KORINTOEK 1 12
12
Besiotin konunoik che bo Tamirmiriet, ak ko agenge
1Nguno anyun agobo konunoik che bo tamirmiriet, che kitupche, ko mamache oegu che mongen. 2Ongen ole kingota ko o Bororiosiek, ko kigiretok obe oldab kanamonichoto che matwegu, ko u ye kigindoiywok. 3Noto anyun agonok oguiye ole, mami chi ne ng’alali eng’ Tamirmirietab Jehovah ne mwaei kole, Jesu ko chubot; ama mi chi ne imuchi komwa kole, Jesu ko Kiptaiyat, kobate eng’ Tamirmiriet ne Tilil.
4Nguno anyun, komitei konunoik che besiotin, ago agenge Tamirmiriet. 5Ak mitei ripsosiek che besiotin, ago agenge Kiptaiyat. 6Ak mitei boisionik che besiotin, ago agenge Jehovah, ne yaei tuguk tugul eng’ tugul. 7Ago kigochin chi tugul kaborunetab Tamirmiriet si kobiit kotoretegei. 8Amu kigochin chito age ng’olyotab ng’omnatet eng’ Tamirmiriet; ak kigochin age ng’olyotab naet, eng’ Tamirmirionoto: 9kigochin age kayanet, eng’ Tamirmirionoto; ak kigochin age konunoikab kasoobet, eng’ Tamirmirionoto agenge; 10ak kigochin age boisionikab kamuget; ak age maoinatet; ak age kabesietab tamirmirik: ak age kutuswek che terotin; ak age weeksetab kutuswek: 11ago boisie chuto tugul Tamirmiriet ne noto agenge, kopchechin age tugul ko u ye makyin.
Kaborunet ne bunu borto
12Amu ko u ye agenge borto, ak kotinyei kebeberwek che chang’, ak kebeberwek tugul che bo borto, agot ngo chang’, ko borto agenge; ko u noto agine Kristo. 13Amu eng’ Tamirmiriet agenge ko kigibatisanech achek tugul keegu borto agenge, ngo Yahudik anan Yunanik, ngo ratotin, anan kotiagotin, ak kigigonech achek tugul kee eng’ Tamirmiriet agenge.
14Amu borto, ko ma kebeberta agenge, ago chang’. 15Ngot komwa keldo kole, Amu ma a eut, ko ma bo borto; tos ma bo borto amu noto? 16Ak ngot komwa itit kole, Amu ma a konda, ko ma bo anyun borto; ko tos ma bo borto amu noto? 17Nda borto komugul ko konda, ko ta mi ano kastaet? Nda borto komugul ko itit, ko tos mi ano kang’utoet? 18Ago nguno ko kigonde Jehovah kebeberwek, age tugul eng’ ichek, eng’ borto, ko u ye kicham inendet. 19Ak nda tugul ko kebeberta agenge, ta mi ano borto? 20Ago nguno ko kebeberwek ichek che chang’, ago agenge borto.
21Amaimuchi konda kolenji eut, Mamagenen kiy: anan kogeny, maimuchi metit kolenji kelyek, Mamagenok kiy. 22Ago ne siirei mising’ ko, kebeberwechoto bo borto che u kele nyalulyotin, ko choto che nyolu: 23ak kebeberwechoto bo borto, che kiiti kele matia teegistanywa, ko choto che kilaakyin teegisto ne o kosiir; ak kebeberwekyok che matinyei kororonindo ko choto che tinyei kororonindo ne o kosiir; 24amu kebeberwekyok che tinyei kororonindo, ko mamachei kiy: ago kiituiyo Jehovah borto, kogochin teegisto ne o kosiir kebeberta kirarji; 25si mabiit kabesiet eng’ borto; ago si koripgei eng’ ripset agenge, kebeberwechoto, korib age age. 26Ak ngo nyalili kebeberta agenge, konyalildos kebeberwek tugul koboto noto; anan ngegonyiti kebeberta agenge, koboiboitu kebeberwek tugul koboto noto.
27Nguno anyun, okwek ko o bortab Kristo, ak o kebeberwekab boroto, age tugul eng’ okwek. 28Ak kigonde Jehovah alak eng’ kaniset, che bo tai ko che kiyoktoi, che bo aeng’ ko maotik, che bo somok ko konetik, yeityo ko kwong’utik, yeityo ko konunoikab kasoobet, toretosiek, kandoinatosiek, ak kutuswek che terotin. 29Tos tugul ko che kiyoktoi? Tos tugul ko maotik? Tos tugul ko konetik? Tos tugul ko yaikab kwong’utik? 30Tos tinyei tugul konunoikab kasoobet? Tos ng’alali tugul kutuswek che terotin? Tos iweechi tugul kutuswek? 31Ago ocheng’ mising’ konunoik che eechen. Ak aboruok oret ne mie mising’ ne siirei tugul.
Currently Selected:
KORINTOEK 1 12: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
