KORINTOEK 1 14
14
Konunoikab maoinatet, ak che bo kutuswek
1Osub chamnyet; ak ocheng’ mising’ konunoik che bo tamirmiriet, ago ne siirei ko oamde logoiywek. 2Amu inendet ne ng’alali eng’ kutit ne magigasei ko mang’alaljin bik, ago Jehovah; amu magasei chi; ago mwaei ung’otik eng’ tamirmiriet. 3Ago inendet ne amdoi kong’alaljin bik ng’alekab teekset, ak kagimitet, ak kagaigaet. 4Inendet ne ng’alali eng’ kutit koteechegei inegei; ago inendet ne amdoi koteechei kaniset.
5Amakwok anyun okwek tugul ong’alal eng’ kutuswek, ago ne siirei ko oamde: ak o inendet ne amdoi kosiir inendet ne ng’alali eng’ kutuswek, kobate koweech, si kobiit koteegak kaniset. 6Ago nguno anyun, che kitupche, ngot anyonjok ang’alale kutuswek, atoretenok nee, ngot ko mang’alalwok eng’ ng’ang’et, anan eng’ naet, anan eng’ amdaet, anan ko eng’ konetisiet? 7Agot tuguk che masoptos, che cheitos, anan ndurerut anan ketubet, ngo ma ibesio cheosiekwak, kenaitoi ano ne kiguutei anan ne kibutei? 8Amu ngo chei iriaget cheet ne magiguitos, ko ng’o ne chobegei agobo luget? 9O u noto ak okwek, ngot ko motwegu eng’ ng’alek che nyamnyum kegas, kenaitoi ano kit ne kagemwa? Amu ong’alaljini ola buch. 10U kele, mitei kutuswek che chang’ che terotin eng’ ng’ony, ama mi ne matinyei kit ne iboru. 11Ngot ko mangen anyun kit ne mwaei tuguchoto, aegu bunotyot eng’ inendet ne ng’alali, ak inendet ne ng’alali, koegu bunotyot eng’ ane. 12O u noto ak okwek, ko u ye omache mising’ koniunoikab tamirmiriet, ocheng’ eng’ kagiiletab ge tuguk che igochin kaniset koteegak. 13Noto anyun, inendet ne ng’alali eng’ kutit, ingosa si koweech ng’alek. 14Amu ngasa eng’ kutit ne magigasei, kosaei tamirmiriennyu, ago matinyei logoek ng’omnatennyu. 15Nee anyun? Asae eng’ tamirmiriet, ak asae eng’ ng’omnatet agine; atieni eng’ tamirmiriet, ak atieni eng’ ng’omnatet agine. 16Amu ngo ma u noto, ko ngiberuri eng’ tamirmiriet, komwaitoi ano Amen ye igoitoi kongoi, inendet ne tebe ole mi che ma inetgei amu manaei kit ne kimwae? 17Amu iman, igoitoi inye kongoi komie, ago manyor nin age kit ne imuchi koteech inendet.
18Amwachini Jehovah kongoi, ale ang’alale kutuswek kosiirok okwek tugul: 19ago achame amwa ng’alek mut eng’ ng’omnatennyu eng’ kanisa, si anet bik alak agichek, kosiir amwa ng’alek elfusiek taman eng’ kutit ne magigasei. 20Che kitupche, amoegu lagok eng’ ng’omnatet: ago oegu lagok che nyerotin eng’ yaitio, ago oegu che kaoeegitu eng’ ng’omnatet. 21Kigisir eng’ Ng’atutiet kele, Ang’alaljini bichu eng’ bik che bo kutuswek alak, ak eng’ kutuswekab toek; ak agot ngo u noto ko magasa, mwaei Kiptaiyat.
22Noto anyun kutuswek ko bo kaborunet, ma eng’ ichek che iyanotin, ago eng’ icheget che maiyanotin: ago amdaet ko bo kaborunet, ma eng’ che maiyanotin, ago eng’ ichek che iyani.
23Noto anyun ngoyumgei kaniset komugul, ak kong’alal tugul eng’ kutuswek che magigasei, ak ngo bwa go bik che ma inetgei, anan ko che maiyanotin, ko tos mamwaei kole o kibion? 24Ago ngo amda tugul, ak konyo go chi agenge ne maiyanat, anan ko ne ma inetgei, koger kong’ tugul inendet, ak koruokyin tugul inendet: 25ak king’anyei ung’otikab muguleldanyi; ak kobutyi ng’ony anyun kong’uruk kolos Jehovah, komwaei kolen mi Jehovah kwenung’wong’ iman.
Ye kiyumge, ko mie koteegogis tuguk tugul
26Nee anyun, che kitupche? Ye oyumge, kotinyei age tugul tiendab kalosunet, ak konetisiet, ak ng’ang’utiet, ak kutit ne magigasei, ak kaweegetab ng’alek. Ingoyaogis tuguk tugul koteegogis. 27Ngo ng’alal chi age tugul eng’ kutit ne magigasei, kong’alal aeng’u, anan ko che masiirei somok, ak ingorupgei; ak ingoweech chito age: 28ago ngo mami weegindetab ng’alek, ko ingosis eng’ kanisa; ak ingong’alaljigei inegei ak Jehovah. 29Ak ingong’alalso maotik aeng’u anan ko somok; ingoguiyo alage. 30Ago ngeng’ang’ji ng’olyo age ne tebyei eng’ yoto, ko ingosis ni ka bo tai. 31Amu omuchi okwek tugul oamde agenge agenge, si kobiit konetgei tugul, ak konyor kagaigaet tugul; 32ak kase it tamirmirikab maotik maotik; 33amu Jehovah ko ma Jehovah ne bo bolatet, ago bo kalyet. Ko u eng’ kanisosiek tugul che bo che tililen, 34ingosisyo kobogorisiek eng’ kanisosiek: amu magichamjin icheget kong’alal; ago ingogas it, ko u ye mwaei ng’atutik. 35Ak ngo machei ichek konetgei kiy, ko ingoteebe manong’otaikwak eng’ ga: amu kalilano ngo ng’alal kobogoriondo eng’ kaniset.
36Nee anyun? Tos okwek che kimong’unenok ng’olyotab Jehovah? Anan kibwanjok okwege? 37Ngobwati chi age tugul kole maotiot, anan ko chi ne mi eng’ atebetab tamirmiriet, ko ingonai tuguk che asirwok, kole choto ko ng’atutietab Kiptaiyat. 38Ago ngo maingen chi age tugul kiy, ko ingoek kimanaiyat.
39Noto anyun, che kitupche, ocheng’ mising’ oamde, amat oet keng’alal eng’ kutuswek che magigasei. 40Ago ingoyaogis tuguk tugul ko u ye nyolu ak eng’ chobet ne mie.
Currently Selected:
KORINTOEK 1 14: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
