KORINTOEK 1 13
13
Chamnyet ko konunet ne o kosiir tugul
1Agot ndang’alale kutuswekab bik ak che bo malaikaisiek, amatinye chamnyet, ko kaegu sugunwet ne cheei, anan sanitab sugunwet ne bolei. 2Ak ngot atinye konunetab maoinatet, ak angen ung’otik tugul ak naet tugul, ak ngatinye kayanet tugul, kot amuch autoe tulonok, ago matinye chamnyet, ko a buch. 3Ak ngot agoite tugukyuk tugul abae kibananok, ak ndagoite bortanyu kebeel, ago matinye chamnyet, ko magelwa kiy.
4Muitoi chamnyet, ak ko tala; ama tinyei chamnyet ng’etkong’, malosegei chamnyet, ama menei, 5ama yaei ne ma nyolu, ama cheng’jingei chechik inegei, ama iiti tagisiet, ama iiti yaitio; 6mabaibai eng’ ne ma bo imanda, ago baibai eng’ imanit; 7sisei eng’ tuguk tugul, iyani tuguk tugul, imang’u tuguk tugul, muitoi eng’ tuguk tugul. 8Mararu chamnyet agoi: ago ngo mitei maoinatosiek, kotun igesugei; ngo mi kutuswek che terotin, kotun sistos; ngo mi naet, kotun igesugei. 9Amu kingen eng’ kebeberta, ak keamdoi eng’ kebeberta: 10ago ye tun nyo ne igesunotgei, kogesgei anyun kebeberta.
11Ye kingo a lakwa, ko kiang’alali ko u lakwa, kiaguitosi ko u lakwa, kiabwati ko u lakwa: nguno, ko kaaegu chito ne o, ko kaamete tugukab lakwandit. 12Amu nguno kegeere eng’ kioit, eng’ tamirmiron; ago tun ko togoch eng’ togoch: nguno angen eng’ kebeberta; ago tun anae ko u ye kigenaa. 13Ago tebyei nguno kayanet, kamang’unet, chamnyet, chuto somok; ago ne o eng’ chuto ko chamnyet.
Currently Selected:
KORINTOEK 1 13: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
