BOISIONIKAB CHE KIYOKTOI 10
10
Petero ak Kornelio
1Kimi chito age Kaisaria, ne kigiguure kainennyi Kornelio, ne ki kiptaiyatab bogol ne bo luget ne kigiguure luget ne bo Italia, 2chito ne kigonyiti Jehovah ak koiywei inendet koboto gonnyi tugul, ne kiigochin bik kagochinoik che chang’, ak kosaei Jehovah kotugul. 3Kigeer eng’ ng’ang’utiet kimni, olo bo sait sogol ne bo bet, malaikaiyatab Jehovah konyonjin inendet, ak kolenji, Kornelio. 4Ak kingogeer inendet mising’ eng’ kaiyweisiet, kole, Tos nee, Kiptaiyandani? Kolenji, Kigoit barak sautiguk ak kagochinoiguk koek kabwatet eng’ taitab Jehovah. 5Iyokte nguno anyun bik koba Jopa, koguur chi ne kiguure Simon, ne kainennyi ne bo aeng’ ko Petero: 6inendet ko toondetab Simon ne teiteindetab muiywek, ne mi gonnyi ngegutab araraita. 7Ak ye kingo kakwa malaikaiyat ne king’alalji inendet, koguur otwogik aeng’ che bo gonnyi, ak askarindet ne kigonyiti Jehovah ne ki age eng’ che kiboisiechin inendet kotugul; 8ak kingo kagomwachi ichek ng’alek tugul, koyokto koba Jopa.
9Ak eng’ betut ne kiisubi betunoto ye kita kobendi, ko karikta nganaset, kotogosta Petero got barak, eng’ olo bo sait lo, kwo kosa: 10ak kiam rubet, ak kimach koamis: ak ye kigichobei amitwogik, kobutyi kiy ne u ruon; 11ak kigeer kipsengwet koyatak, ak kochorugei kit ne u anget ne o kot, kechooru eng’ kuinoik ang’wan agoi ng’ony: 12kimi orit tiong’ik alak tugul che bo kelyek ang’wan ak tuguk che ichuutegei che bo ng’ony ak taritik che bo barak. 13Kinyonji anyun kutit, kolenji, Ng’eet, Petero; eny ak iam. 14Ago kile Petero, Ma u noto, Kiptaiyandani; amu tom aam kiy ne ma tilil anan ne ng’wan koboch atkinyei kora.
15Kinyonji anyun kutit kogeny ne bo aeng’, kolenji, Kit ne kagotilil Jehovah, ko mata ile ng’wan. 16Ak kiyaak kiito konyil somok; ak ngunoto ketaach kioto eng’ kipsengwet.
17Ak ye kita koiimegei Petero mising’ eng’ muguleldanyi kole, iboru nee ng’ang’utioni kagogeer, ogeero, kotononso eng’ kurgat bik che kiga koyok Kornelio, ko kagoteeb ole mi gotab Simon, 18ak koguurso ak koteeb ngo mi Simon oloto, ne kainennyi ne bo aeng’ ko Petero.
19Ak ye kita kobwati Petero agobo ng’ang’utionoto, kolenji Tamirmiriet inendet, Keero, cheng’in bik somogu. 20Ago ng’eet, ak ichortege, ak obe tugul, amesage kiy: amu kaayogu ichek. 21Ak kichortagei anyun Petero kwo ole mi bichoto, ak kole, Ogeero, a inendet ne ocheng’e: nee ne kagonok obwa? 22Ak kile, Kiiborji komie Jehovah Kornelio, eng’ malaikaiyat ne tilil, koyok bik kobwa koguurin iwe gonnyi ne inendet ko kiptaiyatab bogol, chito ne bo imanda ak koiywei Jehovah, ak baorianjin bororiet tugul ne bo Yahudik kole mie inendet, kole si kogasenen ng’alek. 23Koguur anyun kobwa go ak kochopchi ichek ole ruitos. Ak king’eet karon koba koboto bichoto ak tupchosiek alak che kibunu Jopa. 24Ak betut ne kiisubi betunoto koit Kaisaria. Ak kiigeni ichek Kornelio, ko kagoguur tupchosiekyik ak choronokyik che kiingengei komie. 25Ak ye kingwo go Petero, kotoroch Kornelio inendet, ak kobutyi kelyekyik, kogutung’ji. 26Ago kiing’eet Petero inendet kolenji, Tonon; anendet ko a chito agane. 27Ak kingota kong’alaljindos tuwai, kwo go, ak konyor bik che chang’ che kagoyumgei: 28kolenji anyun ichek, Ongen okwek ole kiy ne etan eng’ ng’atutik eng’ chi ne Yahudio konamgei ak chi ne bo boror age anan konyo ole mi; ago kagoborua ane Jehovah kole, si mata aguure chi age ne ma tilil anan ne ng’wan: 29noto anyun kaanyo amata asich kiy ne amwae, ye kingo kageguura. Noto anyun ateebe ale nee ne koguurja. 30Kole anyun Kornelio, Betusiek ang’wan rani koboch yoto agoi saini, ye kiasae eng’ sait sogol eng’ gonnyu; ak keero, kitonon eng’ tainnyu mureno ne ilaachi ngoroik che lilei bich, 31ak kole, Kornelio, kigegas saeng’ung’, ak kigoek kabwatet eng’ taitab Jehovah kagochinoiguk. 32Iyokte anyun bik koba Jopa, koguurun Simon ne kainet ne bo aeng’ ko Petero; mitei inendet ko toondet eng’ gotab Simon teiteindetab muiywek, ye negite ngegutab nyanjet. 33Kiayogu anyun bik eng’ sainato kobwa ole imi; ak kaiyai ne mie amu kainyo. Kimi anyun yu nguno achek tugul eng’ taitab Jehovah, si kegas tuguk tugul che king’atin Kiptaiyat.
Amdaetab Petero
34Ak king’any anyun Petero kutinnyi, kole, Iman ageere ale machamei Jehovah bik alak kosiir alak: 35ago taachaksei eng’ inendet chito ne iywei inendet, ak koyaei iman eng’ bororiet age tugul. 36Ng’olyot ne kiiyokyi inendet lagokab Israel, ko koamda ng’alek che miach che bo kalyet eng’ Jesu Kristo (inendet ko Kiptiyat ne bo tugul)- 37ongen okwek ng’olyondonoto, ne kigiamda eng’ Judea komugul ketaune Galili, kingobata kabatisanet ne kiamdoi Johana; 38ko u ye kiil Jehovah Jesu ne bo Nasaret, eng’ Tamirmiriet ne Tilil ak eng’ kamuktaet: ne kiwendot ak koyaei ne mie, ak kosoobi tugul che kiinyalili oindet; amu kimi Jehovah koboto inendet. 39Ak ki baorinik achek che bo tuguk tugul che kiyai eng’ emetab Yahudik, ak eng’ Jerusalem; ne kibar ichek inendet kogartat eng’ ketit. 40Kiing’eet Jehovah inendet eng’ betutab somok, ak kogoito kotook, 41ma eng’ bik tugul, ago eng’ baorinik che kiga sib kolewen Jehovah, acheget choto che kigiamisiei ak keeisei koboto inendet ko kagong’eet komong’ eng’ che kibek. 42Ak king’atech keamji bik, ak kebaorian kele nito ko inendet ne kiinde Jehovah koek Kiruogindet ne bo che soptos ak che kigobek. 43Baoriani maotik tugul agobo inendet, kole, nyoru nyoetab kaat amu tengekwogikyik eng’ kainennyi age tugul ne iyani inendet.
Konyoru Bororiosiek Tamirmiriet ne Tilil ak kibatisani
44Ye kita komwaei Petero ng’alechu, kochorjigei Tamirmiriet ne Tilil tugul che kigasei ng’olyot. 45Ak kikwong’io ichek che bo kamuratanet che kiiyani, tugul che kibwanei koboto Petero, amu kagerong’ji Bororiosiek agichek konunetab Tamirmiriet ne Tilil. 46Amu kigasei ichek kong’alali eng’ kutuswek che terotin, ak kotorori Jehovah. Kowol anyun Petero kole, 47Imuchi chi koete beek, si ma kibatisan bichu, che kagotaach Tamirmiriet ne Tilil ko u achek? 48Ak king’at kole kibatisan ichek eng’ kainetab Jesu Kristo. Kosom anyun ichek inendet kole kota kobeni betusiek alak.
Currently Selected:
BOISIONIKAB CHE KIYOKTOI 10: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
