Ago ye kingogeer Yahudik tuiyosiek, koam ng’et kong’, ak koesio eng’ kimnatet ng’alek che kimwaei Paulo, ak komwa ng’alek che yaachen kochubis. 46Kong’alal anyun Paulo ak Barnaba eng’ nyiganatet, kolen, Konyolu kemwawok korok ng’olyotab Jehovah. Amu ogirindoi, ak oruokyinige okwege ole manyolu onyoru sobondab koigeny, ogeero, kagibe oldab Bororiosiek. 47Amu king’atech Kiptaiyat ko u noto, kole,
Kaandein iegu lapkeiyet ne bo Bororiosiek,
Si kobiit iegu yetunet agoi tabandab ng’ony.
48Ak kingogas Bororiosiek ng’olyondonito, koboiboitu, ak kogonyit ng’olyotab Jehovah: ak koyan tugul che kiga kelewenji sobondab koigeny.
49Ak kiyom ng’olyotab Kiptaiyat koronoto tugul. 50Ago kiinde Yahudik ng’alekab chaamset kobogorisiek che konyiti Jehovah ak ko toogunotin, ak bik che eechen che bo nganaset, ak kiing’eet usisiet kous Paulo ak Barnaba, ak koon komanda eng’ kiwotosiekwak. 51Ago kilelekyi ichek temburiek che mi kelyekwak, ak kiit Ikonio. 52Ak kinyi alamalyet boiboindo ak Tamirmiriet ne Tilil.
Currently Selected:
BOISIONIKAB CHE KIYOKTOI 13: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
