BOISIONIKAB CHE KIYOKTOI 12
12
Usisiet ne bunu Herod: kochilili Petero eng’ korgoret
1Ak ye ki negit betusiechoto kotoi laitoriat Herod kous alak che bo kaniset. 2Ak kibar Jakobo ng’etab Kametab Johana eng’ rotwetab chok. 3Ak ye kingogeer kole kiibaibai noto Yahudik, kotoi konam Petero agine. Ak ki betusiekab makatiat ne ma kinde mermerek, betusiechoto. 4Ak kingo kagonam inendet, konde korgoret, ak kogochi askarik ang’wan konyil ang’wan korib inendet; kolen ye ibata Paska komutyi bik. 5Kigirib Petero anyun eng’ korgoret: ago kisa kaniset Jehovah mising’ agobo inendet.
6Ak ye kimachei komoong’ Herod inendet, ko kirue Petero kwenutab askarik aeng’ eng’ kemounoto, koratate sirimwek aeng’: ak kirib korgoret ribik eng’ taitab kurget. 7Ak ogeero, kitonon malaikaiyatab Kiptaiyat eng’ ye negite inendet, ak kiikweny lapkeiyet got: ak kiirabach karastab Petero, ak kong’eet kolenji, Ng’eet chokyi. Ak kiibutyo sirimwek che kimi eunekyik. 8Ak kolenji malaikaiyat inendet, Ratge, indege kweoniguk ak irat. Ak kiyai ko u noto. Ak kilenji, Ilaach ngorieng’ung’, ak isubwa. 9Ak kiwa sang’ ak kosub; ak kima nai kole iman kit ne kayai malaikaiyat, ago kilen kageer ng’ang’utiet. 10Ak kingo kagosiir ripset ne bo tai ak ne bo aeng’, kobwa agoi ormarichet ne bo karnet ne kibunei kebendi nganaset; koyatak inegei: ak kimanda sang’, ak koba kobun oret agenge; ak eng’ sainato kobagakta inendet malaikaiyat kwo.
11Ak ye kingobwat Petero, komwa kole, Kaanai nguno iman, ale, kagoyok Kiptaiyat malaikaiyandennyi ak kasorua eng’ eutab Herod, ak eng’ kagenisiet tugul ne bo bikab Yahudik.
12Ak ye kingo kagobwat komie, konyo gotab Maria kametab Johana ne kiguure kainennyi ne bo aeng’ Mariko; ole kiga koyumjigei che chang’ ak kosaei. 13Ak ye kingogongony kurgetab ormarichet, konyo chepto ne kigiguure Roda kogas. 14Ak kingonai cheboto kutitab Petero, koma koyat ormarichet amu boiboiyet, ago kilabat go, ak komwaita kole tononi Petero eng’ ormarichet. 15Ak kilenji ichek inendet, Amin iywek. Ago kimwa eng’ kimnatet kole, u noto. Ak kimwa ichek kole, Malaikaiyandennyi. 16Ago kites Petero kogongony: ak kingo kagoyat, kogeer inendet, ak kokwong’io. 17Ago kiiborjine inendet ichek eut kosisyo, ak kotetyi ole kagomutunda Kiptaiyat inendet komong’ eng’ korgoret. Ak kimwa kole, Omwachi ng’alechu Jakobo, ak tupchosiek. Ak kiwa agoi komosta age.
18Ak kingo kagoeech, kotoptobenso askarik mising’, kole, katepto ano Petero. 19Ak ye kingo kagocheng’ Herod inendet, ama konyor, kogin ribik, ak kong’at kole kanyol kebar. Ak kichortagei eng’ Judea kwo Kaisaria, ak kotebe oloto.
Meetab Herod
20Ak kinerekyi mising’ Herod bikab Turo ak Sidon: ak kobwanji inendet eng’ kabwatet agenge, ak, kingonam chorua ak Blasto, ne kiribei ole kirue laitoriat, kosom kalyet, amu kibaei emetab laitoriat emenywa.
21Ak eng’ betut ne kiging’at, kolaach Herod ngoroikab laitornatet, ak kotebe ng’echeretab kiruoget, ak kong’alalji bichoto. 22Ak kibolyo bik, kole, Kutitab cheptalelit nito, ma bo chi. 23Eng’ sainato anyun kobir inendet malaikaiyatab Kiptaiyat, amu ma konyit Jehovah: ak kiam inendet kutik, ak kime. 24Ago kiner ng’olyotab Jehovah, ak kotesak.
25Kiweektagei Barnaba ak Saul Jerusalem, ye kingo kagoges boisienywa, komuti Johana, ne ki kainennyi ne bo aeng’ ko Mariko.
Currently Selected:
BOISIONIKAB CHE KIYOKTOI 12: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
