BOISIONIKAB CHE KIYOKTOI 11
11
Koetegei Petero agobo boisionikyik
1Ak kigas anyun che kiyoktoi ak tupchosiek che kimi Judea kole kogotaach agichek Bororiosiek ng’olyotab Jehovah. 2Ak kingo kagonyo Petero Jerusalem, kobelgei ak inendet ichek che bo kamuratanet, 3kolen, Kiiwe oldab bik che ma kimuratan ak iamisie koboto ichek. 4Ago kitoi Petero kotetyi ichek komie ng’alechato, kolenji,
5Kiami nganasetab Jopa asae: ak kingobutya kiy ne u ruon ageer ng’ang’utiet, ne bo kiy ne kichorugei, ne u anget ne o kot, ne kigichoor kobunu kipsengwet eng’ kuinoik ang’wan; ak kinyo agoi ole ami: 6ak ye kingageer mising’, abwat, ageer tiong’ikab ng’ony che bo kelyek ang’wan ak tiong’ik che bo timin ak tuguk che ichuutegei ak taritik che bo barak. 7Ak kiagas kutit kolenja, Ng’eet, Petero; eny ak iam. 8Ak kiamwa ale, Ma u noto, Kiptaiyandani: amu tom kochut kutinnyu kiy ne ma tilil anan ne ng’wan. 9Ago kiwol kutinato ne bo aeng’ kobunu kipsengwet kole, Amata ing’wanit kit ne kagotilil Jehovah. 10Ak kiyaak kioto konyil somok: ak kigichuut kogeny tugul koba kipsengwet. 11Ak ogeero, kitonondos eng’ sainato bik somogu eng’ taitab got ole kigimi, che kigiyok eng’ Kaisaria kobwa ole ami. 12Kong’ata anyun Tamirmiriet, kole, kebe tugul, amat isage. Ak kigibe tugul ak tupchosiechu lo agichek; kebe agoi gotab chichoto: 13ak kimwawech ko u ye kiga keer malaikaiyat kotononi eng’ gonnyi, kole, Iyokte bik koba Jopa koguur Simon, ne kiguure kainennyi ne bo aeng’ Petero; 14konyo komwaun ng’alek, che kisorunenen, inye ak gong’ung’ tugul. 15Ak ye kingatau kang’alal, kochorjigei Tamirmiriet ne Tilil ichek, ko u ye kichorjech ge agachek eng’ taunet. 16Abwat anyun ng’olyotab Kiptaiyat, ko u ye kimwa, kole, Kiibatisanis Johana eng’ beek; ago kibatisanok okwek eng’ Tamirmiriet ne Tilil. 17Ngo kiigochi anyun Jehovah ichek konunet ne kergei ak ne kigonech ye kingiyan Kiptaiyat Jesu Kristo, ko tos, kia ng’o anyun, kot amuch agirinda Jehovah? 18Ak kingogas ng’alechuto, kosisyo, kolos Jehovah, ak komwa kole, Kaga kagogochi Jehovah Bororiosiek agichek sigunet ne ibu sobondo.
Kanisetab bik che bo Bororiosiek eng’ Antiokia
19Kiba anyun ichek che kiga yesta amu usisiet ne king’eet agobo Stepano agoi koit Poinike, ak Kupro, ak Antiokia, ko mang’alaljin chi age ng’olyot kobate Yahudik. 20Ago kimi alak eng’ ichek, bikab Kupro ak Kurene, che kingobwa Antiokia kong’alalji Yunanik agichek, koamdoi Kiptaiyat Jesu. 21Ak kimi eutab Kiptaiyat koboto ichek: ak kiiyan bik che chang’ konam ng’alekab Kiptaiyat. 22Ak kigas ng’alek agobo ichek kaniset ne kimi Jerusalem: ak kiiyokto Barnaba kwo kot koit Antiokia: 23ak kingoit inendet, ak kogeer mieindab Jehovah, kobaibait; ak kogiil ichek tugul konamgei ak Kiptaiyat eng’ mugulelwek che bekyinotin: 24amu ki chi ne mie, ak ko nyiitat Tamirmiriet ne Tilil ak kayanet: ak kitesak bik che chang’ kobunji Kiptaiyat. 25Ak kiwa agoi Tarso kocheng’ Saul: 26ak kingo kagonyor, komut konyo Antiokia. Ak kiiyumgei eng’ kenyit agenge koboto kaniset, ak konet bik che chang’; ak kigitoi keguure alamalyet Kristianik eng’ Antiokia.
Boisie ne kigiyoktoe Barnaba ak Saul eng’ Jerusalem
27Ak kichorgei maotik eng’ betusiechoto eng’ Jerusalem kobwa Antiokia. 28Ak kitonon age eng’ ichek ne kigiguure Agabo, ak kobor eng’ Tamirmiriet kole tun biitu rubet ne o ng’ony komugul: ne kiisulda eng’ betusiekab Klaudio. 29Ak kichopgei komie alamalyet koyokyi toretet tupchosiek che kimenyei Judea, chi tugul ko u ye kiimuchi: 30kiyai anyun ko u noto, kiiyokyi boisiek eng’ eunekab Barnaba ak Saul.
Currently Selected:
BOISIONIKAB CHE KIYOKTOI 11: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
