KORINTOEK 1 15
15
Ng’eetyetab bik che kigobek
1Aboruok anyun, che kitupche, nguno, logoiywek che miach che kiaamwok, choto kiotaach, choto agichek che otonone, 2kisorunenok choto agichek; eng’ ng’alek che kiaamwok, ngot onam komie, ngot ko kima oyan buch.
3Amu kiagonok eng’ tai noto kiataach agane, ale kime Kristo agobo tengekwogikyok, ko u ye mwaei sirutik, 4ak kigitub; ak kiging’eet eng’ betutab somok ko u ye mwaei sirutik; 5ak kimong’ji Kepa; ye ibata, komong’ji taman ak aeng’; 6yeityo komong’ji tupchosiek che siirei bogol mut komi tugul, che ta komi agoi kora che chang’ eng’ ichek, ago kigoruiyo alak; 7yeityo komong’ji Jakobo; ye ibata, komong’ji che kiyoktoi tugul; 8ak let eng’ tugul, komong’ja agane, ko u ne kigios. 9Amu a ne ming’in eng’ che kiyoktoi, ne ma nyolu keguurena ne kiyoktoi, amu kiaus kanisetab Jehovah. 10Ago eng’ mieindab Jehovah a u kit ne a u: ak mieindanyi ne kigigona ko maek buch; ago kiaboisie mising’ asiir ichek tugul: ago ma ane, ago mieindab Jehovah ne kimi kobota. 11Ngo ane anyun, anan ngo ichek, keamdoi ui tugul, ak u noto kioyan ak okwek.
12Ara anyun, ngeamdoi Kristo kele kiging’eet komong’ eng’ che kibek, ko teptoi ano si komwaei alak eng’ kwenung’wong’ kole mami ng’eetyet ne bo che begu? 13Ago ngot ko mami ng’eetyet ne bo che begu, ko kaga ma king’eet Kristo agine: 14ak ngo kima king’eet Kristo, ko buch anyun amdaennyo, ko buch kagine kayaneng’wong’. 15Ee, ak kagenyoruech kele ki baorinik che bo lembech che bo Jehovah; amu kigebaorian agobo Jehovah kele kiing’eet Kristo: ne kaga ma ing’eet Jehovah, ngot ko maging’eeti che begu. 16Amu ngot ko maging’eeti che begu, ko kima king’eet Kristo agine: 17ak ngo kima king’eet Kristo, ko buch kayaneng’wong’; ko ta omi eng’ tengekwogikwok. 18Noto anyun, icheget che kigoruiyo eng’ Kristo ko kigolusyo. 19Ngot ko kogimang’u Kristo eng’ soboni kityo, ko kaga ki bik che tinyei rirek kosiir tugul.
20Ago kiging’eet anyun Kristo komong’ eng’ che kibek, tongoaniat ne bo icheget che ruitos. 21Amu ko u ye kibunu meet chi, ko kibunu chi agine ng’eetyet ne bo che begu. 22Amu ko u ye begu tugul eng’ Adam, ko u noto tun kisoobi tugul eng’ Kristo. 23Ago chi tugul eng’ komostanyi: Kristo ko tongoaniat; ye ibata ko ichek che bo Kristo, eng’ nyonunennyi. 24Ye ibata koit anyun let, ye tun igoito inendet bounatet kogochi Jehovah, inendet Kwanda; ye tun kagowong’ bounatet tugul ak kimnatet tugul ak kamuktaet. 25Amu kanyol kolaitoran inendet matiny, agoi konde bunikyik tugul keldebesaikab kelyekyik. 26Bunyot ne bo let ne tun king’emei ko meet. 27Amu, kigonde tuguk tugul keldebesaikab kelyekyik kogas it inendet. Ago ye mwaei kole kindoi tuguk tugul kogas it inendet, kotoogu kele maboto inendet ne kiinde tuguk tugul kogas it. 28Ak ye tun kaginde tuguk tugul kogas it inendet, eng’ betunoto anyun kinde Werit agine kogas it inendet, si koek Jehovah tugul eng’ tugul.
29Anan yaei nee anyun che kigibatisanji che kigobek? Ngot ko kaga maging’eeti iman che begu, ko kalya anyun si kibatisan choto agobo ichek? 30Ko amu nee anyun si kemi ng’oiyondit sait age tugul? 31Abaoriani eng’ kalosunonoto mi eng’ okwek, che kitupche, ne atinye eng’ Kristo Jesu Kiptaiyandennyo ale, amee betut age tugul. 32Ngo kigibarge ak tiong’ik eng’ Epeso ko u biteetab bik, atinye borot nee anyun? Ngo kaga maging’eeti che begu, ongeamisie ak kee, amu kibegu mutai.
33Among’ kiberberak: Ng’emei choronok che yaach atepto ne mie. 34Ogosu eng’ imanda, amat oyai tengek; amu maingen alak Jehovah: amwae ni si agonok olilan.
35Ago mwaei chi age, kolen, King’eetitoi ano che kigobek? Ak bwanei eng’ borto ne u nee? 36Inye ne i berber, noto ne igole inyendet, ko masobei, ngot ko mame: 37ak noto ne igole, ko megole borto ne tun biitu, ago keswot buch, abere biitune nganok, anan tuguk alak; 38ago igochin Jehovah borto ko u ye iboiboi inendet, ak kogochin keswot age tugul bortanyi inegei.
39Banyek tugul ko ma agenge: ago mi alak che bo bik, ak alak che bo tiong’ik, ak alak che bo taritik, ak alak che bo njirenik. 40Mitei borwek che bo kipsengwet, ak mitei borwek che bo ng’ony: ago terjin telunatet ne bo choto bo kipsengwet ak telunatet ne bo choto bo ng’ony. 41Mitei lilindo ne bo asista, ak lilindo age ne bo arawet, ak lilindo age ne bo kecheik; amu terjin kecheiyat age ak kecheiyat age eng’ lilindo.
42Ko u noto agine ng’eetyetab che begu. Kigolei eng’ ng’emisiet; king’eeti ko ma komi ng’emisiet: 43kigolei ko mami teegisto; ak tun king’eeti eng’ telunatet: kigolei eng’ nyalulet; ak tun king’eeti eng’ kamuktaet: 44kigolei borto ne kigisiktoi; king’eeti borto ne bo tamirmiriet. Ngo mi borto ne kigisiktoi, komi agine ne bo tamirmiriet. 45Ko u noto agine, kigisir kele, Kiek chito ne bo tai, Adam, chito ne sobei. Kiek Adam ne bo let tamirmiriet ne igoitoi sobondo. 46Ago maindoi noto bo tamirmiriet, ago noto bo borto; ye ibata ko noto bo tamirmiriet. 47Chito ne bo tai ko bo ng’ony, bo ng’ung’unyek: chito ne bo aeng’ ko bo kipsengwet. 48Ko u ole teptoi ne bo ng’ung’unyek, u choto agichek che bo ng’ung’unyek: ak ko u ole teptoi ne bo kipsengwet, u choto agichek che bo kipsengwet. 49Ak ko u ye kigiib itondab chitab ng’ung’unyek, ko tun kiibe itondab chitab kipsengwet agine.
50Amwae ni anyun, tupchosiechu, ale maimuchi banyek ak korotik konyor bounatetab Jehovah; amaimuchi ne nunei konyor ne manunei.
51Ogeero, amwawok ung’otiet: Magiruitosi achek tugul, ago kiwalech achek tugul, 52eng’ ne matia, eng’ kamismisetab konda, eng’ iriaget ne bo let: amu cheei iriaget, si king’eet che kigobek ko ma kotinyei nunet, ak kewalech. 53Amu kanyol kolaach ne nunei, ne manunei, ak kanyol kolaach nito meei ne mameei. 54Ago ye tun kagolaach nito nunei, ne manunei, ak ko kagolaach nito meei ne mameei, kosulda anyun mwaet ne kigisir kele, Kagelugui meet eng’ kabelisiet. 55Ee, meet, mi ano kabelisieng’ung’? Ee, meet, mi ano ng’wanindang’ung’? 56Ng’wanindab meet ko tengek; ak kimnatetab tengek ko ng’atutik: 57ago kigochini Jehovah kongoi, ne konech kabelisiet eng’ Kiptaiyandennyo Jesu Kristo.
58Noto anyun, che kitupche che achame, ogimegitu, among’ king’eak, oyae otese kotugul boisietab Kiptaiyat, amu ongen ole ma bo buch boisieng’wong’ ne uui eng’ Kiptaiyat.
Currently Selected:
KORINTOEK 1 15: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
